ކައުންސިލުތަކުން ބަލަހައްޓާ ބިންތައް ރަށްރަށުގެ އިހުތިސާސުން ވަކިކޮށް ސަރުކާރަށް ނެގޭ ގޮތަށް ލާމަރުކަޒީ ގާނޫނަށް ހުށަހެޅި އިސްލާހު ގާނޫނުއަސާސީއާ ހިލާފު ކަމަށް ކެންދޫ ދާއިރާގެ މަޖިލިސް މެންބަރު، މައުރޫފް ޒާކިރު ވިދާޅުވެއްޖެ އެވެ.
ރައްޔިތުންގެ މަޖިލީހުގައި މިއަދު ވާހަކަ ދައްކަވަމުން މައުރޫފް ވިދާޅުވީ އެންމެހައި ބާރުތައް ފެށިގެން އަންނަނީ އަދި ބާރުތައް ދެމި އޮންނާނީ ވެސް ރައްޔިތުންގެ ކިބައިގައި ކަމަށް ގާނޫނުއަސާސީގައި ބަޔާންކޮށްފައިވާ ކަމަށެވެ. އަދި، ރާއްޖެ ހިންގަންޖެހޭނީ ލާމަރުޒީ ނިޒާމުންކަމަށް ގާނޫނުއަސާސީގައި ބަޔާން ކޮށްފައި އޮންނަކަން ވެސް އޭނާ ފާހަގަކުރެއްވި އެވެ.
މި ސަރުކާރު ފެށުނީއްސުރެ ވެސް މަސައްކަތް ކުރަމުން ގެންދަނީ ލާމަރުކަޒީ ނިޒާމު ފުނޑުފުނޑުކޮށްލަން ކަމަށާއި މިހާރު މަޖިލީހަށް ހުށަހަޅާފައިވާ އިސްލާހަކީ ވެސް އޭގެ ބޮޅެއް ކަމަށް އޭނާ ތުހުމަތުކުރެއްވި އެވެ.
ކައުންސިލްތަކުގެ އިހުތިސާސްގެ ތެރޭގައި ހިމެނޭ ބިންތައް ސަރުކާރަށް ނެގޭގޮތަށް ލާމަރުކަޒީ ގާނޫނަށް އިސްލާހު ގެންނަން މަޖިލީހަށް ބިލެއް ހުށަހެޅުއްވީ ތުޅާދޫ ދާއިރާގެ މެންބަރު، އަބްދުލްހަންނާނު އަބޫބަކުރު އެވެ. އޭނާއަކީ މިނިވަން މެންބަރެއް ނަމަވެސް މަސައްކަތް ކުރައްވަމުން ގެންދަވަނީ ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އާ އެކީގަ އެވެ.
އޭނާ ހުށަހެޅުއްވި ބިލުގައި ވަނީ ސަރުކާރުގެ މަޝްރޫއުތައް ހިންގުމަށް ޓަކައި ކައުންސިލެއްގެ އިހުތަސާސްގެ ތެރޭގައި ހިމެނޭ ބިމެއް ނުވަތަ ތަނެއް ވަކިކުރުމަށް ވަޒީރުންގެ މަޖިލީހުން ނިންމުމަށް ފަހު، ކައުންސިލުގެ މިލްކިއްޔާތުން އެ ތަނެއް ވަކިވާނެ ކަމަށެވެ. އަދި، އެ ތަނަކީ ދައުލަތުގެ ފުރިހަމަ ބާރު ހިނގާ ބިމާއި ތަންތަނަށް ވެގެން ދާނެ އެވެ.
ހަމަ އެހެންމެ، ރަށްރަށުގެ ފިޒިކަލް ޑިވެލޮޕްމަންޓު ޕްލޭން ފާސްކުރުމުގެ ކުރިން ވެސް ސަރުކާރުން ތަރައްގީގެ މަޝްރޫއުއެއް ހިންގަން ބިމެއް ހޯދަން އެދޭ ހާލަތްތަކުގައި އެ ބިން ސަރުކާރާ ހަވާލުކުރަން ޖެހެ އެވެ.
މިއަދުގެ ޖަލްސާގައި ވާހަކަ ދައްކަވަމުން މައުރޫފް ވިދާޅުވީ، ހަންނާން ލައްވައި ބިލު ހުށަހެޅުމުގެ ފަހަތުގައި އޮތީ ސަރުކާރު ކަމަށެވެ. އަދި އެއީ ކައުންސިލްތަކުގެ ބާރު ކަނޑުވާލައި، ލާމަރުކަޒީ ނިޒާމު ފުނޑުފުނޑުކޮށްލުމަށް ސަރުކާރުން ކުރާ މަސައްކަތުގެ ތެރެއިން ހީލަތްތެރިކަމާއެކު ކުރާ ކަމެއް ކަމަށެވެ.
"އަޅުގަނޑު މި ދަންނަވަނީ މިނިވަން މެންބަރަކު ލައްވައި ސަރުކާރުން ގަސްދުގައި މުޅި ލާމަރުކަޒީ ނިޒާމު މިހައިހިސާބަށް ވެސް މި ސަރުކާރު އައިއްސުރެ ފުނޑާލުމަށްޓަކައި ކުރަމުންދާ މަސައްކަތުގެ ތެރެއިން އަނެއްކާ ވެސް ހަމައެކަނި ކައުންސިލްތަކަށް ލިބިފައި އޮތް ބާރު ފުނޑުފުނޑު ކޮށްލުމަށްޓަކައި ލާމަރުކަޒީ ނިޒާމަށް ގެންނަ ބަދަލެކޭ،" މައުރޫފް ވިދާޅުވި އެވެ.
ހަންނާން ހުށަހެޅުއްވި އިސްލާހު ފާސްވުމަށްފަހު، ރަށްރަށުގެ ކައުންސިލްތަކަށް ހަމައެކަނި އޮންނާނީ ވިހާމަރުވާ ބެލެހެއްޓުން ކަމަށް އޭނާ ވިދާޅުވި އެވެ.
