އައްޑޫ ސިޓީ ފޭދޫ ސްކޫލުގައި ކުރިއަށްދިޔަ ކެޑޭޓް ކޭމްޕެއްގައި ބައިވެރިވަމުންދިޔަ ކުދިންގެ ތެރެއިން ކާނާވިހަވެގެން ފަރުވާދެމުންދިޔަ 31 ކުދިންގެ ތެރެއިން މިވަގުތު ދެ ކުދިންނަށް ފަރުވާދެމުންދާއިރު، މައްސަލަ ހިއުމަން ރައިޓްސް ކޮމިޝަން (އެޗްއާރްސީއެމް) އިން ބަލަން ފަށައިފި އެވެ.
އަދަދު އަށް މައުލޫމާތު ލިބިފައިވާ ގޮތުގައި ކާނާވިހަވި ކުދިންގެ ތެރެއިން ދެ ކުދިންނަށް ފަރުވާ ދެމުންދަނީ އައްޑޫ އެކުއެޓޯރިއަލް ހޮސްޕިޓަލުގަ އެވެ. އެ ދެ ކުދިންގެ ހާލުވެސް ރަނގަޅު ކަމަށް މައުލޫމާތު ލިބެ އެވެ.
ކާނާވިހަވެގެން ޖުމްލަ 31 ކުދިން އައްޑޫ އިކުއެޓޯރިަލް ހޮސްޕިޓަލާއި، މަރަދޫ ހެލްތު ސެންޓަރު އަދި ފޭދޫ ހެލްތު ސެންޓަރަށް ގެންދިޔަ އެވެ. އޭގެތެރެއިން 29 ކުދިން މިހާރު ވަނީ ދޫކޮށްލާފަ އެވެ.
މިކަމާ ގުޅިގެން އެޗްއާރްސީއެމް އިން ބުނީ ކާނާވިހަވެ ހާލުދެރަވެގެން ކުދިންތަކެއް ހޮސްޕިޓަލުގައި އެޑްމިޓްކުރަން ޖެހުމަކީ އެ ކޮމިޝަނުން ކަންބޮޑުވާ ކަމެއް ކަމަށާއި މައްސަލަ ސީރިއަސް މައްސަލައެއްގެ ގޮތުގައި ބަލަމުންދާ ކަމަށެވެ.
މި ބާވަތުގެ ކަންކަން ތަކުރާރު ނުވާނެ ގޮތެއްގެ މަތިން ކަންކަން ބައްޓަން ކުރަން ކަމާބެހޭ އިދާރާތަކަށް އެޗްއާރްސީއެމް އިން ގޮވައިލި އެވެ.
