މެޑްރިޑް (އޮގަސްޓް 7) - އެންމެ އަގުބޮޑު އެފްރިކާ ކުޅުންތެރިޔާގެ ގޮތުގައި، އައިވަރީ ކޯސްޓްގެ ވިންގް، ޔަން ޑިއޮމަންޑޭ، ސްޕެއިނުގެ ގަދަބާރު ރެއާލް މެޑްރިޑަށް ސޮއިކޮށްފި އެވެ.
އުމުރުން 19 އަހަރުގެ ޑިއޮމަންޑޭ ގަންނަން އާރްބީ ލައިޕްޒިގަށް ރެއާލުން ދައްކާ ފީ ޖުމްލަ އެކު، 144 މިލިއަން ޑޮލަރަށް އެރުމުގެ ފުރުސަތު އެބައޮތެވެ. މީގެ ކުރިން، އެންމެ އަގުބޮޑު ފީ އަކަށް ކްލަބް ބަދަލުކުރި އެފްރިކާގެ ކުޅުންތެރިއަކީ، 2019 ވަނަ އަހަރު ފްރާންސްގެ ލިލް ދޫކޮށް، އާސެނަލަށް ބަދަލުވި އައިވަރީ ކޯސްޓުގެ ނިކޮލަސް ޕެޕޭ އެވެ. އާސެނަލުން އެ ފަހަރު 92 މިލިއަން ޑޮލަރު ލިލް އަށް ދެއްކި އެވެ.
ރެއާލުން މިހާތަނަށް ކުޅުންތެރިއެއްގެ ޓްރާންސްފާ ފީ އަކަށް އެންމެ ބޮޑު ހޭދައެއް ކުރީ، 2023 ވަނަ އަހަރު އިނގިރޭސި މިޑްފީލްޑަރު، ޖޫޑް ބެލިންހަމް ގެނައުމަށެވެ. އެ ފަހަރު ރެއާލުން ދެއްކި ފީ ޖުމްލަ އެކު، 135 މިލިއަން ޑޮލަރަށް އެރި އެވެ. ޑިއޮމަންޑޭ، ރެއާލްގައި ހުރެ ދައްކާ ކުޅުމުގެ ސަބަބުން، އޭނާ ގެންނަން އެއްބަސްވި ހުރިހާ ޕޭމަންޓެއް ދޭން ޖެހިއްޖެނަމަ، ރެއާލްގެ އެންމެ އަގުބޮޑު ޓްރާންސްފާ އަކަށް ޑިއޮމަންޑޭ ވުމުގެ ފުރުސަތު އެބައޮތެވެ.
މި ފަހަރުގެ ޓްރާންސްފާ މާކެޓްގައި ޑިއޮމަންޑޭގެ ސޮއި ހޯދުމަށް އެންމެ މަސައްކަތްކުރި ދެ ކްލަބަކީ، ޕީއެސްޖީ އާއި ލިވަޕޫލް އެވެ. އެ ގޮތުން، ލިވަޕޫލުން ވަނީ، ޑިއޮމަންޑޭ ގަންނަން 85 މިލިއަން ޑޮލަރުގެ ބިޑެއް ވެސް ހުށަހަޅައިފަ އެވެ. އެކަމަކު، ލައިޕްޒިގުން ވަނީ ލިވަޕޫލްގެ އެ ބިޑް އަނބުރާ ފޮނުވާލައިފަ އެވެ. އޭގެ ފަހުން، ލިވަޕޫލުން އިތުރު ބިޑެއް ނުކޮށް، ފާރަލަމުން އަންނަނީ ޕީއެސްޖީ އަށް ކުޅޭ ބްރެޑްލީ ބާކޮލާ ހޯދުމަށެވެ.
ޔޫރަޕްގެ ޗެމްޕިއަން، ޕީއެސްޖީން ޑިއޮމަންޑޭގެ ސޮއި ހޯދުމަށް ގިނަ މަޝްވަރާތަކެއް ކުރި އެވެ. އެކަމަކު، މީގެ ހަތަރު އަހަރު ކުރިން، ޗެލްސީގެ ޓްރަޔަލެއްގައި ބައިވެރިވި ޑިއޮމަންޑޭ ގަންނަން ޕީއެސްޖީން 100 މިލިއަން ޑޮލަރަށް ވުރެން އިތުރަށް ހޭދަކުރަން ބޭނުމެއް ނުވީ އެވެ.
ހޯސޭ މޮރީނިއޯގެ ކޯޗުކަމުގައި މި ސީޒަނުގައި ވާދަކުރަން ތައްޔާރުވަމުން އަންނަ ރެއާލުން ވަނީ މި ފަހަރުގެ ޓްރާންސްފާގައި، މެންޗެސްޓާ ސިޓީގެ ބެނާޑޯ ސިލްވާ، ލިވަޕޫލްގެ އިބްރާހިމާ ކޮނާޓޭ އަދި އިންޓަ މިލާންގެ ޑެންޒެލް ޑަމްފްރީސް ގެނެސްފަ އެވެ.
