ދިވެހިރާއްޖޭގައި ދިރިއުޅޭ ބަންގްލަދޭޝްގެ ރައްޔިތުންގެ ތެރެއިން އަށް މީހަކު 10 ދުވަހުގެ ތެރޭގައި މަރުވުމުން އެ ގައުމުގެ ހައްގުތަކަށް މަސައްކަތް ކުރާ ޖަމިއްޔާތަކުން ކަންބޮޑުވުން ފާޅުކޮށްފި އެވެ.
ޖުލައި 25، އާއި އޯގަސްޓު 3، އާ ދެމެދު ހާދިސާތަކުގައި ބަންގްލަދޭޝްގެ އަށް މީހަކު މަރުވި ކަމަށް ރާއްޖޭގައި ހުންނަ އެ ގައުމުގެ ހައި ކޮމިޝަންއާ ހަވާލާދީ ރިޕޯޓުކޮށްފައި ވަނީ އެ ގައުމުގެ ނޫސްތަކުންނެވެ.
އެ 10 ދުވަހުގެ ތެރޭގައި ގިނައިން މަރުވީ އުމުރުން 21 އަހަރާއި 45 އަހަރާ ދެމެދުގެ މީހުންނެވެ. އޭގެ ތެރޭގައި ސިއްހީ އެކި މައްސަލަތަކުގައި މަރުވި މީހުންނާއި މަސައްކަތުގެ މާހައުލުގައި ދިމާވި އެކްސިޑެންޓެއްގައި މަރުވި މީހަކު ވެސް ހިމެނެ އެވެ.
މަރުވި މީހުންގެ ތެރޭގައި ސްޓްރޯކެއް ޖެހިގެން މަރުވި ހަތަރު މީހަކާއި ހާޓް އެޓޭކެއް ޖެހުނު އުމުރުން ދުވަސްވީ މީހަކާއި މަސައްކަތުގެ މާހައުލުގައި ދިމާވި އެކްސިޑެންޓުތަކުގައި މަރުވި ދެ މީހަކާއި އަމިއްލައަށް މަރުވި ކަމަށް ބެލެވޭ މީހަކު ހިމެނެ އެވެ.
"ސްޓްރޯކް އާއި ހިތުގެ މައްސަލަތަކުގައި މަރުވާ ބަންގްލަދޭޝްގެ މީހުންގެ މީހުންގެ އަދަދު ގިނަ ވަނީ، އާއިލާއާ ދުރުގައި އުޅެން ޖެހުމާއި ފައިސާގެ ދަތިކަމާއި ސްޓްރެސްގެ ސަބަބުން ކަމަށް ރާއްޖޭގައި ދިރިއުޅޭ ބަންގްލަދޭޝްގެ ރައްޔިތުން ގަބޫލު ކުރޭ،" ވިއުސް ބަންގްލަދޭޝް އިން ބުނެފައިވެ އެވެ.
މަރުވި މީހުންގެ ތަފުސީލު
- ޖުުލައި 25 - ރަބީއުލް އިސްލާމް ރޯޝަން (23 އަހަރު) - މަސައްކަތުގެ މާހައުލުގައި ހިނގި އެކްސިޑެންޓެއް
- ޖުލައި 27 - ހުމެއިން ކާބިރު (45 އަހަރު) - ސްޓްރޯކެއް ޖެހިގެން
- ޖުލައި 28 - މޮކްބުލް މިއާ (47 އަހަރު) ސްޓްރޯކެއް ޖެހިގެން
- ޖުލައި 30 - ޝެއިހް ފަރީދު (45 އަހަރު) - ހަކުރު ބަލީގެ ސަބަބުން ސްޓްރޯކެއް ޖެހިގެން
- އޯގަސްޓް 1 - ސުލައިމާން މަތައްބަރު (21 އަހަރު) - މަސައްކަތުގައި އުޅެނިކޮށް ތިނަރު ބޮވިގެން
- އޯގަސްޓް 1 - ސައީދު މޮއްލާ (44 އަހަރު) - ސްޓްރޯކެއް ޖެހިގެން
- އޯގަސްޓް 1 - ބަދީއުއްރަހްމާން (37 އަހަރު) - އަމިއްލަ މަރުވީ ކަމަށް ބެލެވޭ
- އޯގަސްޓް 3 - ދެލްވާރާ ނަބީ (70 އަހަރު) ހާޓް އެޓޭކެއް ޖެހިގެން
މަރުވި މީހުންގެ ހަށިގަނޑު ބަންގްލަދޭޝްއަށް ފޮނުވުމަށް ބަންގްލަދޭޝްގެ ހައި ކޮމިޝަނުން ދަނީ އެހީތެރިވެދެމުން ކަމަށް ނޫސްތަކުން ރިޕޯޓުކޮށްފައިވެ އެވެ.
މީޑިއާގައި މި މަރުތަކުގެ ވާހަކަ ޝާއިއު ކުރުމުން، ގައުމުން ބޭރުގައި މަސައްކަތް ކުރާ ބަންގްލަދޭޝްގެ ރައްޔިތުންގެ ސަލާމަތާއި ރައްކާތެރިކަން އިތުރު ކުރަން ގޮވާލާ އަޑުތައް ވަނީ އިތުރުވެފަ އެވެ.
ދިވެހިރާއްޖޭގައި 196،024 ބިދޭސީން ދިރިއުޅޭ ކަމަށް ރަސްމީ ހިސާބުތަކުން ދައްކަ އެވެ. އެއީ ކޮންމެ ތިން ދިވެއްސަކަށް ބިދޭސީއެކެވެ. ރާއްޖޭގައި އުޅޭ ބިދޭސީންގެ ތެރެއިން އެންމެ ގިނައީ ބަންގްލަދޭޝް މީހުންނެވެ.
ރަސްމީ ހިސާބުތަކުގެ އިތުރުން ޑޮކިއުމެންޓު ނެތި ރާއްޖޭގައި އިތުރު 30،000 ބިދޭސީން އުޅޭނެ ކަމަށް ބެލެވެ އެވެ. އޭގެ ތެރެއިން ވެސް ގިނައީ ބަންގްލަދޭޝް ރައްޔިތުންނެވެ.
