ނޮވެމްބަރު 4-17 އަށް ބަންގްލަދޭޝްގެ ވެރި ރަށް ޑާކާގައި ކުރިއަށްގެންދަން ނިންމާފައިވާ، 15 ވަނަ ސާފް ޗެމްޕިއަންޝިޕް ފުޓްބޯޅަ މުބާރާތަށް އިންޑިއާ އިން ޒުވާން ޓީމެއް ފޮނުވުމުގެ ފުރުސަތު ބޮޑުވެއްޖެ އެވެ.
އިންޑިއާ އާއި ނިއު ޒީލެންޑްގެ ދެމެދުގައި ކުޅިވަރުގެ ރޮނގުން ގުޅުން ބަދަހިކުރިތާ 100 އަހަރު ފުރުން ފާހަަގަކުރުމަށްޓަކައި ނޮވެމްބަރު މަހުގެ ތެރޭގައި ގިނަ ހަރަކާތްތަކެއް ވަނީ ރާވައިފަ އެވެ.
އެ ގޮތުން، އިންޑިއާގެ ބޮޑުވަޒީރު، ނަރެންދުރަ މޯދީ، ނޮވެމްބަރު މަސް ތެރޭ ނިއު ޒީލެންޑަށް ދަތުރުކުރާ ގޮތަށް ހަމަޖެހިފައިވާއިރު، އެ ދަތުރުގެ ތެރޭގައި ދެ ގައުމުގެ މެދުގައި ކުރިއަށްދާ ކުޅިވަރު ހަރަކާތްތަކުގައި މޯދީ ބައިވެރިވެވަޑައިގަންނަވާނެ ކަމަށް ވެސް ރިޕޯޓްތައް ބުނެ އެވެ.
އިންޑިއާގެ ފުޓްބޯޅަ ފެޑެރޭޝަން، އޭއައިއެފްއެފް އިން އިއުލާނުކޮށްފައިވާ ގޮތުގައި، ނޮވެމްބަރު މަހު ފީފާ ބްރޭކްގެ ތެރޭގައި އިންޑިއާ އިން ނިއު ޒީލެންޑާ ދެކޮޅަށް ދެ މެޗެއް ކުޅޭނެ އެވެ. މި މެޗުތައް ތާވަލުކޮށްފައި އޮތީ ސާފް ޗެމްޕިއަންޝިޕް ކުޅޭ ޝެޑިއުލާ ދިމާވާ ގޮތަށެވެ.
އެ ގޮތުން، ނޮވެމްބަރު 12 ވަނަ ދުވަހު، އިންޑިއާ އިން ނިއު ޒީލެންޑުގެ އޯކްލޭންޑުގައި އެ ގައުމާ ދެކޮޅަށް ފުރަތަމަ މެޗު ކުޅޭނެ އެވެ. އަދި، އޭގެ ތިން ދުވަސް ފަހުން، ނޮވެމްބަރު 15 ވަނަ ދުވަހު، އިންޑިއާ އިން ނިއު ޒީލެންޑާ ދެކޮޅަށް ކުޅޭ ދެ ވަނަ މެޗު އޮންނާނީ ކްރައިސްޗާޗުގަ އެވެ. މިއީ، އިންޑިއާ ގައުމީ ޓީމުން ނިއު ޒީލެންޑުގައި ކުޅޭ ފުރަތަަމަ މެޗުތަކެވެ. މީގެ ކުރިން، އޯޝެނިއާ ސަރަހައްދުގައި އިންޑިއާ އިން ކުޅުނު ހަމައެކަނި މެޗަކީ، 2005 ވަނަ އަހަރު ފިޖީއާ ދެކޮޅަށް ކުޅުނު މެެޗެވެ.
މި ފަހަރުގެ ފީފާ ވޯލްްޑް ކަޕްގައި ވެސް ކުޅުނު ނިއު ޒީލެންޑާ ދެކޮޅަށް މީގެ ކުރިން އިންޑިއާ އިން ދެ ފަަހަރެއްގެ މަތިން ނުކުމެފައިވެ އެވެ. އެއީ، 1981 ވަނަ އަހަރު މެލޭޝިއާގައި ބޭއްވި މެރްޑޭކާ މުބާރާތުގަ އެވެ. އެ މެޗު ވަނީ 0-0 އިން އެއްވަރުވެފަ އެވެ. އަދި، 2018 ވަނަ އަހަރު މުމްބާއިގައި ކުޅުނު އިންޓަކޮންޓިނެންޝިއަލް ކަޕްގައި، އިންޑިއާ އަތުން 2-1 އިން ނިއު ޒީލެންޑް މޮޅުވި އެވެ.
ނިއު ޒީލެންޑާ ދެކޮޅަށް މި ފަހަރު ކުޅެން ލިބުނު މެޗާ ބެހޭގޮތުން، އިންޑިއާގެ ކޯޗު ހާލިދު ޖާމިލް ބުނީ، އަބަދުވެސް މަތީ ލެވަލްގެ ޓީމުތަކާ ދެކޮޅަށް ކުޅެން ލިބޭ ފުރުސަތަކީ، ކުރިއަށް ދިއުމަށްޓަކައި ހުޅުވޭ ދޮރުތަކެއް ކަމަށެވެ.
ސާފް ޗެމްޕިއަންޝިޕަށް އިންޑިއާ އިން ޒުވާން ޓީމެއް؟
މި މަހު އެއް ވަނަ ދުވަހު ބޫޓާންގެ ތިމްޕޫގައި ކުރިއަށްދިޔަ މި ފަަހަރުގެ ސާފް ޗެމްޕިއަންޝިޕްގެ ގުރުއަތުލުމުގައި އިންޑިއާ ލައްވާލީ ރާއްޖެ އާއި ޕާކިސްތާނާ އެއް ގްރޫޕެއްގަ އެވެ.
މި ފަހަރުގެ ސާފް ޗެމްޕިއަންޝިޕް، އެންމެ ފުރަތަމަ ބާއްވަން ތާވަލުކުރަން އެންމެ ފުރަތަމަ މަސައްކަތްކުރީ، ސެޕްޓެމްބަރު/އޮކްޓޫބަރު ފީފާ ބްރޭކުގަ އެވެ. އެކަމަކު، އެ މުއްދަތުގައި އިންޑިއާ އިން ފީފާ އާސިއާން ކަޕްގައި ކުޅެން ޖެހޭތީ، ސާފް ޗެމްޕިއަންޝިޕް ނޮވެމްބަރު މަހުގެ ފީފާ ބްރޭކު ތެރެއަށް ބަދަލުކުރީ، ސާފް ޗެމްޕިއަންޝިޕްގައި އިންޑިއާގެ ސީނިއާ ޓީމު ކުޅެން ފުރުސަތު ދިނުމުގެ ގޮތުންނެވެ. އެކަމަކު، މިހާރު އޮތްގޮތުން، ނޮވެމްބަރު މަހު ކުޅުނު ކަމުގައި ވިޔަސް، އިންޑިއާގެ އެންމެ ސީނިއާ ކުޅުންތެރިން ހިމެނޭ ޓީމެއް ސާފް ޗެމްޕިއަންޝިޕްގައި ކުޅުމުގެ ފުރުސަތު ކުޑަ އެވެ.
އެންމެ ފަހުން، ބަންގްލަދޭޝްގައި ސާފް ޗެމްޕިއަންޝިޕް ބޭއްވި ދެ ފަހަރު ވެސް އިންޑިއާ އިން ކުޅުނީ 23 އަހަރުން ދަށުގެ ޓީމެކެވެ. އެއީ، 2009 ވަނަ އަހަރާއި 2018 ވަނަ އަހަރު އެވެ. އެ ގޮތުން، 2009 ވަނަ އަހަރު ޕެނަލްޓީ ޖަހައިގެން ރާއްޖެ އަތުން ފައިނަލުގައި މޮޅުވިއިރު، 2018 ވަނަ އަހަރުގެ ފައިނަލުގައި ރާއްޖެ އަތުން ވީ ބައްޔެވެ.
އިންޑިއާ އިން ކަލްކަތާގައި އޮކްޓޫބަރު މަހު ބްރެޒިލާ ދެކޮޅަށް ކުޅެން ވެސް ނިންމާފަައިވާއިރު، ސާފް ޗެމްޕިއަންޝިޕަށް ނޮވެމްބަރު މަހު ފޮނުވާނެ ޓީމެއް ކަނޑައެޅުމަށްޓަކައި، ކުރިއަށް އޮތް ހަފްތާތަކުގެ ތެރޭގައި ބައްދަލުވުންތަކެއް ބާއްވާނެ ކަމަށް ރިޕޯޓްތައް ބުނެ އެވެ.
ޖަޕާނުގެ ނަގޯޔާގައި އަންނަ މަހު ބާއްވާ އޭޝިއަން ގޭމްސްގެ ފުޓްބޯޅަ އިވެންޓުގައި އިންޑިއާ ވާދަނުކުރާތީވެ، އެ ގައުމުގެ 23 އަހަރުން ދަށުގެ ޓީމަށް އެ އިވެންޓުގެ މެޗުތައް ގެއްލޭނެ އެވެ. އޯލް އިންޑިއާ ފުޓްބޯލް ފެޑެރޭޝަން (އޭއައިއެފްއެފް)ގެ ޓެކްނިކަލް ޑިޕާޓްމަންޓުގެ ވިސްނުމަކީ، ސާފް ޗެމްޕިއަންޝިޕަށް ޒުވާން ޓީމެއް ފޮނުވުން ކަމަށް އިންޑިއާގެ ބައެއް ނޫސްތަކުން އަންނަނީ ރިޕޯޓްކުރަމުންނެވެ.
އެންމެ ފަހުން، 2023 ވަނަ އަހަރު އިންޑިއާގެ ބެންގަލޫރުގައި ބޭއްވި ސާފް ޗެމްޕިއަންޝިޕްގެ ޗެމްޕިއަންކަން ހޯދީ އިންޑިއާ އިންނެވެ. އެއީ، އިންޑިއާ އިން ސަރަހައްދުގެ ތަށި އުފުލާލި ނުވަ ވަނަ ފަހަރެވެ.
