ބަންގްލަދޭޝްގެ ކުރީގެ ބޮޑުވަޒީރު ޝައިޚް ހަސީނާ، 2024 ވަނަ އަހަރު މަގާމުން ދުރުކުރި ފަހުން ފުރަތަމަ ފަހަރަށް މީޑިއާއާ ވާހަކަދެއްކެވި އިވެންޓެއްގައި އެ ގައުމުގެ ކުރީގެ ކްރިކެޓް ކެޕްޓަން ޝާކިބް އަލް ހަސަން ބައިވެރިވުމާ ގުޅިގެން، އޭނާގެ ގޭގެ ކުޑަދޮރުތައް ތަޅާލައި، ޕެޓްރޯލް ބޮން އުކައިފި އެވެ. އަންނަ ޑިސެމްބަރު މަހު އަލުން ގައުމަށް އެނބުރި ވަޑައިގަންނަވާނެ ކަމަށް ހަސީނާ ވައުދުވެވަޑައިގެންނެވި މި ބައްދަލުވުމަށް ފަހު ޝާކިބްގެ ގެއަށް ވަނީ ބޮޑެތި ގެއްލުންތަކެއް ދީފަ އެވެ.
ފުލުހުން ބުނި ގޮތުގައި، ވެރިރަށް ޑާކާގެ ހުޅަނގު ދެކުނުން ގާތްގަނޑަކަށް 170 ކިލޯމީޓަރު ދުރުގައި އޮންނަ މަގޫރާ ޓައުންގައި ހުންނަ ޝާކިބްގެ ގެއަށް ބުދަ ދުވަހު ބަޔަކު ހަމަލާދީ، އެ ގޭގެ މަތީ ފަންގިފިލާގައި ވަނީ އަލިފާން ރޯކޮށްލާފަ އެވެ. މި ހާދިސާ ހިނގިއިރު އެ ގޭގައި އެއްވެސް މީހަކު އުޅެމުން ނުދާތީ، އެއްވެސް މީހަކަށް އަނިޔާއެއް ލިބިފައި ނުވާ ކަމަށް ފުލުހުން މައުލޫމާތުދެ އެވެ.
މި ހަމަލާ ދީފައިވަނީ އަވާމީ ލީގުގެ ކުރީގެ މަޖިލިސް މެންބަރު ޝާކިބް، ނިއުދިއްލީގެ ފޮރިން ކޮރެސްޕޮންޑެންޓްސް ކްލަބް އޮފް ސައުތު އޭޝިއާއިން އިންތިޒާމުކުރި ވާޗުއަލް އިވެންޓެއްގައި ބައިވެރިވިތާ މަދު ގަޑިއިރުތަކެއްގެ ތެރޭގަ އެވެ.
ޖެނުއަރީ 2024 ގައި އަވާމީ ލީގުގެ ކެންޑިޑޭޓެއްގެ ގޮތުގައި މަޖިލީހަށް އިންތިޚާބުވި ޝާކިބް، ދަރިވަރުން އިސްވެ ހިންގި ހަރަކާތްތަކެއްގެ ތެރެއިން ހަސީނާގެ ސަރުކާރު ވައްޓާލި ފަހުން ދިރިއުޅެމުންދަނީ ބަންގްލަދޭޝްއިން ބޭރުގަ އެވެ. އޭނާގެ މައްޗަށް މީހުން މެރުމާއި، ޚިޔާނާތާއި، މަކަރާއި ހީލަތް ހެދުމުގެ އިތުރުން މަނީ ލޯންޑަރިންގެ ތުހުމަތުތައް ހިމެނޭ ގޮތަށް ގިނަ ތަހުގީގުތަކެއް ދަނީ ހިންގަމުންނެވެ.
ހަސީނާގެ ސަރުކާރު ވައްޓާލިތާ ދެ އަހަރު ފުރުނު ދުވަހު ބޭއްވި މި އިވެންޓަކީ، 2024 ވަނަ އަހަރު އޭނާ ގައުމުން ވަޑައިގެންނެވި ފަހުން މީޑިއާއާ ބޭއްވި ފުރަތަމަ ބައްދަލުވުމެވެ.
ބަންގްލަދޭޝްގެ ފޮރިން މިނިސްޓްރީން ވަނީ ހަސީނާ މީޑިއާއަށް ފެނިވަޑައިގަތުން ކުށްވެރިކޮށްފަ އެވެ. އެ މިނިސްޓްރީން ބުނީ އެއީ "ބަންގްލަދޭޝްގެ ސިޔާދަތަށް ދިން ހަމަލާއެއް" ކަމަށާއި، އިންޑިއާގައި ހުންނަވައިގެން މީޑިއާއާ ވާހަކަދެއްކެވުމަށް އޭނާއަށް ފުރުސަތު ދިނުމަކީ ދެ ގައުމުގެ ގުޅުމަށް ބުރޫއަރާފާނެ ކަމެއް ކަމަށް އިންޒާރު ދީފަ އެވެ.
އުމުރުން 78 އަހަރުގެ ހަސީނާ އޮގަސްޓް 2024 އިން ފެށިގެން ދިރިއުޅުއްވަމުން ގެންދަވަނީ ނިއުދިއްލީގަ އެވެ. ބަންގްލަދޭޝްއިން ވަނީ އޭނާ އެ ގައުމާ ހަވާލުކުރުމަށް އިންޑިއާގައި އެދިފަ އެވެ. ނަމަވެސް އިންޑިއާއިން ބުނަމުންދަނީ އެ ހުށަހެޅުން ގާނޫނީ އުސޫލުތަކުގެ ތެރެއިން ދިރާސާކުރަމުންދާ ކަމަށެވެ.
ނޮވެމްބަރު 2025 ގައި އެ ގައުމުގެ ހަނގުރާމައިގެ ކުށްތަކާ ބެހޭ ޓްރައިބިއުނަލުން ވަނީ، 2024 ވަނަ އަހަރު ދަރިވަރުން ކުރި މުޒާހަރާތައް ހުއްޓުވުމަށް ހިންގި ލޭއޮހޮރުވުން ބޮޑު އޮޕަރޭޝަންތަކާ ގުޅިގެން، ހަސީނާގެ ޣައިރު ހާޒިރުގައި މަރަން ހުކުމްކޮށްފަ އެވެ. ނަމަވެސް ހަސީނާ ވަނީ އެ ތުހުމަތުތަކަކީ ސިޔާސީ މަގްސަދެއްގައި ކުރާ ތުހުމަތުތަކެއް ކަމަށް ވިދާޅުވެ އެކަން ދޮގުކުރައްވާފަ އެވެ.
