މުދާ ބަރުކޮށްގެން ދަތުރު ކުރަނިކޮށް ރޭ ދަންވަރު އަޑިއަށް ދިޔަ ދޯނިން ގެއްލުނު އެ ދޯނީގެ ކައްޕި އާއި ދޯނި ސަލާމަތް ކުރަން ދިޔަ ޕޮލިސް އަދި ސިފައިންގެ މީހާ ގެއްލުނީ ދޯނި ސަލާމަތް ކުރުމަށްޓަކައި ދިޔަ ހިއްކުމުގެ މަސައްކަތް ކުރަނިކޮށްކަން އިތުބާރު ހުރި މަސްދަރަކުން އަދަދު އަށް އެނގިއްޖެ އެވެ.
ގެއްލިގެން ހޯދަނީ ދޯނީގެ ކައްޕި އާއި އެ ދޯނި ސަލާމަތް ކުރަން ގއ. ވިލިނގިލިން ދިޔަ ފުލުހުންގެ ޓީމުގައި ހިމެނޭ ފުލުހަކާއި ގދ. ތިނަދޫއިން ދޯނި ސަލާމަތް ކުރުމުގެ އޮޕަރޭޝަނާ ގުޅުނު ސިފައިންގެ މީހެކެވެ.
ދޯނީގެ ކައްޕިއަކީ، ތ. މަޑިފުއްޓަށް ނިސްބަތްވާ މުހައްމަދު ހަމްދޫން އެވެ. އަދި ގެއްލުނު ފުލުސް މީހާއަކީ ސާޖަންޓް އަލީ ނާފިއުކަން މި ނޫހަށް ވަނީ އެނގިފަ އެވެ. ގެއްލުނު ސިފައިންގެ މީހާގެ ވަނަވަރެއް އަދި ނޭނގެ އެވެ.
މި ނޫހަށް އެނގިފައިވާ ގޮތުގައި ގެއްލިގެން ހޯދަމުންދާ ފުލުސް އަދި ސިފައިންގެ މީހާއަކީ ވިލިނގިލީ މީހުންނާ ކައިވެނިކޮށްގެން ދިރިއުޅޭ ދެ މީހުންނެވެ. ގެއްލުނު އެމްއެންޑީއެފް މީހާގެ ތިން ކުދިން ތިބެ އެވެ. އަދި ފުލުސް މީހާގެ ދެ ކުދިން ތިބެ އެވެ.
"ފްރެންޑު-4" އަޑިއަށް ދިޔައީ ރޭ ދަންވަރުގެ ވަގުތެއްގަ އެވެ. އެ ދޯނިން އަށް މީހުން ދަތުރު ކުރި އެވެ. ކައްޕި ފިޔަވައި ދެން ތިބީ މުޅިން ވެސް ބިދޭސީންނެވެ. އެ އެންމެން ވަނީ ސަލާމަތްކޮށްފަ އެވެ.
އެ ހާދިސާ ހިނގި ގޮތުގެ މައުލޫމާތު އެނގޭ އޮފިޝަލަކު މި ނޫހާ ވާހަކަ ދައްކަމުން ބުނީ ދޯނި އަޑިއަށްދިޔައިރު، ގެއްލުނު މީހުން ތިބީ ދޯނީގައި ކަމަށެވެ. އެމީހުން ދިޔައީ ދޯނި ސަލާމަތް ކުރަން ދިޔަ ހިއްކުމުގެ މަސައްކަތް ކުރަމުން ކަމަށް އޭނާ ބުންޏެވެ.
ހިލަ އާއި ހިލަވެލި ބަރުކޮށްގެން ރިސޯޓަކަށް ދަތުރު ކުރި ކަމަށް ބެލެވޭ "ފްރެންޑު-4" ދިޔަވާން ފެށީ ރޭ 9:30 ހާއިރު އެވެ. މައުލޫމާތު ލިބޭ ގޮތުގައި ދޯނީގައި އޮތީ އެންމެ ޕަންޕެކެވެ. އެ ޕަންޕު ޖަހައިގެން ދިޔަވުން ކޮންޓްރޯލެއް ނުވި އެވެ.
ދޯނި ދިޔަވާން ފެށި ހިސާބުން ދޯނީގެ ކައްޕި ވަނީ އެކި މީސްމީހުންނަށް ގުޅައި އެހީ ހޯދަމުންނެވެ. ދޯންޏާއި މީހުން ސަލާމަތް ކުރަން ދިޔަ ޕޮލިސް އަދި އެމްއެންޑީއެފްގެ ޓީމުތަކުން ދިޔައީ ޕަންޕު ހިފައިގެންނެވެ.
ފުލުހުންނާއި ސިފައިން ގުޅިގެން ދޯނީގެ ދިޔަ ހިއްކުމުގެ މަސައްކަތް ކުރަމުންދިޔައީ އެ ހިސާބުން ދަތުރު ކުރި ކޮޅުވެއްޓިއެއްގައި ދޯނި ކަފު ޖަހައިގެންނެވެ. ބެލެވެނީ، ކޮޅުވެއްޓިން އުފެދުނު ބާންޏަކުން ދޯނި ފުރޮޅާލައިގެން އަޑިއަށް ދިޔައީ ކަމަށެވެ.
ރޭ ދަންވަރުގެ ވަގުތެއްގައި ސިފައިން އާންމު ކުރި ބަޔާނެއްގައި ބުނީ ދޯނި ސަލާމަތް ކުރެވޭ ގޮތް ނުވެ އަޑިއަށްދިޔައީ ކަނޑުގަދަވުމުގެ ސަބަބުން ކަމަށެވެ.
"ކަނޑުގަދަވުމުގެ ސަބަބުން ދޯނި ސަލާމަތްކުރުމަށް ކުރި މަސައްކަތް ކާމިޔާބުވާ ގޮތް ނުވެ، ސިފައިންނާއި ފުލުހުން މަސައްކަތް ކުރަމުން ދަނިކޮށް އުޅަނދު ވަނީ މުޅިން އަޑިއަށް ގޮސްފަ،" ސިފައިން ބުންޏެވެ.
އެ ހާދިސާގައި ގެއްލުނު ތިން މީހުން ހޯދުމުގެ މަސައްކަތް ސިފައިންނާއި ފުލުހުން އަދި އާންމުންގެ އެހީތެރިކަމާއެކު އަދިވެސް ދަނީ ކުރަމުންނެވެ.
"މި ހާދިސާ ހިނގި ވަގުތު ދޯނީގައި ތިބި އަށް މީހުންގެ ތެރެއިން ހަތް މީހަކު މިހާރު ސަލާމަތްކުރެވިފައިވާއިރު، މި ހާދިސާގައި ތިން މީހަކު ވަނީ ގެއްލިފަ. ގެއްލުނު މީހުންގެ ތެރޭގައި ހިމެނެނީ، ދޯނީގެ ގެ ކެޕްޓަން އާއި އަދި މީހުން ސަލާމަތްކުރުމުގެ މަސައްކަތުގައި ހަރަކާތްތެރިވި ސިފައިންގެ ބޭކަލަކާއި ފުލުހުންގެ ބޭކަލެއް،" ސިފައިން ބުނެފައިވެ އެވެ.
ކުށެއްގެ އިސްލާހު: އޯގަސްޓު 6، 2026
ފްރެންޑްޝިޕް-4 އިން ދަތުރު ކުރި މީހުންނާއި އުޅަނދު ސަލާމަތް ކުރަން އުޅުމުގެ ތެރޭގައި ގެއްލުނު ތިން މީހުން ތިބި ކަމަށް ބެލެވެނީ ދޯނީގެ ވަތުގައި ކަމަށް މި ލިޔުމުގައި ކުރިން ލިޔެފައިވަނީ މައުލޫމާތުގެ ކުށަކުންނެވެ. ގެއްލުނު މީހުން ތިބީ ދޯނީގެ ވަތުގައި ނޫންކަން މި ނޫހަށް ވަނީ މިހާރު ޔަގީންވެފަ އެވެ.
