ރާއްޖޭގައި އުފެދިފައި އޮތް ޑޮލަރުގެ ކަޅު ބާޒާރުގައި ޑޮލަރުގެ އަގު އުފުލިގެން ދަނީ އެކަމުގެ ހަގީގަތް އޮޅޭ ގޮތަށް ބައެއް ނޫސްތަކުން ޖަހާ ސުރުހީތަކުގެ ސަބަބުން ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
ޕީއެސްއެމްއިން އިންތިޒާމުކޮށްގެން ރޭ ގެނެސްދިން އިގުތިސާދީ ފޯރަމް ހުށަހަޅައިދެއްވި މިނިސްޓަރު ސައީދު އެ ފޯރަމްގައި ވިދާޅުވީ، ހެނދުނު މުޅި ގައުމު ހޭލާއިރު ދެ ނޫހެއްގެ ސުރުހީގައި ޑޮލަރުގެ ރޭޓަކީ 22ރ. އޭ ނުވަތަ 24ރ. އޭ ބުނެ ހަބަރު ފެތުރުމުން މާކެޓުން އެއަށް ރިއެކްޓްކުރާ ކަމަށެވެ.
ނަމަވެސް އެއީ ކޮން ދެ ނޫހެއްކަން ސައީދަށް ވިދާޅުވާން ކެރިވަޑައެއް ނުގެންނެވި އެވެ. އެއްވެސް ނޫހެއްގައި ޑޮލަރު 24ރ. އަށް އެރިކަމަށް ލިޔެފައެއް ނެތެވެ.
ގަސްދުގައި އެފަދަ ހަބަރުތައް ގެނެސްދީގެން މާކެޓުގެ އިތުބާރު ނަގާލުމަކީ ޒިންމާދާރުކަން ކުޑަ އަމަލެއްގެ ގޮތުގައި ސައީދު ސިފަކުރެއްވި އެވެ.
"އެއީ ޒިންމާދާރު ގޮތެއް ތޯ؟ އެއްވެސް ގައުމެއްގައި އެކަން ހިނގާނެ ގޮތެއް ނޫން. އިގުތިސާދެއް ހަލާކުކޮށްލަން ޑެލިބަރޭޓްލީ މިއަދު ޑޮލަރު ރޭޓަކީ 24ރ. އޭ، ހަމަ ޑެލިބަރޭޓްލީ ނިއުސްތަކުގައި އެހެން ގެނައުމަކީ އެއީ އެންމެ ރަނގަޅު ޑިމޮކްރަސީތޯ؟،" ސައީދު ވިދާޅުވި އެވެ.
ބްލެކް މާކެޓުގެ އަގުތައް ނޫސްތަކުން ގެނެސްދެނީ ސައީދު ވިދާޅުވި ގޮތުގައި އާންމުންގެ މެދުގައި ކަންބޮޑުވުން އުފައްދުމަށެވެ. އެފަދަ ހަބަރުތަކަކީ "ފޭކް ނިއުސް" ކަމާއި އެއީ ހުޅަނގުގެ ބައެއް ޑިމޮކްރެސީތަކުގައި ގެންގުޅޭ އުކުޅެއް ކަމަށް އޭނާ ވިދާޅުވި އެވެ.
"ޕޮލިޓިކަލް އެމްބިޝަންއެއް ކާމިޔާބުކުރުމަށްޓަކައި ސޮސައިޓީއެއް ޑިވައިޑްކޮށްލައި މާކެޓް ކްރޭޝް ކޮށްލުމަށްޓަކައި ފޭކް ނިއުސް މި ފަތުރަނީ. އެހެންވީމަ އެހެން ހެދީމަ މިހާ ކުޑަ އިކޮނޮމީއެއްގައި ނަގަންޖެހޭ ބްރަންޓު [އުފުލަންޖެހޭ ތަކުލީފް] ބޮޑުވާނެ. މީގެން ކޮން ފައިދާއެއްތޯ ވާނީ އެގޮތަށް ހަބަރު ގެނެސްދިނީމަ،" ސައީދު ވިދާޅުވި އެވެ.
މިފަދަ ވާހަކަތައް ގެނައުމަކީ ޒިންމާދާރު ގޮތެއްތޯ ސައީދު ސުވާލު ކުރެއްވުމުން، އިނާ މޯލްޑިވްސްގެ މެނޭޖިން ޑިރެކްޓަރު މުހައްމަދު ފިރާގު ވިދާޅުވީ ގަސްދުގައި ޑޮލަރުގެ އަގުބޮޑު ކަމަށް ބުނެ ދޮގު ވާހަކަ ފެތުރުމަކީ "އެއްވެސް ގައުމެއްގައި އެކަން ހިނގާނެ ގޮތެއް ނޫން" ކަމަށެވެ.
"ބައެއް ގައުމުތަކުގައި އަޅުގަނޑަށް ހީވަނީ އެއީ ގާނޫނީ ކުށެއްވެސްމެ. އެގޮތަށް އެކަން ކުރުން،" ފިރާގު ވިދާޅުވި އެވެ.
ބޮޑު އަގުގައި ޑޮލަރު ލިބެން ހުރުމުން އިގުތިސޯދުގައި ޑޮލަރު ހުރިކަން އެނގޭ ކަަމަށް ފިރާގު ވިދާޅުވި އެވެ.
ޑޮލަރަށް އޮތް ޑިމާންޑު މިހާރު ބޮޑުވުމުގައި އިރާން ހަނގުރާމައާ ގުޅިގެން ތެލާއި، ޝިޕިން އަދި އިންޝުއަރަންސް ބޮޑުވުން ހިމެނޭ ކަމަށް ފޯރަމްގައި ވާހަކަ ދެއްކެވި ބައެއް ބޭފުޅުން ވިދާޅުވި އެވެ.
"އެފްއޯބީއާއި ޝިޕިން އަދި އިންޝުއަރެންސް އަގުބޮޑުވުމުން ވެސް ޑޮލަރަށް އޮތް ބާރު ބޮޑުވި،" އެސްޓީއޯގެ މެނޭޖިން ޑިރެކްޓަރު ޝިމާދު ވިދާޅުވި އެވެ.
ދުނިޔޭގެ ބާޒާރުގައި ތެލުގެ އަގު މައްޗަށް ދިއުމާއި، ހަނގުރާމައިގެ ސަބަބުން މުދާ އެތެރެކުރުމުގެ ބައެއް ހަރަދުތައް ފަސްގުނަ ބޮޑުވެފައިވާ ކަމަށް ފޯރަމްގައި ބައެއް ބޭފުޅުން ވިދާޅުވި އެވެ.
ޑޮލަރުގެ މައްސަލަ ހައްލުކުރުމަށް މާލީ ސިޔާސަތު އޯވަހޯލްކުރަންޖެހޭ ކަމަށް ފިރާގު ވިދާޅުވި އެވެ.
