ބުޑަޕެސްޓް، ހަންގޭރީ (އޮގަސްޓް 9) - ހިލޭ ޓްރާންސްފާއެއްގައި ރެއާލް މެޑްރިޑަށް ސޮއިކުރި ޕޯޗުގީސް މިޑްފީލްޑަރު، ބެނާޑޯ ސިލްވާ، ޗުއްޓީ ތެރޭގައި ފިޓްނަސް އަށް މަސައްކަތްކޮށްފައިނުވާ ކަމަށް ރެއާލްގެ ކޯޗު ހޯސޭ މޮރީނިއޯ ބުނެފި އެވެ.
ކުރިން ބެންފީކާ އާއި މޮނާކޯ އަށް ކުޅުނު، އުމުރުން 31 އަހަރުގެ ބެނާޑޯ ސިލްވާ، މެންޗެސްޓާ ސިޓީ ދޫކޮށްލީ ނުވަ އަހަރު އެ ޓީމަށް ކުޅެދިނުމަށް ފަހު އެވެ. އެމެރިކާ، މެކްސިކޯ އަދި ކެނަޑާގައި ޖޫން/ޖުލައި މަހު ބޭއްވި ފީފާ ވޯލްޑް ކަޕްގައި ޕޯޗުގަލް އިން ކުޅުނު ހަތަރު މެޗުގެ ތެރެއިން ބެނާޑޯ ސިލްވާ ފުރަތަމަ އެގާރައިގައި ހިމެނިގެން ކުޅެފައިވަނީ އެންމެ މެޗެކެވެ.
ޕްރީ ސީޒަންގައި ރެއާލުން ފެރެންޗްވަރޯސްއާ ދެކޮޅަށް ކުޅެ، 2-1 އިން މޮޅުވި މެޗުގައި ބެނާޑޯ ސިލްވާ ކުޅެން އެރީ ދެ ވަނަ ހާފުގައި ބަދަލު ކުޅުންތެރިއެއްގެ ގޮތުގަ އެވެ. އެކަމަކު، ރެއާލުން ކުޅެމުންދިޔަ ސްޕީޑާ އެއްވަރަށް ކުޅުން ހިފަަހައްޓަން އުނދަގޫވުމުން، މެޗަށް ފަހު އޮތް ނޫސްވެރިންގެ ބައްދަލުވުމުގައި މޮރީނިއޯއާ ވަނީ އެކަމާ ބެހޭގޮތުން ސުވާލުކޮށްފަ އެވެ.
"އޭނަ (ބެނާޑޯ ސިލްވާ) އަކީ ވަރަށް މުހިންމު ކުޅުންތެރިއެއް. އެކަމަކު، މިއީ ވަރަށް ބަދުނަސީބު ވަގުތެއް އޭނަ އަށް. އެއީ، ޗުއްޓީގައި މެންޓަލީ ރަނގަޅަށް ހުރެ ހަމަޖެހިލިޔަސް، ފިޒިކަލީ މާ ބޮޑު މަސައްކަތެއް ކޮށްފައެއް ނެތް. އޭނަ ޕްރީ ސީޒަނަށް އައީ އެހެން ކުޅުންތެރިންނާ ބަލާއިރު ދަށް ލެވަލެއްގައި،" މޮރީނިއޯ ބުންޏެވެ.
"ޔަގީންކަމެއް، އޭނަ ރަނގަޅުކުރަން އެބަޖެހޭ. އޭނަ އަކީ ޕްރޮފެޝަނަލެއް. ކުރަން ޖެހޭ ކަންކަން ވަރަށް ރަނގަޅަށް އެނގޭ ވަރުގެ ތަފާތު ކުޅުންތެރިއެއް،"
ސިޓީން 2017 ވަނަ އަހަރު ބެނާޑޯ ސިލްވާގެ ސޮއި ހޯދީ މޮނާކޯ އަށް 55 މިލިއަން ޑޮލަރުގެ ފީއެއް ދައްކައިފަ އެވެ. ކްލަބް ލެވަލްގައި ހޯދޭނެ ބޮޑު ހުރިހާ ކާމިޔާބެއް ބެނާޑޯ ސިލްވާ ވަނީ މެންޗެސްޓާ ސިޓީގައި ހުރެ ހޯދައިފަ އެވެ. ރެއާލަށް ބަދަލުވުމަކީ، ކެރިއަރުގައި ތަފާތު ޗެލެންޖެއް ނެގުަމަށް ކުރި ކަމެއް ކަމަށް ބެނާޑޯ ސިލްވާ ވަނީ ބުނެފަ އެވެ.
ރެއާލާ އެކު ބެނާޑޯ ސިލްވާ ސޮއިކޮށްފައިވާ އެގްރީމަންޓް އޮތީ 2028 ވަނަ އަހަރުގެ ޖޫން މަހުގެ ނިޔަލަށެވެ. އެކަމަކު، ރެއާލްގައި ހޭދަކުރާ ދެ އަހަރުގެ ތެރޭގައި، ބެނާޑޯ ސިލްވާ، އެ ކްލަބްގައި ހުރެ ހާސިލްކުރާ ކަންކަމަށް ބަލާފައި، ރެއާލްގެ މެނޭޖްމަންޓުން އެދޭނަމަ، ތިން ވަނަ ސީޒަނަކަށް އެ ޓީމާ އެކު ކުރިއަށްދިއުމުގެ ފުރުސަތު މިހާރު އޮތް ކޮންޓްރެކްޓް ތެރެއިން ލިބިދެ އެވެ.
