އިދިކޮޅު އެމްޑީޕީން އަންނަ ބުރާސްފަތި ދުވަހުގެ ރޭ "ދަތިވެއްޖެ" ނަމުގައި ބާއްވާ މުޒާހަރާ މަޖީދީ މަގުން ކުރިއަށް ގެންދިޔުމުގެ ފުރުސަތު ދޭން ފުލުހުންނާ ބައްދަލުކޮށް އެ ޕާޓީން އެދިއްޖެ އެވެ.
އެމްޑީޕީން ފުލުހުންނާއެކު ބޭއްވި ބައްދަލުވުމަށްފަހު އެ ޕާޓީގެ ފަރާތުން ބައްދަލުވުމުގައި ބައިވެރިވެވަޑައިގެންނެވި ކުރީގެ ޑިފެންސް މިނިސްޓަރު އަމީން ފައިސަލް ވިދާޅުވީ މުޒާހަރާ ކުރިއަށް ގެންދެވެން އޮތީ ހަމައެކަނި މަޖީދީ މަގުން ކަމަށްވާތީ އެ ފުރުސަތު ފަހިކޮށްދޭން އެދިފައިވާނެ ކަމަށާއި އެގޮތަށް އެ ހުއްދަ ފުލުހުން ދޭނެ ކަމަށް އުންމީދުކުރައްވާ ކަމަށެވެ.
"އަޅުގަނޑުމެން މުޒާހަރާ ގެންދާނީ ހަމަ ސީދާ މަޖީދީ މަގުން ދާ ގޮތަށް. ދެން އެބޭފުޅުން އަޅުގަނޑަށް ހީވަނީ މިފަހަރު ހުއްދަ ދެއްވާނެހެން. ދެން ވިދާޅުވި ތިމަންނަމެންގެ ވެރިންނާ މަޝްވަރާކުރުމަށްފަހު ޖަވާބެއް ދޭނަމޭ. ދެން އަޅުގަނޑުމެންގެ ވާހަކައަކީ އިތުރު އެހެން މަގެއް ނެތޭ. އަޅުގަނޑުމެން ހަމަ ދާނީ މަޖީދީ މަގުންނޭ ހަމަ،" އޭނާ ވިދާޅުވި އެވެ.
ބައްދަލުވުމުގައި ބައިވެރިވެވަޑައިގެންނެވި އެމްޑީޕީގެ ތިމަރަފުށީ ދާއިރާގެ ރައީސް އަންވަރު އިބްރާހިމް ވިދާޅުވީ އެމްޑީޕީން އިންތިޒާމުކޮށްގެން ވޭތުވެދިޔަ ތިން ފަހަރު ހަރަކާތްތައް ބާއްވަންވެގެން ފުލުހުގައި އެދިފައިވާ ރޫޓްތައް ބަދަލުކޮށްފައިވާ ކަމަށެވެ.
ނަމަވެސް މިފަހަރު މަޖީދީ މަގުން މުޒާހަރާ ކުރިއަށްގެންދަން އެދުނީ ގިނަ ގެތައް ހުންނަނީ މަޖީދީ މަގު ސަރަހައްދުގައި ހުންނާތީ ކަމަށް އަންވަރު ވިދާޅުވި އެވެ. އޭނާ ވިދާޅުވީ ބޭރު މަގުން މުޒާހަރާ ކުރިއަށް ގެންދިޔާމަ ގެތައް މަދުވުމުން ރައްޔިތުންނަށް ދޭން ބޭނުންވާ މެސެޖު ނުފޯރާ ކަމަށެވެ.
އެމްޑީޕީގެ މުޒާހަރާ އޮގަސްޓް 13، ވާ ބުރާސްފަތި ދުވަހުގެ ރޭ 20:30 ގައި ފެށުމަށް ހަމަޖެހިފައިވަނީ މަޖީދީ މަގު، ސޯޝަލް ސެންޓަރު ކުރިމަތިންނެވެ.
ދަތިވެއްޖެ ނަމުގައި އެމްޑީޕީން މުޒާހަރާއެއް ބޭއްވުމަށް ރާވަމުންދަނީ ތަކެތީގެ އަގު އިންތިހާއަށް ބޮޑުވެފައިވާތީ އެވެ. ސަރުކާރުން އާންމު ތަފާސްހިސާބުތަކަށް ބަލާއިރު، އަހަރެއްގެ ތެރޭގައި އަސާސީ ކާބޯތަކެތީގެ އަގު ވަނީ އަށް ޕަސެންޓު އުފުލިފަ އެވެ.
