އައްޑޫ ސިޓީގެ ހިތަދޫ އާއި ސ. ހުޅުދޫ އަދި މީދޫ ގުޅާލުމަށް ބްރިޖު އެޅުމަށް ލޯނު ނެގުމަކީ މިވަގުތަށް ދަތިކަމަކަށްވާތީ މިވަގުތު ކުރިއަށްދަނީ އިގުތިސޯދީ ގޮތުން ފުރުސަތު ލިބެން ވާއިރަށް މަސައްކަތް ފެށޭ ވަރަށް ތައްޔާރުވުމުގެ މަސައްކަތްތައް ކަމަށް ކޮންސްޓްރަކްޝަން މިނިސްޓަރު އަބްދުالله މުއްތަލިބު ހާމަކުރެއްވުމާ ގުޅިގެން އެ މަޝްރޫއުގެ އަމަލީ މަސައްކަތް މި އަހަރު ފެށިދާނެ ކަމާމެދު ސުވާލު އުފެދިއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ހިތަދޫ އާއި ހުޅުމީދޫ ބްރިޖުގެ މަސައްކަތާ ގުޅޭގޮތުން މުއްތަލިބުއާ ސުވާލުކުރެއްވީ ހުޅުދޫ ދާއިރާގެ މެންބަރު މުހައްމަދު ޝާހިދެވެ. އިގުތިސޯދީ ހާލަތު އޮތް ގޮތުން މިވަގުތު ލޯނު ނަގައިގެން އެކަން ކުރެވެން ނެތުމުން މިހާރު ކުރިއަށްދަނީ ލިޔެކިޔުން ތައްޔާރު ކުރުމުގެ މަސައްކަތް ކަމަށް އެ ސުވާލަށް ޖަވާބު ދެއްވަމުން މުއްތަލިބު ވިދާޅުވި އެވެ.
"އައްޑޫ ބްރިޖުގައި މިހާރު ކުރިއަށްދަނީ ޑީޓެއިލް ޑިޒައިނާއި، އީއައިއޭ މަސައްކަތްތަކާއި، ފީސިބިލިޓީގެ މަސައްކަތްތަކެއް. މިކަން ކުރުމުގެ ބޭނުމަކީ ހަގީގަތުގައި، އަޅުގަނޑުގެ އިގުތިސޯދު އޮތްގޮތުން، ދަރަނިތައް އޮތްގޮތުން އެ ވަރުގެ ބޮޑު މަޝްރޫއުއެއް ހިންގުމަށް ލޯނު ނެގުމަކީ މިވަގުތަށް ދަތިކަމަށްވާތީ،" މުއްތަލިބު ވިދާޅުވި އެވެ.
އެ މަސައްކަތް ފެށުމަށް ބޭނުންވާ ވޯކް ސައިޓަށް ބޭނުންވާ ބިން ހަމަޖައްސައިދިނުމަށް ކައުންސިލްތަކަށް އަންނަނީ ސިޓީ ފޮނުވަމުންނެވެ. އެ މަޝްރޫއު އިއުލާންކުރިއިރު ހުޅުދޫ އާއި މީދޫ އޮތީ އައްޑޫ ސިޓީ ކައުންސިލުގެ ބައެއްގެ ގޮތުގަ އެވެ. ފެބްރުއަރީ މަހު ނެގި ރެފަރެންޑަމަށްފަހު އެ ސިޓީން ވަކިވެ ހުޅުދޫ އާއި މީދޫގައި މިހާރު ވަނީ ވަކި ދެ ކައުންސިލް އުފައްދާފަ އެވެ.
"އިގުތިސޯދީ ގޮތުން ފުރުސަތު ލިބެން ވާއިރަށް މަސައްކަތް ފެށޭ ވަރަށް ތައްޔާރުވުމަށް ބޭނުންވާ ޑިޒައިނާއި، ޑޮކިއުމެންޓޭޝަންގެ މަސައްކަތްތައް ކުރިއަށްގެންދަނީ،" އޭނާ ވިދާޅުވި އެވެ.
މި މަޝްރޫއުގެ ޑިޒައިން މަރުހަލާއަށް ބޭނުންވާ 30 މިލިއަން ރުފިޔާ 2024 ވަނަ އަހަރުގެ ބަޖެޓުގައި ވެސް ހިމެނި އެވެ. އަދި ވެރިކަމުގެ ފުރަތަމަ 100 ދުވަހުގެ ތެރޭގައި އެ މަސައްކަތްތައް ފަށަން ސަރުކާރުގެ "ހަފުތާ-14" ރޯޑުމެޕުގައި ވެސް ހިމެނި އެވެ.
ވިހަވަނަ މަޖިލިސް އިންތިހާބު ކުރުމަށް 2024 ވަނަ އަހަރު ނެގި ވޯޓާ ދިމާކޮށް ފެބްރުއަރީ 19، 2024، ގައި އައްޑޫގައި ބޮޑު ރަސްމިއްޔާތެއް ބޭއްވުމަށް ފަހު މިސްރުގެ އަރަބް ކޮންޓްރެކްޓާސް ގްރޫޕާ އެކު ސާވޭ މަސައްކަތް ކުރުމަށް ހަވާލުކުރި އެވެ.
އަރަބް ކޮންޓްރެކްޓާސްއާއެކު އެއްބަސްވުން ހެދި ދުވަހު މުއިއްޒު ވިދާޅުވީ އެ އެއްބަސްވުން ކޮންޓްރެކްޓަކަށް ބަދަލުކޮށް، 2024 ވަނަ އަހަރު އަމަލީ މަސައްކަތް ފަށާނެ ކަމަށެވެ. އޭރު މުއިއްޒު އަންދާޒާ ކުރެއްވީ ތިން އަހަރާއި ބައިގެ ތެރޭގައި މަސައްކަތް އެއްކޮށް ނިންމާލެވޭނެ ކަމަށެވެ. އެ ސާވޭއަށް ވީ ގޮތެއް ނޭނގެ އެވެ.
އެއަށްފަހު އެ ވާހަކަ ނުދެކެވި އޮތުމަށްފަހު ފެބްރުއަރީ 6، 2025، ގައި ރައްޔިތުންގެ މަޖިލީހަށް މުއިއްޒު އިއްވި ރިޔާސީ ބަޔާނުގައި އަނެއްކާ ވެސް ސާވޭގެ މަސައްކަތް ކުރުމަށް ބަޔަކު ހޯދުމަށް އިއުލާންކުރާނެ ކަމަށް ވިދާޅުވި އެވެ. އެ މަސައްކަތް ކުރުމަށް ޗައިނާގެ ޓީވައިލިން ކުންފުންޏާ ތިން މިލިއަން ޑޮލަރަށް ހަވާލުކުރީ އޮކްޓޯބަރު 26، 2025، ގަ އެވެ.
ޖެހިގެން އައި ނޮވެމްބަރު މަހު ހުޅުދޫ އަދި މީދޫގެ ރައްޔިތުންނާ ބައްދަލުކުރައްވައި ބްރިޖުގެ މަސައްކަތްތައް ފެށުމަށް މުއިއްޒު އާ ތާރީހެއް ދެއްވި އެވެ. ފަނަރަ ކިލޯމީޓަރުގެ އައްޑޫ ބްރިޖުގެ އަމަލީ މަސައްކަތް 2026 ވަނަ އަހަރު ފެށުމަކީ އަމާޒެއް ކަމަށް އެ ދުވަހު ވިދާޅުވި އެވެ. އެހެން ނަމަވެސް، މި އަހަރުގެ ތެރޭގައި އަމަލީ މަސައްކަތް ފެށޭނެ ކަމަކަށް ނުބެލެވެ އެވެ.
އައްޑޫގެ ގުޅިފައިވާ ރަށްތަކާއި ހުޅުދޫ އާއި މީދޫ ގުޅާލުމަށް އެންމެ ފުރަތަމަ ވައުދުވެވަޑައިގެންނެވީ 2018 ވަނަ އަހަރުގެ ރިޔާސީ އިންތިހާބުގެ ކެމްޕޭނުގައި އޭރު ވެރިކަމުގައި ހުންނެވި ކުރީގެ ރައީސް އަބްދުالله ޔާމީން އެވެ. ޔާމީންގެ ތަސައްވުރާ އެއްގޮތަށް އެ ބްރިޖުގެ މަސައްކަތް ކުރިއަށްގެންދިޔުމަށް 2023 ވަނަ އަހަރުގެ އިންތިހާބުގެ ކެމްޕޭނުގައި މުއިއްޒު ވައުދުވެވަޑައިގަތެވެ.
