މެޑްރިޑް (އޮގަސްޓް 3) - ރެއާލް މެޑްރިޑްގެ ބްރެޒިލް ފޯވާޑް، ވިނީޝިއުސް ޖޫނިއާގެ އޭޖެންޓެއްގެ ގޮތުގައި، އޭނާ ތަމްސީލްކުރަމުން އަންނަ އޭޖެންސީ، ރޮކް ނޭޝަން ސްޕޯޓްސް އިންޓަނޭޝަނަލް އިން މީޑިއާ އަށް ފާޑުކިޔައިފި އެވެ.
އެ ގޮތުން، ރޮކް ނޭޝަން ސްޕޯޓްސް އިންޓަނޭޝަނަލް އިން މީޑިއާތަކާ މެދު ހިތްހަަމަނުޖެހުން ފާޅުކޮށްފައި މި ވަނީ، އުމުރުން 26 އަހަރުގެ ވިނީޝިއުސްގެ މުސްތަގުބަލާ ގުޅޭގޮތުން، މީޑިއާގައި ގިނަ ގޮތްގޮތަށް ވާހަކަތައް ފެތުރެމުންދިޔަ ދަނޑިވަޅެއްގަ އެވެ.
ރޮކް ނޭޝަންސް ސްޕޯޓްސް އިންޓަނޭޝަނަލްގެ ރައީސް، މައިކަލް ޔޯމާކް، އޭނާގެ އިންސްޓަގްރާމްގައި ލިޔެފައިވާ ގޮތުގައި، މީޑިއާތަކުގައި ހަގީގަތާ ހިލާފަށް ފޭކު ވާހަކަތަކެއް ހިމަނަމުން އައުމަކީ އެއް ގޮތަކަށް ވެސް ބަލައިގަނެވޭނެ ކަމެއް ނޫން ކަމަށެވެ. އަދި، މީހުންގެ ސަމާލުކަން ހޯދުމަށްޓަކައި ކަމުގައި ވިޔަސް، ކަމުގެ އަސްލު ގެއްލުވާލައި، އޭގެ ގެއްލުން މީހުންނަށް ކުރިމަތިވާނެ ފަދަ ގޮތްގޮތަށް ހަބަރުތައް ފެތުރުމަކީ، ކުޅިވަރު ކުޅުންތެރިން ތަމްސީލްކުރުމުގައި ޕްރޮފެޝަނަލް މިންގަނޑު ހިފަހައްޓާ ފަރާތްތަކަށް ވަރަށް ގެއްލުންތައް ކުރިމަތިވާ ކަމެއް ކަމަށް ޔޯމާކް ވަނީ ފާހަގަކޮށްފަ އެވެ.
"މީޑިއާތަކާއި ނޫސްވެރިން ޒިންމާދާރުވާންޖެހޭ. ޖަވާބުދާރީވާން ޖެހޭ ކަންކަން މި ހުންނަނީ،" ޔޯމާކް ލިޔެފައިވެ އެެވެ.
ރޮކް ނޭޝަންސް ސްޕޯޓްސް އިންޓަނޭޝަނަލް އިން މި ގޮތަށް މީޑިއާ އަށް ފާޑުކިޔާފައިވާ ސީދާ ސަބަބެއް، ޔޯމާކް ހިމަނާފައިނުވި ނަމަވެސް، ރިޕޯޓްތައް ބުނާގޮތުގައި، މިއީ ވިނީޝިއުސްއާ ގުޅޭގޮތުން މީޑިއާގައި ދެކެވޭ ވާހަކަތަކާ ގުޅިގެން ފާޅުކުރި ޝުއޫރުތަކެކެވެ.
ރެއާލްގެ ކޮންޓްރެކްޓް އާ ކުރަން ވިނީޝިއުސްއާ އެކު ކުރިއަށްދާ މަޝްވަރާތަކުގައި ކުރިއެރުމެއް ނުލިބި ދުވަސްތައް ހިނގަމުން އަންނަތާ ގިނަ ދުވަސްތަކެއް ވަނީ ވެފަ އެވެ. އެއާ އެކު، ގިނަ ކްލަބްތަކަކުން އަންނަނީ ވީނީޝިއުސްގެ ސޮއި ހޯދުމަށްޓަކައި، އޭނާ އަށް އޮފާތަކެއް ހުށަަހަޅަމުންނެވެ.
އިނގިރޭސި ދެ މީިޑިއާއެއް ކަމަށްވާ، ދި އެތުލެޓިކް އާއި ދި ޓެލެގްރާފް އިން ރިޕޯޓްކުރާ ގޮުތުގައި ވިނީޝިއުސް ގެންނަން މިހާރު އެންމެ ބުރަކޮށް މަސައްކަތްކުރަނީ އާސެނަލުންނެވެ. އެ ގޮތުން، އާސެނަލުން، ވިނީޝިއުސްގެ ސޮއި ހޯދަން، ބޮޑު މުސާރައެއް ދޭން ވަނީ ތައްޔާރުވެފަ އެވެ.
ވިނީޝިއުސް މި ވަގުތު ރެއާލުގެ ކޮންޓްރެކްޓްގައި ހުރީ އަންނަ އަހަރުގެ ޖޫންގެ ނިޔަލަށެވެ. އޭނާ، ރެއާލްގެ ކޮންޓްރެކްޓް އާ ކުރަން ޑިމާންޑްކުރާ ވަަރުގެ މުސާރައަކާއި އިމޭޖް ރައިޓްސްގެ ޕަސެންޓެއް ދޭން ރެއާލުން ދެކޮޅެވެ.
ސްޕެއިނުގެ ނޫސްތަކުން ރިޕޯޓްކުރާ ގޮތުގައި، ރެއާލުން ވަނީ، ކުރިއަށް އޮތް 10 ދުވަސްތެރޭ، ވިނީޝިއުސް އަށް މުސްތަގުބަލާ ގުޅޭގޮތުން، ގޮތެއް ނިންމަން ފުރުސަތު ދީފަ އެވެ.
ރެއާލުން 2017 ވަނަ އަހަރު ވިނީޝިއުސް ގަތީ ފްލަމެންގޯ އަށް 50 މިލިއަން ޑޮލަރު ދައްކައިފަ އެވެ. ދާދި ފަހުން، ވިނީޝިއުސް ވަނީ ދަތްދޮޅީގެ ސާޖަރީއެއް ކުރިއަށްގެންގޮސްފަ އެވެ.
