ރާއްޖެ ސުޕަ ލީގު: ފެލިދޫ، ފޮނަދޫ އަދި ގޮއިދޫ ފެށީ މޮޅަކުން

ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމްކުރާ ރާއްޖެ ސުޕަ ލީގު ވޮލީބޯޅަ މުބާރާތުގެ ފުރަތަމަ މެޗުތަކުން ވ. ފެލިދޫ، ލ. ފޮނަދޫ އަދި ބ. ގޮއިދޫ މޮޅުވެއްޖެ އެވެ. 

ޖުމްލަ ހަތް ރަށުން ވާދަކުރާ ފިރިހެން ވޮލީބޯޅައިގެ މި މުބާރާތް ކުރިއަށްދަނީ، ޒުވާނުންގެ މަރުކަޒު އެތެރެ ކޯޓުގަ އެވެ. ގްރޫޕް އޭގައި ވާދަކުރަނީ، ހދ. ހަނިމާދޫ، ވ. ފެލިދޫ، ލ. ފޮނަދޫ އަދި ކ. މާފުށި އެވެ. ގްރޫޕް ބީގައި ހިމެނެނީ ތ. ހިރިލަންދޫ، ބ. ގޮއިދޫ އަދި ލ. ތުލުސްދޫ އެވެ.

އިއްޔެގެ ފުރަތަމަ މެޗުގައި، ފެލިދޫން ވަނީ 3-1 ސެޓުން ހަނިމާދޫ ބަލިކޮށްފަ އެވެ. މި މެޗުގެ ފުރަތަމަ ސެޓު ގެންދިޔައީ ގައުމީ ޓީމުގެ ގިނަ ކުޅުންތެރިން ހިމެނޭ ފެލިދޫންނެވެ. އެއީ، 25-21 އިންނެވެ. ދެ ވަނަ ސެޓު ފޯރިގަދަކޮށް ދިޔައިރު، ހަނިމާދޫން 25-27 އިން ގެންގޮސް އެއްވަރުކުރި އެވެ. އެކަމަކު، ފެލިދޫ ޓީމަށް ކުޅޭ ޕާކިސްތާންގެ ކުޅުންތެރިޔާ، މުރާދު ޖީހާންގެ މޮޅު ކުޅުމާ އެކު، ފަހު ދެ ސެޓު 25-22 އާއި 25-17 އިން ގެންގޮސް ފެލިދޫ މޮޅުވީ އެވެ. 

މި ގްރޫޕްގެ ދެ ވަނަ މެޗުގައި، ފޮނަދޫން މާފުށި ބަލިކުރީ ސީދާ ތިން ސެޓުންނެވެ. ފޮނަދޫން މެޗުގެ ސެޓުތައް ގެންދިޔައީ، 25-20، 25-18 އަދި 25-18 އިންނެވެ. 

ތިން ޓީމު ހިމެނޭ ގްރޫޕް ބީގައި ރޭ ފެނިގެންދިޔައީ ފޯރިގަދަ ކުރިމަތިލުމެކެވެ. ގޮއިދޫން ހިރިލަންދޫގެ މައްޗަށް ކުރިހޯދީ 3-2 ސެޓުންނެވެ. ގޮއިދޫން މެޗުގެ ފުރަތަމަ ސެޓު، 25-22 އިން ގެންދިޔައިރު، ހިރިލަންދޫން ވަނީ ދެން ކުޅުނު ސެޓު، 17-25 އިން ގެންގޮސް އެއްވަރުކޮށްފަ އެވެ. އަނެއްކާ ވެސް ތިން ވަނަ ސެޓުގައި ގޮއިދޫން ކުޅުން ރަނގަޅުކޮށް 25-22 އިން މި ސެޓު ގެންދިޔަ އެވެ. ހަތަރު ވަނަ ސެޓުގައި ހިރިލަންދޫން ވަރުގަދަ ރޫހެއްގައި ކުޅެ، 25-14 އިން ސެޓު ގެންދިޔަ އެވެ. ނަތީޖާ ނެރެން ފަސް ވަނަ ސެޓެއް ކުޅެން ޖެހުނުއިރު، ގޮއިދޫން 15-13 އިން މި ސެޓު ގެންގޮސް މެޗުން މޮޅުވީ އެވެ. 

މުބާާރާތުގައި މިއަދު ހަވީރު ކުޅޭ މެޗުގައި ހަނިމާދޫން ކުޅެނީ ފޮނަދޫއާ އެވެ. އަދި، މިރޭ، ގޮއިދޫން ތުލުސްދޫއާ ވާދަކުރާނެ އެވެ. 

ތަފާތު އެކި ސަބަބުތަކާ ހެދި ލަސްކުރަން ޖެހުނު މި މުބާރާތުގެ ފޯމެޓް އޮތް ގޮތުން، ގްރޫޕް ސްޓޭޖަށް ފަހު، ހޮނިހިރު ދުވަހު ކުޅޭނީ ސެމީ ފައިނަލް ދެ މެޗެވެ. އެއީ، ދެ ގްރޫޕުން އެންމެ ރަނގަޅު ނަތީޖާ ނެރޭ ހަތަރު ޓީމެެއްގެ މެދުގަ އެވެ. އަދި، ސެމީ ދެ މެޗުން މޮޅުވާ ދެ ޓީމު ކުޅޭ ފައިނަލާއި ދެ ސެމީން ބަލިވާ ދެ ޓީމު ކުޅޭ ތިން ވަނަ ހޮވާ މެޗު އޮންނާނީ އާދިއްތަ ދުވަހު އެވެ.