ހޮރްމޫޒް ކަނޑުއޮޅިން ވިޔަފާރި އުޅަނދުފަހަރަށް އަލުން ދަތުރުކުރެވޭނެ ވަގުތީ މަގެއް ކަނޑައެޅުމާ ގުޅޭ ގޮތުން، އޮމާނާއެކު "ވިސްނުމަކަށް" އައުމަށް މަޝްވަރާ ކުރަމުންދާ ކަމަށް އީރާނުން ބުނެފި އެވެ.
އީރާނުން މިހެން ބުނެފައިވަނީ، އެ ގައުމާ ދެކޮޅަށް ކުރަމުންދާ ހަނގުރާމަ ހުއްޓާލުމަށް އާ މަޝްވަރާތަކެއް ހޯމަ ދުވަހު ފަށާނެ ކަމަށާއި، އެ މަގްސަދުގައި އީރާނަށް ދޭން ނިންމި "ވަރުގަދަ" ހަމަލާތަކެއް ހުއްޓާލުމަށް އަމުރުކޮށްފައިވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވުމާ ގުޅިގެންނެވެ.
މި މަޝްވަރާތަކުގައި ބައިވެރިވާނީ ކޮން ބައެއްކަން ޓްރަމްޕް ސާފުކޮށްދެއްވާފައެއް ނުވެ އެވެ. ނަމަވެސް، އެއްބަސްވުމެއްގެ "އިމުގެ ތެރޭގައި" ހިމެނޭ ކަންކަމަށް މިހާރު އެއްބަސްވެވިފައިވާ ކަމަށާއި، އޭގެ ތެރޭގައި އީރާނުން ބަންދުކުރުމުގެ ސަބަބުން ތެލުގެ އަގު އިންތިހާއަށް އުފުލިފައިވާ މުހިންމު ކަނޑުގެ ސަރަހައްދެއް ކަމަށްވާ ހޮރްމޫޒް ކަނޑުއޮޅި އަލުން ހުޅުވާލުން ހިމެނޭ ކަމަށް ޓްރަމްޕް ކުރިން ވިދާޅުވެފައިވެ އެވެ.
މިކަމަށް ރައްދު ދެމުން އީރާނުން ބުނެފައިވަނީ އެމެރިކާއާއެކު އެއްވެސް މަޝްވަރާއެއް ކުރަމުން ނުދާ ކަމަށާއި، އެފަދަ މަޝްވަރާއެއް ކުރުމުގެ އެއްވެސް ރޭވުމެއް ވެސް ނެތް ކަމަށެވެ.
އީރާނުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަގާއީ އިތުރަށް ވިދާޅުވީ، ތެހެރާނުން އޮމާނާއެކު މަޝްވަރާ ކުރަމުންދަނީ "ހޮރްމޫޒް ކަނޑުއޮޅިން ދަތުރުކުރާ އުޅަނދުފަހަރުގެ ސަލާމަތާއި ރައްކާތެރިކަން ކަށަވަރުކުރެވޭނެ މަގަކާ މެދު ވިސްނުމަކަށް" އައުމަށް ކަމަށެވެ.
މިދިޔަ ފެބްރުއަރީ މަހު އެމެރިކާ އާއި އިސްރާއީލުން އީރާނަށް ހަމަލާދޭން ފެށި ފަހުން، ތެހެރާނުން ތަކުރާރުކޮށް އެ ކަނޑުއޮޅި ބަންދުކޮށްފައިވެ އެވެ.
ހަނގުރާމަ ހުއްޓާލުމުގެ އެއްބަސްވުމަކާ ގާތްވެފައިވާ ކަމަށް ޓްރަމްޕް ތަކުރާރުކޮށް ވިދާޅުވަމުން ގެންދެވި ނަމަވެސް، ކޮންމެ ފަހަރަކު ވެސް ފެނިގެންދަނީ ދެ ފަރާތުން އަލުން ހަމަލާތައް ބަދަލުކުރަން ފަށާ މަންޒަރެވެ.
ފެބްރުއަރީ 28 ގައި ހަމަނުޖެހުންތައް ފެށުނީއްސުރެ، ހޮރްމޫޒް ކަނޑުއޮޅިން ދަތުރުކުރާ އުޅަނދުފަހަރަށް ކުރިމަތިވާ ހުރަސްތަކާ ގުޅިގެން ހަކަތައިގެ އަގުތަކަށް ދަނީ ބޮޑެތި ބަދަލުތަކެއް އަންނަމުންނެވެ.
ދުނިޔޭގައި ބޭނުންކުރާ ސާފުނުކުރާ ތެލާއި ގުދުރަތީ ގޭސް (އެލްއެންޖީ) ގެ ގާތްގަނޑަކަށް 20 އިންސައްތަ އާންމުކޮށް އުފުލަނީ މި ކަނޑުއޮޅި މެދުވެރިކޮށެވެ.
