ކުޅިވަރު އިންތިޒާމުކޮށް ބެލެހެއްޓުމުގެ ނިޒާމުގައި ކޮރަޕްޝަނަށް ހުރި މިންވަރު ދެނެގަތުމަށް އެންޓި ކޮރަޕްޝަން ކޮމިޝަން (އޭސީސީ) އިން ތައްޔާރުކުރި ދިރާސާގެ ރިޕޯޓުގައި މޯލްޑިވްސް އޮލިމްޕިކް ކޮމިޓީ (އެމްއޯސީ) އާއި ފުޓްބޯލް އެސޯސިއޭޝަންގެ މައްޗަށް ސީރީއަސް ތުހުމަތެއް އަމާޒުވެއްޖެ އެވެ.
އޭސީސީގެ ރިސާޗް އެންޑް ޕޮލިސީ ސެކްޝަނުން ތައްޔާރުކުރި މި ރިޕޯޓް ފާސްކޮށްފައިވަނީ، މިދިޔަ އަހަރުގެ ޑިސެމްބަރު މަހުގެ ތިން ވަނަ ދުވަހު އެވެ. މި ދިރާސާ އަށް ބޭނުންކުރި މެތަޑްގައި ރިޕޯޓްގައި ބުނެފައިވާ ގޮތުން މި ދިރާސާ ކުރެވުނީ ޑެސްކް ރިިވިއު ހަދައިގެންނެވެ، ޖަމިއްޔާތަކާއި ޖަމާއަތްތަކުން ފައިސާ ހަރަދުކޮށްފައިވާ ގޮތުގެ ތަފްސީލް އަދި އޮޑިޓް ރިޕޯޓްތަކުން މައުުލޫމާތު އެއްކޮށްފައިވާ ކަމަށް އޭސީސީން ބުނެފައިވާއިރު، މި ރިޕޯޓަށް މައުލޫމާތު އެއްކުރުމަށްޓަކައި، ފޯކަސް ގްރޫޕް އިންޓަވިއު ކުރެވުނު ކަމަށް ވެސް އޭސީސީން ވަނީ ބުނެފަ އެވެ.
އެ ގޮތުން، މި ދިރާސާ ރިޕޯޓްގެ މައްސަލަތަކުގެ ތެރޭގައި ބުނެފައިވާ ގޮތުގައި، އެފްއޭއެމް އާއި މޯލްޑިވްސް އޮލިމްޕިކް ކޮމިޓީ އަށް ސަރުކާރުންނާއި ބައިނަލްއަގުވާމީ ފަރާތްތަކުން ދޫކުރެވިފައިވާ ފައިސާ ނަހަމަ ގޮތުގައި ބޭނުންކުރަމުންދާ ކަަމަށާއި، އެ ގޮތުން، އިންތިހާބަށް ނުފޫޒު ފޯރުވުމަށް މި ފައިސާ އެކިއެކި ކްލަބްތަކުގެ އިސްވެރިންނަށް ދޭ ކަމަށް ވަނީ ހިމަނައިފަ އެވެ. އަދި، މި ކަމަކީ އެފްއޭއެމް އަށް ފައިސާ ދޫކުރާ ފަރާތްތަކުން ކަނޑައަޅާފައިވާ އުސޫލާ ހިލާފަށް އެފްއޭއެމްގެ އިންތިހާބަށް ނުފޫޒު ފޯރުވުމުގެ ގޮތުން އެ ފައިސާ ބޭނުންކުރާކަމުގެ ޝަކުވާ އޭސީސީ އަށް ހުށަހަޅާފައިވާ ކަމަށް ރިޕޯޓްގައިވަނީ ބަޔާން ކޮށްފަ އެވެ.
އޭސީސީގެ ރިޕޯޓްގައި ބަޔާންކޮށްފައިވާ މި ސީރިއަސް މައްސަލައިގެ ތުހުމަތާ ގުޅިގެން، މޯލްޑިވްސް އޮލިޕިކް ކޮމިޓީގެ ނައިބު ރައީސް، އަހުމަދު މުންތަގިމް (މުންތޭ)، ސޯޝަލް މީޑިއާގައި އޭސީސީ އަށް މުހިންމު ސުވާލެއް ވަނީ ކުރިމަތިކޮށްފަ އެވެ. އެ ގޮތުން، ފޭސްބުކްގައި، އޭސީސީގެ ރައީސް، އާދަމް ޝާމިލް އަށް ދަންނަވާފައިވަނީ، މޯލްޑިވްސް އޮލިމްޕިކް ކޮމިޓީއާ ގުޅޭގޮތުން، އޭސީސީ އަށް ހުށަހެޅުނު ފައިސާގެ މައްސަލައާ ގުޅޭ މި ޝަކުވާގެ މައްސަލަ ބެލުމަށް ފަހު، އެ ފަރާތާ ދޭތެރޭ އެޅި ފިޔަވަޅެއް ސާފުކުރުމަށް އެދޭ ކަމަށެވެ.
އޭސީސީގެ ރިޕޯޓްގައި ދިވެހި ކުޅިވަރާ ބެހޭ ގާނޫނީ އޮނިގަނޑު ދައްކުވައިދޭ ޗާޓެއް ކުރަހާފައިވާއިރު، ކްލަބް ޖަމިއްޔާތަކަށް/އެސޯސިއޭޝަންތަކަށް ޒިންމާވާން ޖެހޭ ބައެއްގެ ގޮތުގައި ހިމަނާފައިވަނީ ކޮމިޝަނާ އޮފް ސްޕޯޓްސް އެވެ. މޯލްޑިވްސް އޮލިމްޕިކް ކޮމިޓީ އޮތީ ވަކި ސަހުސެއްގެ ގޮތުގަ އެވެ.
އެކާވީސް ކަރުދާހުގެ މި ރިޕޯޓްގައި، އޭސީސީން ވަނީ ރާއްޖޭގެ ކުޅިވަރާ ގުޅުންހުރި ކޮރަޕްޝަނަށް މަގުފަހިވެފައިވާ ގިނަ މައްސަލަތަކެއް ބަޔާންކޮށް، 18 ލަފަޔެއް ހުށަހަޅައިފަ އެވެ.
ހުށަހަޅާފައިވާ ލަފާތަކަށް އަލިއަޅުވާލާއިރު، މާލީ ޖަވާބުދާރީވުން ހަރުދަނާކުރުމުގެ ގޮތުން ކުޅިވަރު އެސޯސިއޭޝަންތަކަށް ލިބޭ އެންމެހާ އާމްދަނީއާއި ކުރާ ޚަރަދުތައް ހާމަކުރުން ޤާނޫނުން ލާޒިމްކުރުމަށާއި، ހަރުދަނާ ފައިނޭންޝަލް ރިޕޯޓިންގ ފްރޭމްވަރކެއް އެކުލަވާލުމަށް ވާނީ ލަފާދީފަ އެވެ. އަދި، ގަވާއިދުން މިނިވަން މާލީ އޮޑިޓްތައް ހެދުމާއި، ވެރިންނާއި ހިރާސް ބޮޑު މަޤާމުތަކުގައި ތިބޭ ފަރާތްތަކުގެ މާލީ ބަޔާން ވެބްސައިޓުގައި ޝާއިޢުކުރުން ލާޒިމްކުރުން ހިމެނެ އެވެ. މީގެ އިތުރުން، އެކަޑަމީތަކުގެ ފެންވަރާއި، ކޯޗުންގެ ޝަރުތުތަކާއި ސަލާމަތީ މިންގަނޑުތައް ކަނޑައަޅައި، ކުޅިވަރާބެހޭ ވުޒާރާއިން ޕީރިއޮޑިކް އިންސްޕެކްޝަންތައް ހިންގުމަށްވެސް ވަނީ ހުށަހަޅައިފަ އެވެ.
އަދި، ކުޅިވަރު އެސޯސިއޭޝަންތަކުގެ އިންތިޚާބީ ނިޒާމު ހަރުދަނާކޮށް، މަޤާމުތަކަށް ނަޒާހަތްތެރި އަދި ޤާބިލް ފަރާތްތައް އައްޔަންކުރުމަށާއި، ޝަކުވާ ހުށަހަޅައި ފިޔަވަޅު އެޅޭނެ ނިޒާމެއް ޤާއިމުކުރުމަށް ރިޕޯޓުގައި ބާރުއަޅާފައިވާނެއެވެ. ހަމައެއާއެކު، ދަނޑުތަކުން ލިބެންޖެހޭ ފައިސާގެ އޮޑިޓެއް ހެދުމާއި، ސްކޮލަރޝިޕް ދިނުމާއި ޕްރޮކިއުމަންޓްގެ ކަންކަން ދެފުށްފެންނަ ގޮތަށް ގެންދިއުމަށްވެސް ލަފާދީފައިވާނެއެވެ. އަދި ކުޅިވަރާބެހޭ ޤާނޫނުގައި ހުރި ގޮންޖެހުންތައް ދެނެގަނެ، މަސްއޫލިއްޔަތުތަކާ ގުޅިގެން ޕަރފޯމަންސް އޮޑިޓް ފުރިހަމަކުރުމަށް ވަނީ އިރުޝާދު ދީފަ އެވެ.
