ކައުންސިލްތަކުގެ އިހުތިސާސްގައި ހިމެނޭ ބިންތަކާއި ތަންތަން ސަރުކާރުގެ ތަރައްގީގެ މަޝްރޫއުތައް ހިންގުމަށްޓަކައި އެ ރަށެއް ނުވަތަ ސިޓީއެއްގެ އިހުތިސާސުން ވަކިކުރަން ސަރުކާރުން ނިންމާ ހާލަތެއްގައި އެ ތަންތަން ސަރުކާރަށް ނެގޭ ގޮތަށް ލާމަރުކަޒީ ގާނޫނު ބަދަލުކުރުމަށް ރައްޔިތުންގެ މަޖިލީހަށް ހުށަހަޅާފައިވާ އިސްލާހު އަނބުރާ ގެންދަން ގޮވާލައި ތުޅާދޫ ކައުންސިލުން ނެރުނު ގަރާރުގައި ޕީއެންސީގެ ކައުންސިލަރު ޔާސިރު މުހައްމަދު ސޮއިކޮށްފި އެވެ.
ތުޅާދޫގެ ކައުންސިލް ރައީސް އަހްމަދު އަފްރާހް އާއި ނައިބުރައީސް ޝިހާބް އަލީއަކީ އިދިކޮޅު އެމްޑީޕީއަށް ނިސްބަތްވާ މެންބަރުންނެވެ. އޭގެ އިތުރުން ދެން ހިމެނޭ ދެ ކައުންސިލަރުން ކަމަށްވާ ސިފްނާ ރަޝާދު އާއި ސާޖިދާ އަބްދުއްރަހްމާންއަކީ މިނިވަން މެންބަރުންނެވެ.
ތުޅާދޫގެ އެމްޑީޕީ އާއި ޕީއެންސީ އަދި މިނިވަން ކައުންސިލަރުން ހިމެނޭގޮތަށް ޖުމްލަ ފަސް ކައުންސިލަރުންވެސް ވަނީ އެ ކައުންސިލުން ގަރާރުގައި ސޮއިކޮށްފައިކަން ފާހަގަކުރެވެ އެވެ.
ތުޅާދޫ ކައުންސިލުން ނެރުނު ގަރާރެއްގައި ބުނީ ކައުންސިލްތަކުން ބިންތައް އަތުލެވޭ އިސްލާހަކީ ރައްޔިތުންގެ ބާރާއި، ލާމަރުކަޒީ އުސޫލުން ރާއްޖޭގެ އިދާރީ ދާއިރާތައް ހިންގުމުގެ މަގްސަދާއި ބޭނުމާއި، ރާއްޖެ ހޯދާފައިވާ ޑިމޮކްރެޓިކް ހުރިހާ ކުރިއެރުންތަކާ ކަނޑައެޅިގެން ހިލާފު އިސްލާހެއް ކަމަށެވެ.
އަލަށް ހުށަހެޅުނު އިސްލާހު ފާސްވެ ގާނޫނަކަށް ވެއްޖެނަމަ، ރަށްރަށުގެ އިހްތިސާސްގެ ތެރެއިން ބޭނުން ތަނެއް، ބޭނުން އިރަކު، ބޭނުން ގޮތަކަށް، މާލޭގައި ތިބޭ މަރުކަޒީ ވެރިންނަށް އަތުލައިގަނެވުމުގެ ޖާގަ ފަހިވެ، ރަށު ރައްޔިތުން އިހްސާސްގެ މިލްކުވެރިކަން ބީވެގެންދާނެ ކަމަށް ތުޅާދޫ ކައުންސިލުން ބުންޏެވެ.
ކައުންސިލްތަކުން ބިންތައް އަތުލެވޭ އިސްލާހު ބޭރުކުރަން ތުޅާދޫ ކައުންސިލުން ގޮވާލައިފި
ސަރުކާރުގެ މަޝްރޫއުތަކަށް ކައުންސިލްތަކުގެ އިހުތިސާސްގައިވާ ބިންތައް ވަކިކުރެވޭ ގޮތަށް ލާމަރުކަޒީ ގާނޫނަށް ހުށަހަޅާފައިވާ އިސްލާހު އަނބުރާ ގެންދިއުމަށް ތުޅާދޫ ކައުންސިލުން ގޮވާލި. އެ ކައުންސިލުން ބުނާގޮތުގައި މިއީ ލާމަރުކަޒީ ނިޒާމު ރޫޅާލައި، ރައްޔިތުންގެ ބާރުވެރިކަން ނިގުޅައިގަތުމަށް ހުށަހަޅާފައިވާ ޑިމޮކްރެޓިކް އުސޫލުތަކާ ހިލާފު އިސްލާހެއް ކަމަށް.
"މި ބިލުގައިވާގޮތުން މިއިންކަމަކާ ދެކޮޅަށް ރައްޔިތުންގެ ފަރާތުން ބަހެއް ބުނެ ދެކޮޅު ހެދުމަކީވެސް، ކުށްވެރިވާ މަނާ ކަމަކަށް ބަދަލުވީ. ރައްޔިތުން އިންތިހާބުކުރާ މަންދޫބުންނަށް ފިޔަވަޅު އަޅައި ސަސްޕެންޑުކޮށް ވަކިކުރުމުގެ ބާރުވެސް މަރުކަޒީ އިދާރާތަކަށް މާ ސާފުކޮށް ލިބިދެވުނީ. މިއީ ސީދާސާދާކޮށް ލާމަރުކަޒީ ނިޒާމު ރޫޅައި، ރައްޔިތުންނާއި ރަށުބާރުވެރިކަން އުވާލުމުގެ އިސްލާހެއް،" ތުޅާދޫ ކައުންސިލުގެ ގަރާރުގައި ބުންޏެވެ.
ތުޅާދޫ ކައުންސިލުން ވަނީ ސަރުކާރުގެ ފަރާތުން ތުޅާދޫ ދާއިރާގެ މެންބަރު އަބްދުލް ހަންނާން އަބޫބަކުރު ހުށަހަޅުއްވާފައިވާ މި އިސްލާހު އަނބުރާ ގެންދަން މުހައްމަދު މުއިއްޒަށް ގޮވާލައްވާފަ އެވެ.
މީގެއިތުރުން ތުޅާދޫއަށް ނިސްބަތްވާ އެ ދާއިރާގެ މެންބަރު މިފަދަ އިސްލާހެއް ހުށަހެޅުއްވުމަކީ ލަދުވެތިވާ ކަމެއް ކަމަށް ކައުންސިލުން ފާހަގަކުރެ އެވެ. އޭގެއިތުރުން ތުޅާދޫ ކައުންސިލުން ބުނީ ނޫސްވެރިކަމުގެ މިނިވަންކަމާ ދެކޮޅަށް ކުރިން މަސައްކަތްކުރެއްވުމަށްފަހު ހަންނާން މިފަހަރު ސީދާ ރަށްރަށުގެ ބާރުވެރިކަމާ ދެކޮޅަށް މަސައްކަތްކުރުމަކީ ދާއިރާގެ ރައްޔިތުންނަށް ވެވޭ ހިޔާނާތެއް ކަމަށެވެ.
ހަންނާންއަކީ އަމިއްލަ މެންބަރެއްގެ ގޮތެއްގައި ހުންނެވި ނަމަވެސް މަޖިލީހުގެ މަސައްކަތް ކުރައްވަނީ ވެރިކަން ކުރާ ޕާޓީ ޕީޕަލްސް ނެޝަނަލް ކޮންގްރެސް (ޕީއެންސީ) އާއެކު އެވެ. ބިންތައް އަތުލެވޭ އެ ބިލުގައި އޮތީ ހަތަރު އަކުރެއް އެ ގާނޫނަށް އިތުރުކުރުމަށް ހިމަނާފަ އެވެ.
އެ ބިލުގައި ބުނެފައިވާ ގޮތުގައި ރަށްރަށުގެ ފިޒިކަލް ޑިވެލޮޕްމަންޓު ޕްލޭން ފާސްކުރުމުގެ ކުރިން ވެސް ސަރުކާރުން ތަރައްގީގެ މަޝްރޫއުއެއް ހިންގަން ބިމެއް ހޯދަން އެދޭ ހާލަތްތަކުގައި އެ ބިން ސަރުކާރާ ހަވާލުކުރަން ޖެހެ އެވެ.
މިފަދަ ބިލެއް މަޖިލީހަށް ހުށަހަޅާފައި މިވަނީ ސަރުކާރުން ބޭނުންވާ ބިންތައް ދިނުމަށް ބައެއް ކައުންސިލްތަކުން ދެކޮޅު ހަދަމުންދާ ދަނޑިވަޅެއްގަ އެވެ.
