އިސްރާއީލުން ހިފާފައިވާ ހުޅަނގު އައްސޭރީގެ އަވަށެއްގައި ދިރިއުޅޭ ފަލަސްތީނުގެ ދެ އާއިލާއެއްގެ ގެދޮރު ވަށާލައި، މިދިޔަ އާދީއްތަ ދުވަހުން ފެށިގެން ޔަހޫދީ ވަޒަންވެރިން އެ މީހުން ބަންދުކޮށްފި އެވެ.
އެ އާއިލާތަކުން ބުނަމުންދަނީ ކާބޯތަކެއްޗާއި ޒަރޫރީ ސާމާނު ހުސްވަމުންދާ ކަމަށެވެ. މި ހާލަތާ ގުޅިގެން އިންސާނީ ހައްގުތަކަށް މަސައްކަތް ކުރާ ޖަމާއަތްތަކުން ދަނީ މިކަމުގެ ތެރެއަށް ވަދެ އެ އާއިލާތައް ސަލާމަތްކުރުމަށް ކަމާބެހޭ ފަރާތްތަކަށް ގޮވާލަމުންނެވެ.
ގުސްރާ އަވަށުގައި ހަރުކަށި ޔަހޫދީ ވަޒަންވެރިން ހަދާފައިވާ އައުޓްޕޯސްޓެއްގައި ހިނގި ކުރިމަތިލުންތަކަކަށް ފަހު، އިސްރާއީލުގެ ސަލާމަތީ ބާރުތަކުން އެ ސަރަހައްދުން ފޭބި ކަމަށް މިދިޔަ ބުދަ ދުވަހު ވަނީ ރިޕޯޓްކޮށްފަ އެވެ. ނަމަވެސް، އަދިވެސް އެ ސަރަހައްދުގައި 12 އެއްހާ ޔަހޫދީ ވަޒަންވެރިން ތިބި ކަމަށް މައުލޫމާތު ލިބެ އެވެ.
ފަލަސްތީނުގެ އެ ދެ އާއިލާއިން އެހީއަށް އެދި އިސްރާއީލު ސިފައިންނަށް އެންމެ ފުރަތަމަ ރިޕޯޓް ކުރުމުން، އެ ސަރަހައްދަށް ދިޔަ ސިފައިން ޔަހޫދީ ވަޒަންވެރިންނާއެކު އަޅުކަން ކުރަން ތިބޭ މަންޒަރު ފެންނަ ވީޑިއޯތަކެއް ވަނީ އާންމުވެފަ އެވެ.
އަބޫ ރިދީ އާއި ހަސަން އާއިލާގެ ގެތަކުން ފެނާއި ކަރަންޓުގެ ހިދުމަތް މެދުކަނޑާލައި، ކާބޯތަކެތި ހުސްވަމުންދާތީ، އެ އާއިލާތަކުން ދަނީ އެހީއަށް އެދި ސޯޝަލް މީޑިއާގައި ވީޑިއޯތައް އާންމުކުރަމުންނެވެ.
ގުސްރާ އަވަށުގައި ހަރަކާތްތެރިވާ ޔަހޫދީ ވަޒަންވެރިން ބޭނުންވަނީ ސީދާ ކޮން ކަމެއްކަން ސާފެއް ނުވެ އެވެ. ނަމަވެސް، މީގެ ކުރިން ވެސް ޔަހޫދީ ވަޒަންވެރިން ވަނީ ފަލަސްތީނު މީހުންގެ ގެދޮރުން އެ މީހުން ނެރެލައި، އެ ތަންތަނަށް ގަދަބާރުން ވެރިވެގެންފަ އެވެ.
ޔަހޫދީ ވަޒަންވެރިންގެ މައިގަނޑު މަގްސަދަކީ އެ ސަރަހައްދުގައި ދިރިއުޅޭ ފަލަސްތީނުގެ ރައްޔިތުން އެ ތަނުން ބޭރުކޮށް، އެ ސަރަހައްދު ހުސްކުރުމެވެ.
ހުޅަނގު އައްސޭރީގެ ހާލަތު މިހާ ގޯސްވެފައި މިވަނީ، އެ ސަރަހައްދުގެ ހާލަތު އޮތީ ކެތްތެރިކަން ކޮޅުންލާ ހިސާބުގައި ކަމަށް އދ. ގެ އިސް އޮފިޝަލަކު ނިއުޔޯކުގައި އޮތް ސަލާމަތީ މަޖިލީހުގެ ބައްދަލުވުމެއްގައި މިދިޔަ އަންގާރަ ދުވަހު ވިދާޅުވެފައިވާ ދަނޑިވަޅެއްގަ އެވެ.
އިސްރާއީލުން ހިފާފައިވާ ބިންތަކުގައި ހަދާފައިވާ ހުރިހާ އާބާދީތަކަކީ ގައިރުގާނޫނީ ތަންތަނެވެ. އަދި ޔަހޫދީން ހަދާފައިވާ އައުޓްޕޯސްޓްތަކަކީ އިސްރާއީލު ސަރުކާރުގެ ރަސްމީ ހުއްދައެއް ނެތި ހަދާފައިވާ ތަންތަނެވެ.
