ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން މިހާރު ކުރިއަށްގެންދާ ރާއްޖެ ސުޕަ ލީގު ވޮލީބޯޅަ މުބާރާތުގައި ރޭ ކުޅުނު މެޗުތަކުން މޮޅުވެ، ސެމީ ފައިނަލުގެ ފަހު ދެ ޖާގަ ވ. ފެލިދޫ އާއި ތ. ހިރިލަންދޫން ހޯދައިފި އެވެ.
ޖުމްލަ ހަތް ރަށުން ވާދަކުރާ ފިރިހެން ވޮލީބޯޅައިގެ މި މުބާރާތް ކުރިއަށްދަނީ، ޒުވާނުންގެ މަރުކަޒު އެތެރެ ކޯޓުގަ އެވެ. ގްރޫޕް އޭގައި ވާދަކުރަނީ، ހދ. ހަނިމާދޫ، ވ. ފެލިދޫ، ލ. ފޮނަދޫ އަދި ކ. މާފުށި އެވެ. ގްރޫޕް ބީގައި ހިމެނެނީ ތ. ހިރިލަންދޫ، ބ. ގޮއިދޫ އަދި ލ. ތުލުސްދޫ އެވެ.
އިއްޔެ އާއި ރޭގެ މެޗުތަކާ ހަމައަށް އައިއިރު، ލ. ފޮނަދޫ އާއި ބ. ގޮއިދޫން ވަނީ ސެމީ ފައިނަލަށް ދަތުރުކޮށްފަ އެވެ. އެންމެ ފަހުން ކުޅުނު މެޗުތަކުން މޮޅުވެ، ފެލިދޫ އާއި ހިރިލަންދޫ ސެމީގެ ފަހު ޖާގަތައް ހޯދީ އެވެ.
އެ ގޮތުން، އިއްޔެ ހަވީރު ކުޅެފައިވަނީ މާފުށްޓާއި ފެލިދޫ އެވެ. މި މެޗު ފަސޭހަކަމާ އެކު ފެލިދޫން ވަނީ ކާމިޔާބުކޮށްފަ އެވެ. ގައުމީ ވޮލީބޯޅަ ޓީމުގެ ގިނަ ކުޅުންތެރިންތަކެއް ނިސްބަތްވާ ފެލިދޫން މި މެޗު ކާމިޔާބުކުރީ ސީދާ ތިން ސެޓުންނެވެ. ޕާކިސްތާންގެ މުރާދު ޖީހާންގެ މޮޅު ކުޅުމާ އެކު، ފެލިދޫން ސެޓުތައް ގެންދިޔައީ، 25-18، 25-11 އަދި 25-19 އިންނެވެ.
ގްރޫޕް ބީގެ ފަހު މެޗުގައި ތުލުސްދޫ އާއި ހިިރިލަންދޫ ބައްދަލުކުރިއިރު، މި ދެ ޓީމު ވެސް ފުރަތަމަ މެޗުން ވަނީ ގޮއިދޫ އަތުން ބަލިވެފަ އެވެ. އެހެންވެ، ގްރޫޕްގެ ދެ ވަނަ ޓީމުގެ ގޮތުގައި ސެމީ ފައިނަލަށް ދިއުމަށްޓަކައި، ރޭގެ މެޗުން މޮޅުވުން އޮތީ ދެ ޓީމަށް ވެސް މަޖުބޫރުވެފަ އެވެ.
ވޮލީބޯޅަަ އަށް މަޝްހޫރު ރަށެއް ކަމަށްވާ ހިރިލަންދޫން މި މެޗު ކާމިޔާބުކުރީ ސީދާ ތިން ސެޓުންނެވެ. އެ ގޮތުން، ހިރިލަންދޫން ފުރަތަމަ ދެ ސެޓު، 25-19، 25-19 އިން ގެންގޮސް ހަމަޖެހިލި ނަމަވެސް، ތިން ވަނަ ސެޓުގައި، ތުލުސްދޫން ކުޅުން ރަނގަޅުކުރި އެވެ. އެހެން ނަމަވެސް، ސެޓުގެ ފަހުކޮޅުގައި ހިރިލަންދޫން މުޅި މެޗުގައި ދެމެހެއްޓި ރަނގަޅު ފޯމާ އެކު، 25-23 އިން ސެޓު ގެންގޮސް މެޗުން މޮޅުވީ އެވެ.
މިހާރު އޮތްގޮތުން، ގްރޫޕް އޭގެ މަގާމުތައް ކަނޑައެޅޭނީ މިއަދާއި މިރޭގެ މެޗުތަކަށް ފަހު އެވެ. ހަވީރު ކުޅޭ މެޗުގައި ބައްދަލުކުރާނީ މުބާރާތުން ކަޓާފައިވާ ހަނިމާދޫ އާއި މާފުށްޓެވެ. އަދި، މިރޭ ގްރޫޕް އޭގެ އެއް ވަނަ ކަނޑައަޅާ މެޗުގައި ފެލިދޫ އާއި ފޮނަދޫ ބައްދަލުކުރާނެ އެވެ.
ގްރޫޕް ބީގެ އެއް ވަނަ ލިބުނީ ގޮއިދޫ އަށެވެ. އަދި، ދެ ވަނަ ހޯދީ ހިރިލަންދޫންނެވެ.
ރާއްޖެ ސުޕަ ލީގު ވޮލީބޯޅަ މުބާރާތުގެ ފޯމެޓް އޮތް ގޮތުން، ގްރޫޕް ސްޓޭޖަށް ފަހު، ހޮނިހިރު ދުވަހު ކުޅޭނީ ސެމީ ފައިނަލް ދެ މެޗެވެ. އެއީ، ދެ ގްރޫޕުން އެންމެ ރަނގަޅު ނަތީޖާ ނެރޭ ހަތަރު ޓީމެެއްގެ މެދުގަ އެވެ. ސެމީގެ ފުރަތަމަ މެޗުގައި ގްރޫޕް އޭގެ އެއް ވަނަ ކުޅޭނީ ހިރިލަންދޫއާ އެވެ. އަދި، ސެމީގެ ދެ ވަނަ މެޗުގައި ގޮއިދޫން ކުޅޭނީ ގްރޫޕް ބީގެ ދެ ވަނައާ އެވެ.
ސެމީ ދެ މެޗުން މޮޅުވާ ދެ ޓީމު ކުޅޭ ފައިނަލާއި ދެ ސެމީން ބަލިވާ ދެ ޓީމު ކުޅޭ ތިން ވަނަ ހޮވާ މެޗު އޮންނާނީ އާދިއްތަ ދުވަހު އެވެ.
