ލާމަރުކަޒީ ގާނޫނަށް އިސްލާހު ގެންނަން އުޅެނީ މާލެ އާއި ހުޅުމާލޭގެ ބިންތައް ނުއަގުގައި ވިއްކާލި ގޮތަށް ރަށްރަށުގެ ބިންތައް ވެސް ވިއްކާލުމުގެ ބޭނުމުގައި ކަމަށް ކުރީގެ ރައީސް އަބްދުއްﷲ ޔާމީން އަބްދުއްގައްޔޫމް ވިދާޅުވެއްޖެ އެވެ.
ޕީޕަލްސް ނޭޝަނަލް ފްރަންޓް (ޕީއެންއެފް) އިން ރޭ ބޭއްވި ޖަލްސާގައި ޔާމީން ވިދާޅުވީ، ރައީސް މުހައްމަދު މުއިއްޒަކީ މާލޭގެ މޭޔަރުކަމުން ރައީސުލްޖުމްހޫރިއްޔާގެ މަގާމަށް ވަޑައިގަތްއިރު ވެސް މާލޭގެ އެތައް ބިމެއް ނުއަގުގައި ވިއްކާލައްވާފައިވާ ބޭފުޅެއް ކަމަށެވެ.
މިހާރު ލާމަރުކަޒީ ގާނޫނަށް ގެންނަން އުޅޭ ބަދަލުތަކުގެ އަސްލު ބޭނުމަކީ މޭޔަރުކަމުގައި މާލެ އަދި މިހާރު ހުޅުމާލެ ފޮތިފޮތިކޮށްގެން ވިއްކި ގޮތަށް ރަށްރަށުގައި ހުރި ރައްޔިތުންގެ ބިންތައް ވެސް ވިއްކާލުން ކަމަށް އެމަނިކުފާނު ތުހުމަތު ކުރެއްވި އެވެ.
"މާލޭ ކައިރީގައި ހުރި ތަންތަން ތަންކޮޅެއް އަގުބޮޑުވާނެ، މާލެއާ ދުރުގައި ހުރި ތަންތަނަށް ވުރެ. އެހެންވީމަ ދެވަނަ ދެކަމެއް ނޫން ކުރަން މިއުޅެނީ، އަނެއްކާ ވެސް ހަމަ ކެވުނު ގޮތަކަށް ކާން،" ޔާމީން ވިދާޅުވި އެވެ.
މިއީ ކުރާ ވައްކަމެއް ކަމަށް އެ މަނިކުފާނު ތުހުމަތު ކުރެއްވި އެވެ.
އިންތިހާބުގެ ދެ ބުރު ދޭތެރޭގައި ވެސް ކާނިވާ ސަރަހައްދުން 10 ބިމެއް 20 އަހަރަށް ކުއްޔަށް ދޫކޮށްލިކަން ހާމަވެއްޖެ
ވިޔަފާރީގެ އުސޫލުން މާލެއިން ބިމާއި އިމާރާތްތައް ކުއްޔަށް ދޫކުރާ އަގަށް ވުރެ އެތައް ގުނައެއް ހެޔޮކޮށް ކާނިވާ ސަރަހައްދުން ބިންތައް ދޫކޮށްލީ 20 އަހަރަށް
މާލޭ މޭޔަރަކަށް، މުއިއްޒު ހުންނެވިއިރު، 2023 ގެ ރިޔާސީ އިންތިހާބުގެ ފުރަތަމަ ބުރާއި ދެ ވަނަ ބުރާ ދޭތެރޭގައި، ސީއެސްއާރުގެ ނަމުގައި ގަނޑުކޮށް ގިނަ އަދަދެއްގެ ފައިސާ ނެގުމަށް ފަހު، އަލިމަސް ކާނިވާ ސަރަހައްދުން 10 ބިމެއް އަމިއްލަ ފަރާތްތަކަށް ނުއަގުގައި ކުއްޔަށް ދޫކޮށްފައިވެ އެވެ.
މުއިއްޒުގެ ވެރިކަމުގައި ހުޅުމާލޭން ގިނަ ބިންތަކެއް އުސޫލާ ހިލާފަށް ބިޑަކަށް ނުލައި ޗައިނާގެ ކުންފުނިތަކަށް ދޫކޮށްފައިވެ އެވެ. އަދި ޕީއެންސީގެ ބައެއް މެންބަރުންނަށް ވެސް ބިންތައް ވިއްކާފައިވެ އެވެ.
މިގޮތަށް ދޫކޮށްފައިވާ ބިންތައް އެ މަނިކުފާނުގެ ވެރިކަމެއްގައި ބަދަލު ދިނުމެއް ނެތި ނަގާނެ ކަމަށް ޔާމީން ވިދާޅުވި އެވެ.
ރަށްރަށުގެ ބިންތައް ސަރުކާރަށް ގެނޭ ގޮތަށް ލާމަރުކަޒީ ގާނޫނު ބަދަލުކުރަން ތުޅާދޫ ދާއިރާގެ މެންބަރު އަބްދުލް ހަންނާން އަބޫބަކުރު ހުށަހެޅުއްވި އިސްލާހަށް ޕީއެންސީން ތާއިދުކޮށްފައިވެ އެވެ. ނަމަވެސް މި ބިލް ބޭރުކޮށްލަން ރައްޔިތުންގެ މަޖިލީހަށް ހުށަހަޅާފައިވާ ޕެޓިޝަންގައި މިހާތަނަށް 2300 އަށް ވުރެ ގިނަ މީހުންގެ ވަނީ ސޮއިކޮށްފައިފަ އެވެ.
