ތ. މަޑިފުށިން ހިލަ އާއި ހިލަވެލި ބަރުކޮށްގެން ހުވަދުއަތޮޅު ރިސޯޓަކަށް ދަތުރުކުރި "ފްރެންޑް 4" ނަމަކަށް ކިޔާ ސަޕްލައި ދޯނި އަޑިއަށްދިޔަ ހާދިސާގައި ގެއްލުނު ތިން މީހުން ހޯދަން ބޭރު ގައުމުތަކުގެ އެހީތެރިކަން ހޯދަން މަޝްވަރާ ކުރަމުންދާ ކަމަށް ފޮރިން މިނިސްޓްރީން ބުނެފި އެވެ.
ފޮރިން މިނިސްޓްރީން އެކްސް ގައި ބުނީ ގެއްލުނު ތިން މީހުން ހޯދުމަށް ކުރިއަށްގެންދާ އޮޕަރޭޝަނަށް އެހީތެރިކަން ހޯދުމަށް އެކި ގައުމުތަކާ މަޝްވަރާ ކުރަމުންދާ ކަމަށެވެ. ނަމަވެސް މަަޝްވަރާ ކުރަމުންދަނީ ކޮން ގައުމުތަކާއެކު ކަމެއް މިނިސްޓްރީން ހާމައެއް ނުކުރެ އެވެ.
މިނިސްޓްރީން ބުނީ ކަމާބެހޭ ފަރާތްތަކާ ގުޅިގެން ތިން މީހުން ހޯދުމުގެ މަސައްކަތް ކުރަމުންދާއިރު، އޮޕަރޭޝަން ވަރުގަދަކުރުމަށް ދެވެން އޮތް ހުރިހާ އެހީތެރިކަން ދިނުމަށް މަަސައްކަތް ކުރާނެ ކަމަށެވެ.
ފުލުހުން ބުނީ އެ ހާދިސާގައި ގެއްލުނީ ދޯނީގެ ކެޕްޓަން ތ. މަޑިފުށި، ދޮންވެލި، މުހައްމަދު ހަމްދޫން، 35، އާއި ދޯނި ސަލާމަތްކުރުމުގެ މަސައްކަތްކުރަން ދިޔަ ފުލުހުންގެ ސާޖަންޓް އަލީ ނާފިއު، 35، އަދި އެމްއެންޑީއެފްގެ ސްޓާފް ސާޖަންޓް އިބްރާހިމް އަހްމަދު 39، އެވެ.
އެ ތިން މީހުން ހޯދުމުގެ މަސައްކަތް ކުރަމުންދަނީ އެމްއެންޑީއެފް ކޯސްޓް ގާޑާއި ފުލުހުން ގުޅިގެންނެވެ. އެގޮތުން ވައިގެ މަގުން 6،112 އަކަ ނޯޓިކަލް މޭލު، ކަނޑުގެ މަގުން 1،370.10 އަކަ ނޯޓިކަލް މޭލު ސަރަހައްދު ވަނީ ބަލައިފަ އެވެ.
އަދަދު އަށް އެނގިފައިވާ ގޮތުގައި ގެއްލިގެން ހޯދަމުންދާ ފުލުސް އަދި ސިފައިންގެ މީހާއަކީ ވިލިނގިލީ މީހުންނާ ކައިވެނިކޮށްގެން އެ ރަށުގައި ދިރިއުޅޭ ދެ މީހުންނެވެ. ގެއްލުނު އެމްއެންޑީއެފް މީހާގެ ތިން ކުދިން ތިބެ އެވެ. އަދި ފުލުސް މީހާގެ ދެ ކުދިން ތިބެ އެވެ.
އެ ހާދިސާ ހިނގި ގޮތުގެ މައުލޫމާތު އެނގޭ އޮފިޝަލަކު މި ނޫހާ ވާހަކަ ދައްކަމުން ބުނީ ދޯނި އަޑިއަށްދިޔައިރު، ގެއްލުނު މީހުން ތިބީ ދޯނީގައި ކަމަށެވެ. އެމީހުން ދިޔައީ ދޯނި ސަލާމަތް ކުރަން ދިޔަ ހިއްކުމުގެ މަސައްކަތް ކުރަމުން ކަމަށް އޭނާ ބުންޏެވެ.
ފުލުހުންނާއި ސިފައިން ގުޅިގެން ދޯނީގެ ދިޔަ ހިއްކުމުގެ މަސައްކަތް ކުރަމުންދިޔައީ އެ ހިސާބުން ދަތުރު ކުރި ކޮޅުވެއްޓިއެއްގައި ދޯނި ކަފު ޖަހައިގެންނެވެ. ބެލެވެނީ، ކޮޅުވެއްޓިން އުފެދުނު ބާންޏަކުން ދޯނި ފުރޮޅާލައިގެން އަޑިއަށް ދިޔައީ ކަމަށެވެ.
ސިފައިން އެންމެ ފުރަތަމަ އާންމު ކުރި ބަޔާނެއްގައި ބުނީ ދޯނި ސަލާމަތް ކުރެވޭ ގޮތް ނުވެ އަޑިއަށްދިޔައީ ކަނޑުގަދަވުމުގެ ސަބަބުން ކަމަށެވެ.
