ބަންގްލަދޭޝްގެ ކުރީގެ ބޮޑުވަޒީރު ޝައިހް ހަސީނާ، ނިއު ދިއްލީގައި ވީޑިއޯ މެދުވެރިކޮށް ދެއްވަން އުޅޭ ތަގުރީރާ ގުޅޭ ގޮތުން އިންޑިއާގެ ސިޔާސަތު ސާފުކޮށްދިނުމަށް ބަންގްލަދޭޝް އިން އެދިއްޖެ އެވެ.
ބަންގްލަދޭޝް އިން ވަނީ ކުށްވެރިއަކު ފިލައިގެން ހުރެ ސިޔާސީ ހަރަކާތްތައް ހިންގުމަށް ފުރުސަތު ދިނުމަކީ، ދެ ގައުމުގެ ދެމެދުގައި ރަނގަޅުވަމުން އަންނަ ގުޅުމަށް ބުރޫއަރާފާނެ ކަމެއް ކަމަށް ބުނެ އިންޒާރު ދީފަ އެވެ.
މިއީ ހަސީނާގެ ސަރުކާރު ވައްޓާލި ދަރިވަރުންގެ އިހުތިޖާޖަށް ދެ އަހަރު ފުރުން ފާހަގަކުރުމަށް، އޯގަސްޓް 5 ވަނަ ދުވަހު ނިއު ދިއްލީގެ ފޮރިން ކޮރެސްޕޮންޑެންޓްސް ކްލަބް އޮފް ސައުތު އޭޝިއާ (އެފްސީސީއެސްއޭ) އިން ބާއްވާ ހަރަކާތެއްގައި ހަސީނާ ބައިވެރިވެވަޑައިގަންނަވާތީ، އެކަމާ ގުޅިގެން ބަންގްލަދޭޝް ސަރުކާރުން ރަސްމީކޮށް ދިން ފުރަތަމަ ރައްދެވެ.
މި މައްސަލަ ފެންމަތިވެފައި މިވަނީ، 2024 ވަނަ އަހަރުގެ އޯގަސްޓް މަހު ބަންގްލަދޭޝް އިން ފިލައިގެން ވަޑައިގެން އިންޑިއާގައި ދިރިއުޅުއްވަމުން ގެންދަވާ ހަސީނާ އަނބުރާ ގައުމަށް ގެނައުމަށް ބަންގްލަދޭޝް އިން މަސައްކަތް ކުރަމުންދާ ދަނޑިވަޅެއްގަ އެވެ. ހަސީނާއާ ދެކޮޅަށް ގިނަ ދައުވާތަކެއް އުފުލާފައިވީ ނަމަވެސް، އަންނަ ޑިސެމްބަރު މަހު ބަންގްލަދޭޝްއަށް އެނބުރި ވަޑައިގަތުމަށް ގަސްދުކުރައްވާ ކަމަށް ރޮއިޓާސްއަށް ދެއްވި އިންޓަވިއުއެއްގައި އޭނާ ވަނީ ވިދާޅުވެފަ އެވެ.
"އަޅުގަނޑުމެން އިންޑިއާއާއެކު ކުރިއަށް މިދަނީ މުސްތަގުބަލަށް އަމާޒުކޮށްގެން ގެންގުޅޭ އުސޫލެއްގެ ދަށުން. އެ ކުރިއެރުމަށް އެއްވެސް އަސަރެއް ކުރާކަށް އަޅުގަނޑުމެން ބޭނުމެއް ނުވޭ،" ބަންގްލަދޭޝްގެ ސްޓޭޓް މިނިސްޓާ ފޯ ފޮރިން އެފެއާޒް ޝަމާ އޮބައިދު އިސްލާމް ހޯމަ ދުވަހުގެ ރޭ ނޫސްވެރިންނާ ވާހަކަދައްކަވަމުން ވިދާޅުވި އެވެ. "މިކަމުގައި އިންޑިއާގެ ސިޔާސަތު އޮތްގޮތް ސާފުކޮށްދޭން ޖެހޭނެ."
އެފްސީސީއެސްއޭ އިން ބުނި ގޮތުގައި އުމުރުން 78 އަހަރުގެ ހަސީނާ ނިއު ދިއްލީގެ އެ ހަރަކާތުގައި ވާހަކަދައްކަވާނީ ވީޑިއޯ ލިންކް މެދުވެރިކޮށެވެ. އޭނާގެ އިތުރުން ދަރިކަލުން ސަޖީބް ވަޒީދު ޖޯއީ އާއި އެހެނިހެން ބޭފުޅުން ވެސް މި ހަރަކާތުގައި ވާހަކަދެއްކެވުމަށް ވަނީ ހަމަޖެހިފަ އެވެ. ބަންގްލަދޭޝް ސަރުކާރުގެ ކަންބޮޑުވުންތަކާ ގުޅޭ ގޮތުން އެ ކްލަބުން އަދި ވަކި އެއްޗެއް ބުނެފައެއް ނުވެ އެވެ.
ލޭއޮހޮރުވުން ބޮޑު މުޒާހަރާތަކަކަށް ފަހު ހަސީނާގެ ސަރުކާރު ވައްޓާލި ފަހުން އޭނާ ހުންނެވީ އިންޑިއާގަ އެވެ. ބަންގްލަދޭޝް އިން އޭނާ އަނބުރާ ގެނައުމަށް މަސައްކަތް ކުރަމުންދާއިރު، 2024 ވަނަ އަހަރުގެ މުޒާހަރާތައް ހުއްޓުވުމަށް ހިންގި އަމަލުތަކަކީ އިންސާނިއްޔަތާ ހިލާފު ޖަރީމާތަކެއް ކަމަށް ނިންމައި، 2025 ވަނަ އަހަރު ބަންގްލަދޭޝްގެ ކޯޓަކުން ވަނީ އޭނާ މަރަން ހުކުމްކޮށްފަ އެވެ. އދ. އިން އަންދާޒާކުރާ ގޮތުގައި އެ ހަމަނުޖެހުންތަކުގައި 1,400 އެއްހާ މީހުން މަރުވެފައިވެ އެވެ. ނަމަވެސް ހަސީނާ ވަނީ އެ ހުކުމަކީ ގާނޫނީ ގޮތުން ސައްހަ ހުކުމެއް ނޫން ކަމަށް ބުނެ އެކަން ބަލައިގަންނަން އިންކާރުކޮށްފަ އެވެ.
