ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމްކޮށްގެން، މިހާރު ކުރިއަށްދާ ރާއްޖެ ސުޕަ ލީގު ވޮލީބޯޅަ މުބާރާތުގައި މިއަދު ކުޅުނު ސެމީ ފައިނަލު މެޗުތަކުން މޮޅުވެ، ވ. ފެލިދޫ އާއި ބ. ގޮއިދޫން މުބާރާތުގެ ފައިނަލަށް ދަތުރުކޮށްފި އެވެ.
ޖުމްލަ އެކު، ހަތް ރަށުން ވާދަކުރި މި މުބާރާތުގެ ފައިނަލަށް ގޮއިދޫ އާއި ފެލިދޫ ދަތުުރުކުރީ ކުޅުނު ހުރިހާ މެޗަކުން މޮޅުވެގެންނެވެ. އެ ގޮތުން، ފެލިދޫން ހަތަރު ޓީމު ހިމެނޭ ގްރޫޕްގެ ތިން މެޗާއި ސެމީ ފައިނަލުން ވަނީ މޮޅުވެފަ އެވެ. އަދި، ގޮއިދޫން ތިން ޓީމު ހިމެނުނު ގްރޫޕްގެ ދެ މެޗާއި ސެމީ ފައިނަލް މެޗުން ވަނީ މޮޅުވެފަ އެވެ.
ޒުވާނުންގެ މަރުކަޒު އެެތެރެ ކޯޓުގައި ކުރިއަށްދާ މި މުބާރާތުގައި މިއަދު ހަވީރު ކުޅުނު ސެމީ ފައިނަލް ފުރަތަމަ މެޗުގައި، ތ. ހިރިލަންދޫ އަތުން ފެލިދޫ މޮޅުވީ ސީދާ ތިން ސެޓުންނެވެ. ހިރިލަންދޫން ސެމީ އަށް އައީ، ތިން ޓީމު ހިމެނުނު ގްރޫޕްގެ ދެ ވަނަ ޓީމުގެ ގޮތުގަ އެވެ. މިރޭ ކުޅުނު ސެމީ ފައިނަލުގައި ކުޅުނީ ހަތަރު ޓީމު ހިމެނުނު ގްރޫޕްގެ ދެ ވަނަ ހޯދި، ލ. ފޮނަދޫ އާއި ގޮއިދޫ އެވެ. ގޮއިދޫން މި މެޗު ކާމިޔާބުކުރީ ސީދާ ތިން ސެޓުންނެވެ.
ގައުމީ ވޮލީ ޓީމުގެ ގިނަ ކުޅުންތެރިންތަކެއް ނިސްބަތްވާ ފެލިދޫން ތަފާތު ފޯމެއްގައި މި ފަހަރުގެ މުބާރާތުގައި ކުޅެމުން އަންނައިރު، އެ ޓީމުގެ ކޯޗަކަށް ހުރީ ގައުމީ ވޮލީބޯޅަ ޓީމުގެ ކުރީގެ ކޯޗު މުހައްމަދު ޝަރަފް އެވެ. ގައުމީ ވޮލީ ޓީމުގެ ކެޕްޓަންކަން ކޮށްފައިވާ، އަލީ ހުޒާމް (ހުޒަންޓެ) އާއި އާދަމް ފައިރޫޒް ވެސް ކުޅެމުން އަންނަ ފެލިދޫގައި ގައުމީ ޓީމުގެ ސެޓަރަކަށް ކުޅުނު ހުސެއިން ވިޝާމް (ބުޅިކެ)ގެ އިތުރުން އެޓޭކަރު، ހަސަން ނިލާމް (ޕާޓޭ) ވެސް ހިމެނެ އެވެ. އަދި، ބިދޭސީ ކުޅުންތެރިއަކަށް ކުޅެނީ، ޕާކިސްތާން ގައުމީ ޓީމުގެ މުރާދު ޖީހާން އެވެ. އޭނާ ވަނީ ރާއްޖޭގެ ގިނަ މުބާރާތްތަކެއް ކުޅެފަ އެވެ.
ހިރިލަންދޫ އަތުން ފެލިދޫ މޮޅުވިއިރު، ސެޓުތައް ގެންދިޔައީ، 25-20، 25-23 އަދި 25-19 އިންނެވެ.
ސްރީ ލަންކާގެ ކޯޗު، ޖަޔަސޭކަރަ ޗަންނަގެ އިރުޝާދުގެ ދަށުން ކުޅެމުން އަންނަ، ގޮއިދޫން ވެސް ހިތްވަރު ގަދަ ކުޅުމެއް ދައްކަމުން އަންނައިރު، ގައުމީ ޓީމުގެ ޒުވާން ތަރި، ޝަމާއިލް ހުސެއިން އަންނަނީ އެ ޓީމުގައި ރަނގަޅު ކުޅުމެއް ދައްކަމުންނެވެ.
ކުޅިވަރުގެ ރަށެއްގެ ގޮތުަގައި މަޝްހޫރު ގޮއިދޫ ޓީމުގައި ތަޖުރިބާކާރު ކުޅުންތެރިންނާއި ގައުމީ ލެވަލްގައި ކުޅޭ ގިނަ ކުޅުންތެރިން ހިމެނޭއިރު، ސެމީ ފައިނަލުގައި މިރޭ ފޮނަދޫ އަތުން ސީދާ ތިން ސެޓުން ކުރިހޯދި އެވެ. މެޗުގެ ސެޓުތައް ގެންދިޔައީ، 25-23، 26-24 އަދި 25-23 އިންނެވެ.
މުބާރާތުގެ ތިން ވަނަ ހޮވާ މެޗުގައި މާދަމާ ހަވީރު ހިރިލަންދޫ އާއި ފޮނަދޫން ބައްދަލުކުރާނެ އެވެ. އަދި، މާދަމާރޭ ކުޅޭ ފައިނަލުގައި، ފެލިދޫ އާއި ގޮއިދޫގެ ފޯރިގަދަ ކުރިމަތިލުމެއް ފެނިގެންދާނެ އެވެ.
