ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމްކޮށްގެން، ކުރިއަށްގެންދިޔަ ރާއްޖެ ސުޕަ ލީގު ވޮލީބޯޅަ މުބާރާތުގައި ކުޅުނު ހުރިހާ މެޗަކުން މޮޅުވެ، ސައްތަ އިން ސައްތަ ރެކޯޑަކާ އެކު، ވ. ފެލިދޫން މުބާރާތުގެ ޗެމްޕިއަންކަން ހޯދައިފި އެވެ.
ޖުމްލަ ހަތް ޓީމު (ހަތް ރަށް) ވާދަކުރި ރާއްޖެ ސުޕަ ލީގު ވޮލީބޯޅަ މުބާރާތުގައި ފެލިދޫން ކުޅުނު ފަސް މެޗުން ވެސް ވަނީ މޮޅުވެފަ އެވެ. ޒުވާނުންގެ މަރުކަަޒު އެތެެރެ ކޯޓުގައި ރޭ ކުޅުނު ފައިނަލުގައި ފެލިދޫއާ ދެކޮޅަށް ނުކުތީ ބ. ގޮއިދޫ އެވެ. ފައިނަލާ ހަމައަށް އައިއިރު، ގޮއިދޫން ވެސް ވަނީ ކުޅުނު ހުރިހާ މެޗަކުން މޮޅުވެފަ އެވެ. އެކަމަކު، ފައިނަލުގައި ފެލިދޫ ވަނީ ސީދާ ތިން ސެޓުން ގޮއިދޫ ބަލިކޮށްފަ އެވެ.
ގައުމީ ވޮލީ ޓީމުގެ ގިނަ ކުޅުންތެރިންތަކެއް ނިސްބަތްވާ ފެލިދޫން ތަފާތު ރޫހެއްގައި މުޅި މުބާެރާތުގައި ކުޅުނުއިރު، އެ ޓީމުގެ ކޯޗަކަށް ހުރީ ގައުމީ ވޮލީބޯޅަ ޓީމުގެ ކުރީގެ ކޯޗު މުހައްމަދު ޝަރަފް އެވެ.
ގައުމީ ވޮލީ ޓީމުގެ ކެޕްޓަންކަން ކޮށްފައިވާ، އަލީ ހުޒާމް (ހުޒަންޓެ) އާއި އާދަމް ފައިރޫޒް ވެސް ކުޅުނު ފެލިދޫ ޓީމުގައި ގައުމީ ޓީމުގެ ސެޓަރަކަށް ކުޅެފައިވާ ހުސެއިން ވިޝާމް (ބުޅިކެ)ގެ އިތުރުން އެޓޭކަރު، ހަސަން ނިލާމް (ޕާޓޭ) ވެސް ހިމެނެ އެވެ. އަދި، ބިދޭސީ ކުޅުންތެރިއަކަށް ކުޅެނީ، ޕާކިސްތާން ގައުމީ ޓީމުގެ މުރާދު ޖީހާން އެވެ. އޭނާ ވަނީ ރާއްޖޭގެ ގިނަ މުބާރާތްތަކެއް ކުޅެފަ އެވެ.
ފެލިދޫން ގޮއިދޫ ބަލިކުރިއިރު، ސެޓުތައް ގެންދިޔައީ، 25-21، 25-16، 25-23 އިންނެވެ.
މުބާރާތުގެ ޑްރީމް ޓީމުަގައި ހިމެނެނީ، ފެލިދޫގެ ހުޒަންޓެ، ބުޅިކެ، ޕާޓޭ، އަހުމަދު ނަބީލް، ގޮއިދޫގެ ޝަމާއިލް ހުސެއިން، މުހައްމަދު ލަތުފާން އަލީ، އިބްރާހިމް ފަޒީލް އެވެ. މުބާރާތުގެ މޮޅު ކޯޗަކީ ފެލިދޫގެ ކޯޗު، ޝަރަފް އެެވެ. އެންމެ އުންމީދީ ކުޅުންތެރިއަކީ، މާފުށީގެ ޔައީޝް ރިއްފަތު ހަމީދު އެވެ. އެންމެ މޮޅު ބިދޭސީ ކުޅުންތެރިއަކީ، ފެލިދޫގެ މުރާދު ޖީހާން އެވެ. މުބާެރާތުގެ އެންމެ މޮޅު ކުޅުންތެރިއަކީ ފެލިދޫގެ ޕާޓޭ އެވެ.
އިއްޔެ ހަވީރު ކުޅުނު މުބާރާތުގެ ތިން ވަނަ ހޮވި މެޗުގައި، ތ. ހިރިލަންދޫން ވަނީ ސީދާ ތިން ސެޓުން ލ. ފޮނަދޫ ބަލިކޮށްފަ އެެވެ.
