ދެކުނުގެ ރަށެއްގައި އުމުރުން 16 އަހަރުގެ އަންހެން ކުއްޖަކު ރޭޕްކުރި މައްސަލައެއްގައި މީހަކު ހައްޔަރުކޮށް ޝަރީއަތް ނިމެންދެން ބަންދުކޮށްފި އެވެ.
ފުލުހުން ބުނީ އަޕާ ސައުތު ޕޮލިސްގައި ހިމެނޭ ރަށެއްގައި 16 އަހަރުގެ އަންހެން ކުއްޖަކާމެދު ޖިންސީ ކުށުގެ އަމަލެއް ހިންގިކަމުގެ ތުހުމަތުގައި 27 އަހަރުގެ ދިވެހި ފިރިހެނަކު ހައްޔަރުކޮށް، އޭނާ ޝަރީއަތް ނިމެންދެން ބަންދުކޮށްފައިވާ ކަމަށެވެ.
އަދަދު އަށް އެނގިފައިވާ ގޮތުގައި މި މައްސަލައިގައި ހިމެނޭ ގްރޭޑް 10 ގައި ކިޔަވަމުންދާ 16 އަހަރުގެ ކުއްޖާ ރޭޕްކޮށްފައި އޮއްވާ ފެނުނީ ފަޅުގެއެއް ތެރެއިންނެވެ.
މި މައްސަލައާ ގުޅޭ އިތުރު ތަފްސީލް ފުލުހުން ހާމަކޮށްފައި ނުވާއިރު، މައްސަލަ އިތުރަށް ތަހުގީގު ކުރަމުންދާ ކަމަށް ބުންޏެވެ.
މި އަހަރު މިހާތަނަށް ފުލުހުންނަށް ޖިންސީގޯނާގެ 158 ކޭސް ވަނީ ހުށަހަޅާފަ އެވެ. އެއީ މިދިޔަ އަހަރާ އަޅާބަލާއިރު 2.1 ޕަސަންޓުގެ އިތުރުވުމެކެވެ.
މިދިޔަ އަހަރު ފުލުހުންނަށް ހުށަހަޅާފައިވަނީ ޖިންސީ ގޯނާގެ 273 މައްސަލަ ކަމަށްވާއިރު، އޭގެ ކުރީ އަހަރު ފުލުހުންނަށް ހުށަހަޅާފައިވަނީ 322 ކޭސްކަން ފާހަގަކުރެވެ އެވެ.
