ތ. މަޑިފުށިން ހިލަ އާއި ހިލަވެލި ބަރުކޮށްގެން ހުވަދުއަތޮޅު ރިސޯޓަކަށް ދަތުރުކުރި "ފްރެންޑް 4" ނަމަކަށް ކިޔާ ސަޕްލައި ދޯނި އަޑިއަށްދިޔަ ހާދިސާގައި ގެއްލުނު ތިން މީހުންގެ ވަނަވަރު ހާމަކޮށް، އެ މީހުން ހޯދުމުގެ މަސައްކަތް ކުރިއަށްދާ ކަމަށް ފުލުހުން ބުނެފި އެވެ.
ފުލުހުން ބުނީ އެ ހާދިސާގައި ގެއްލުނީ ދޯނީގެ ކެޕްޓަން ތ. މަޑިފުށި، ދޮންވެލި، މުހައްމަދު ހަމްދޫން، 35، އާއި ދޯނި ސަލާމަތްކުރުމުގެ މަސައްކަތްކުރަން ދިޔަ ފުލުހުންގެ ސާޖަންޓް އަލީ ނާފިއު، 35، އަދި އެމްއެންޑީއެފްގެ ސްޓާފް ސާޖަންޓް އިބްރާހިމް އަހްމަދު 39، އެވެ.
އެ ތިން މީހުން ހޯދުމުގެ މަސައްކަތް ކުރަމުންދަނީ އެމްއެންޑީއެފް ކޯސްޓް ގާޑާއި ފުލުހުން ގުޅިގެންނެވެ. އެގޮތުން ވައިގެ މަގުން ޔޫއޭވީއާއި މޯލްޑިވިއަންގެ ފްލައިޓެއްގެ އިތުރުން އެމްއެންޑީއެފް އާއި ފުލުހުންގެ އުޅަނދުފަހަރުތައް އޮޕަރޭޝަންގައި ދަނީ ބޭނުންކުރަމުންނެވެ.
އަދަދު އަށް އެނގިފައިވާ ގޮތުގައި ގެއްލިގެން ހޯދަމުންދާ ފުލުސް އަދި ސިފައިންގެ މީހާއަކީ ވިލިނގިލީ މީހުންނާ ކައިވެނިކޮށްގެން އެ ރަށުގައި ދިރިއުޅޭ ދެ މީހުންނެވެ. ގެއްލުނު އެމްއެންޑީއެފް މީހާގެ ތިން ކުދިން ތިބެ އެވެ. އަދި ފުލުސް މީހާގެ ދެ ކުދިން ތިބެ އެވެ.
"ފްރެންޑު-4" އަޑިއަށް ދިޔައީ ރޭ ދަންވަރުގެ ވަގުތެއްގަ އެވެ. އެ ދޯނިން އަށް މީހުން ދަތުރު ކުރި އެވެ. ކައްޕި ފިޔަވައި ދެން ތިބީ މުޅިން ވެސް ބިދޭސީންނެވެ. އެ އެންމެން ވަނީ ސަލާމަތްކޮށްފަ އެވެ.
އެ ހާދިސާ ހިނގި ގޮތުގެ މައުލޫމާތު އެނގޭ އޮފިޝަލަކު މި ނޫހާ ވާހަކަ ދައްކަމުން ބުނީ ދޯނި އަޑިއަށްދިޔައިރު، ގެއްލުނު މީހުން ތިބީ ދޯނީގައި ކަމަށެވެ. އެމީހުން ދިޔައީ ދޯނި ސަލާމަތް ކުރަން ދިޔަ ހިއްކުމުގެ މަސައްކަތް ކުރަމުން ކަމަށް އޭނާ ބުންޏެވެ.
ފުލުހުންނާއި ސިފައިން ގުޅިގެން ދޯނީގެ ދިޔަ ހިއްކުމުގެ މަސައްކަތް ކުރަމުންދިޔައީ އެ ހިސާބުން ދަތުރު ކުރި ކޮޅުވެއްޓިއެއްގައި ދޯނި ކަފު ޖަހައިގެންނެވެ. ބެލެވެނީ، ކޮޅުވެއްޓިން އުފެދުނު ބާންޏަކުން ދޯނި ފުރޮޅާލައިގެން އަޑިއަށް ދިޔައީ ކަމަށެވެ.
ރޭ ދަންވަރުގެ ވަގުތެއްގައި ސިފައިން އާންމު ކުރި ބަޔާނެއްގައި ބުނީ ދޯނި ސަލާމަތް ކުރެވޭ ގޮތް ނުވެ އަޑިއަށްދިޔައީ ކަނޑުގަދަވުމުގެ ސަބަބުން ކަމަށެވެ.
