ކ. ދިއްފުއްޓަށް ދަތުރުކުރަމުންދިޔަ ލޯންޗެއް ދިޔަވެ އަޑިއަށްދަނިކޮށް އޭގެއިން ދަތުރުކުރި 14 ފަތުރުވެރިޔަކު ސަލާމަތްކޮށްފި އެވެ.
ފުލުހުން ބުނީ އެ ހާދިސާ ހިނގިއިރު ލޯންޗުގައި ތިބީ ޗައިނާއަށް ނިސްބަތްވާ 14 ފަތުރުވެރިން ކަމަށާއި އޭގެ ތެރޭގައި ހަތަރު ކުޑަކުދިން ވެސް ހިމެނޭ ކަމަށެވެ.
މި ހާދިސާގައި އެއްވެސް މީހަކަށް ގެއްލުން ނުލިބޭއިރު، ލޯންޗުން ދަތުރުކުރި ހުރިހާ އެންމެން މިހާރު ވަނީ ދިއްފުއްޓަށް ގެންގޮސްފަ އެވެ. ނަމަވެސް އެމީހުން ދަތުރުކުރި ލޯންޗު ވަނީ އަޑިއަށް ގޮސްފަ އެވެ.
ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި ދިޔަވަމުންދިޔަ ލޯންޗުން ޗައިނާ ފަތުރުވެރިންތައް ނެގީ ދޯންޏަކަށެވެ. ދޯންޏަށް މީހުން ބޭލިތާ މާގިނައިރުތަކެއް ނުވަނީސް ލޯންޗު ވަނީ އަޑިއަށްގޮސްފަ އެވެ.
މި ހާދިސާއާ ގުޅިގެން ބަލަންޖެހޭ ކަންކަން ފުލުހުން ދަނީ ބަލަމުން ކަމަށް އެ މުއައްސަސާއިން ބުންޏެވެ.
މިދިޔަ ބުދަ ދުވަހުގެ ރޭ ސަޕްލައި ދޯންޏެއް އަޑިއަށްދިޔަ ހާދިސާގައި ތިން މީހަކު ގެއްލިގެން އެ މީހުން ހޯދުމުގެ މަސައްކަތް އަދިވެސް ދަނީ ކުރަމުންނެވެ. އެއީ ދޯނީގެ ކެޕްޓަނާއި ދޯނި ސަލާމަތްކުރަންދިޔަ ފުލުހަކާއި ސިފައިންގެ މީހެކެވެ.
