އިރާން ހަނގުރާމައާ ގުޅިގެން ރާއްޖެއަށް އަންނަ ޓޫރިސްޓުން މަދުވުމުގެ ސަބަބުން ޓޫރިޒަމް އިންޑަސްޓްރީއަށް ކުރިމަތިވެފައިވާ ގޮންޖެހުންތަކުން އަރައިގަތުމަށް ސަރުކާރުން އެހީތެރިކަން ފޯރުކޮށްދިނުމަށް އެޅިދާނެ ފިޔަވަޅުތަކަށް ބަހުސް ކުރުމަށް ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބޭރުކޮށްލައިފި އެވެ.
މިއަދުގެ މަޖިލިސް ޖަލްސާއަށް މި މައްސަލަ ހުށަހެޅުއްވީ އިދިކޮޅު އެމްޑީޕީއަށް ނިސްބަތްވާ ކެންދޫ ދާއިރާގެ މެންބަރު މައުރޫފް ޒާކިރު އެވެ. އޭނާ ހުށަހެޅުއްވި މައްސަލައިގައި ބުނެފައިވާ ގޮތުގައި ހަނގުރާމައިގެ ސަބަބުން ޓޫރިޒަމް ސިނާއަތުގެ ދުވެލި އަންނަނީ މަޑުޖެހުމުންނެވެ.
އެ މައްސަލަ ބަލައިގަތުމަށް ވޯޓު ދިނީ އެންމެ އަށް މެންބަރުންނެވެ. ވެރިިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ)ގެ ސުޕަ މެޖޯރިޓީ އޮންނަ މަޖިލީހުގެ 33 މެންބަރަކު ވޯޓު ދެއްވީ މައްސަލަ ބޭރުކޮށްލުމަށެވެ.
“ފަތުރުވެރިކަމަށް ބަރޯސާވާ ވިޔަފާރިތަކަށް ސަރުކާރުން ލުއިތަކެއް ދީ، ވަކިން ހާއްަސަކޮށް ދައުލަތުގެ ބާރު ހިނގާ ދާއިރާތަކުގައި ވިިޔަފާރިތަކުގެ ކޭޝް ފްލޯ ނުވަތަ ފައިސާގެ ދައުރުވުމަށް އެހީތެރިވެދޭނެ ފިޔަވަޅުތަކެއް އެޅުމަކީ ކޮންމެހެން މުހިންމު ކަމެއް،” އެ މައްސަލާގައި ބުނެފައިވެ އެވެ.
ސަރުކާރުން ފޯރުކޮށްދެވިދާނެ ކަމަށް ފާހަގަކޮށްފައިވާ ފިޔަވަޅުތައް
- ވޯކިން ކެޕިޓަލް ލޯނު ސްކީީމެއް ތަންފީޒުކުރަން ފެށުން
- އިންކަމް ސަޕޯޓް އެލަވަންސެއް ތައާރަފުކުރުން
- ޓޫރިޒަމާއި އެސްއެމްއީތަކުގެ ލޯނުގެ އަސްލު ފައިސާ ދެއްކުން ހަ މަސްދުވަހަށް މެދުކަނޑާލުމުގެ ފުރުސަތު ދިނުން
- މާލީ އިދާރާތައް މެދުވެރިކޮށް ލުއި ލޯނު އަވަހަށް ލިބޭނެ އިންތިޒާމު ހަމަޖެއްސުން
- ޓޫރިޒަމް ވިޔަފާރިތަކަށް ހާއްސަކޮށް ޔުޓިލިޓީ ސަބްސިޑީ ތައާރަފުކުރުން
- ރިސޯޓުތަކުގެ ކުއްޔާއި، އެއާޕޯޓު ޗާޖުތަކާއި، ލައިސަންސް ފީ ވަގުތީ ގޮތުން ކުޑަކުރުން
- ޓީޖީއެސްޓީ އާއި ކޯޕަރޭޓް އިންކަމް ޓެކްސް ދެއްކުން ވަކި މުއްދަތަކަށް ފަސްކޮށްދިނުން
އެމެރިކާ އާއި އިޒްރޭލުން އިރާނަށް ބޮން އަޅައި ފެށިި ހަނގުރާމައިގައި ހަމަލާ ބަދަލުކުރުން ވަގުތީ ގޮތުން ހުއްޓާލާފައި އޮތް ނަމަވެސް އަދިވެސް ދުނިޔޭގޭ ބާޒާރަށް އަރާފައިވާ ލޮޅުންތައް ދެމިއެބައޮތެވެ. އެކަމުގެ ސަބަބުން އެންމެ ބޯޑު އަސަރެއް ކުރަމުންދަނީ ރާއްޖޭގެ ޓޫރިޒަމަށެވެ.
ރައްޔިތުންގެ މަޖިލީހަށް އިދިކޮޅު ޕާޓީން ހުށަހަޅާ ގަރާރުތަކާއި މައްސަލަތަކަށް ބަހުސް ކުރުމުގެ ފުރުސަތު ލިބެނީ މަދު ފަހަރެއްގަ އެވެ. އެހެންވެ އިދިކޮޅު މެންބަރުން ދޭތެރެދޭތެރެއިން އެކަމުގެ ކަންބޮޑުވުން ފާޅުކުރެ އެވެ.
