ކައުންސިލްތަކުގެ އިހުތިސާސްގައި ހިމެނޭ ބިންތަކާއި ތަންތަން ސަރުކާރުގެ ތަރައްގީގެ މަޝްރޫއުތައް ހިންގުމަށްޓަކައި އެ ރަށެއް ނުވަތަ ސިޓީއެއްގެ އިހުތިސާސުން ވަކިކުރަން ސަރުކާރުން ނިންމާ ހާލަތެއްގައި އެ ތަންތަން ސަރުކާރަށް ނެގޭ ގޮތަށް ލާމަރުކަޒީ ގާނޫނު ބަދަލުކުރުމަށް ރައްޔިތުންގެ މަޖިލީހަށް ހުށަހަޅާފައިވާ އިސްލާހު ބޭރުކުރަން އަނބުރާ ގެންދަން ތުޅާދޫ ކައުންސިލުން މިއަދު ގޮވާލައިފި އެވެ.
ތުޅާދޫ ކައުންސިލުން ނެރުނު ގަރާރެއްގައި ބުނީ ކައުންސިލްތަކުން ބިންތައް އަތުލެވޭ އިސްލާހަކީ ރައްޔިތުންގެ ބާރާއި، ލާމަރުކަޒީ އުސޫލުން ރާއްޖޭގެ އިދާރީ ދާއިރާތައް ހިންގުމުގެ މަގްސަދާއި ބޭނުމާއި، ރާއްޖެ ހޯދާފައިވާ ޑިމޮކްރެޓިކް ހުރިހާ ކުރިއެރުންތަކާ ކަނޑައެޅިގެން ހިލާފު އިސްލާހެއް ކަމަށެވެ.
އަލަށް ހުށަހެޅުނު އިސްލާހު ފާސްވެ ގާނޫނަކަށް ވެއްޖެނަމަ، ރަށްރަށުގެ އިހްތިސާސްގެ ތެރެއިން ބޭނުން ތަނެއް، ބޭނުން އިރަކު، ބޭނުން ގޮތަކަށް، މާލޭގައި ތިބޭ މަރުކަޒީ ވެރިންނަށް އަތުލައިގަނެވުމުގެ ޖާގަ ފަހިވެ، ރަށު ރައްޔިތުން އިހްސާސްގެ މިލްކުވެރިކަން ބީވެގެންދާނެ ކަމަށް ތުޅާދޫ ކައުންސިލުން ބުންޏެވެ.
"މި ބިލުގައިވާގޮތުން މިއިންކަމަކާ ދެކޮޅަށް ރައްޔިތުންގެ ފަރާތުން ބަހެއް ބުނެ ދެކޮޅު ހެދުމަކީވެސް، ކުށްވެރިވާ މަނާ ކަމަކަށް ބަދަލުވީ. ރައްޔިތުން އިންތިހާބުކުރާ މަންދޫބުންނަށް ފިޔަވަޅު އަޅައި ސަސްޕެންޑުކޮށް ވަކިކުރުމުގެ ބާރުވެސް މަރުކަޒީ އިދާރާތަކަށް މާ ސާފުކޮށް ލިބިދެވުނީ. މިއީ ސީދާސާދާކޮށް ލާމަރުކަޒީ ނިޒާމު ރޫޅައި، ރައްޔިތުންނާއި ރަށުބާރުވެރިކަން އުވާލުމުގެ އިސްލާހެއް،" ތުޅާދޫ ކައުންސިލުގެ ގަރާރުގައި ބުންޏެވެ.
ތުޅާދޫ ކައުންސިލުން ވަނީ ސަރުކާރުގެ ފަރާތުން ތުޅާދޫ ދާއިރާގެ މެންބަރު އަބްދުލް ހަންނާން އަބޫބަކުރު ހުށަހަޅުއްވާފައިވާ މި އިސްލާހު އަނބުރާ ގެންދަން މުހައްމަދު މުއިއްޒަށް ގޮވާލައްވާފަ އެވެ.
މީގެއިތުރުން ތުޅާދޫއަށް ނިސްބަތްވާ އެ ދާއިރާގެ މެންބަރު މިފަދަ އިސްލާހެއް ހުށަހެޅުއްވުމަކީ ލަދުވެތިވާ ކަމެއް ކަމަށް ކައުންސިލުން ފާހަގަކުރެ އެވެ. އޭގެއިތުރުން ތުޅާދޫ ކައުންސިލުން ބުނީ ނޫސްވެރިކަމުގެ މިނިވަންކަމާ ދެކޮޅަށް ކުރިން މަސައްކަތްކުރެއްވުމަށްފަހު ހަންނާން މިފަހަރު ސީދާ ރަށްރަށުގެ ބާރުވެރިކަމާ ދެކޮޅަށް މަސައްކަތްކުރުމަކީ ދާއިރާގެ ރައްޔިތުންނަށް ވެވޭ ހިޔާނާތެއް ކަމަށެވެ.
މުއިއްޒުގެ ސަރުކާރުން އަންނަނީ ކައުންސިލްތަކުގެ ބާރު ކަނޑުވާލައި ވަރަށް ބޮޑަށް މަރުކަޒު ކުރަމުންނެވެ. އެކަމަށް މަގުފަހި ކުރުމަށްޓަކައި ލާމަރުކަޒީ ގާނުނަށް ގިނަ ބަދަލުތަކެއް ފާއިތުވި ދެ އަހަރުގެ ތެރޭގައި ވަނީ ގެނެސްފަ އެވެ.
ކައުންސިލްތަކުގެ ބާރު ހަނިކުރަނީ؛ ސަރުކާރުން ބޭނުންވާ ރަށްރަށުގެ ބިންތައް އަތުލުމަށް ގާނޫނު ބަދަލުކުރަން ހުށަހަޅައިފި
މިފަދަ ބިލެއް މަޖިލީހަށް ހުށަހަޅާފައި މިވަނީ ސަރުކާރުން ބޭނުންވާ ބިންތައް ދިނުމަށް ބައެއް ކައުންސިލްތަކުން ދެކޮޅު ހަދަމުންދާ ދަނޑިވަޅެއްގައި. ކައުންސިލްތަކުން އެކަށީގެންވާ މުއްދަތެއްގައި ހުއްދަ ނުދޭނަމަ އެލްޖީއޭގެ ހުއްދައާއެކު އެ މަޝްރޫއުއެއް ހިންގުމުގެ އިހުތިޔާރު ސަރުކާރަށް ލިބޭ ގޮތަށް ވެސް ގާނޫނު ވަނީ ބަދަލުކޮށްފައި.
ހަންނާންއަކީ އަމިއްލަ މެންބަރެއްގެ ގޮތެއްގައި ހުންނެވި ނަމަވެސް މަޖިލީހުގެ މަސައްކަތް ކުރައްވަނީ ވެރިކަން ކުރާ ޕާޓީ ޕީޕަލްސް ނެޝަނަލް ކޮންގްރެސް (ޕީއެންސީ) އާއެކު އެވެ. ބިންތައް އަތުލެވޭ އެ ބިލުގައި އޮތީ ހަތަރު އަކުރެއް އެ ގާނޫނަށް އިތުރުކުރުމަށް ހިމަނާފަ އެވެ.
"މަޝްރޫއުތައް ހިންގުމަށްޓަކައި ކައުންސިލްގެ އިހުތިސާސްގެ ތެރޭގައި ހިމެނޭ ބިމެއް ނުވަތަ ތަނެއް ވަކިކުރުމަށް ވަޒީރުންގެ މަޖިލީހުން ނިންމުމަށްފަހު، އެކަން ކަމާބެހޭ ގައުމީ އިދާރާއިން ކައުންސިލްގެ މިލްކިއްޔާތުން ވަކިވެ، ދައުލަތުގެ ފުރިހަމަ ބާރު ހިނގާ ބިމާއި ތަންތަން ކަމުގައި ވެގެންދާނެ،" ބިލުގައި ބުނެފައިވެ އެވެ.
އެ ބިލުގައި ބުނެފައިވާ ގޮތުގައި ރަށްރަށުގެ ފިޒިކަލް ޑިވެލޮޕްމަންޓު ޕްލޭން ފާސްކުރުމުގެ ކުރިން ވެސް ސަރުކާރުން ތަރައްގީގެ މަޝްރޫއުއެއް ހިންގަން ބިމެއް ހޯދަން އެދޭ ހާލަތްތަކުގައި އެ ބިން ސަރުކާރާ ހަވާލުކުރަން ޖެހެ އެވެ.
މިފަދަ ބިލެއް މަޖިލީހަށް ހުށަހަޅާފައި މިވަނީ ސަރުކާރުން ބޭނުންވާ ބިންތައް ދިނުމަށް ބައެއް ކައުންސިލްތަކުން ދެކޮޅު ހަދަމުންދާ ދަނޑިވަޅެއްގަ އެވެ.
އެގޮތުން، ސ. މަރަދޫފޭދޫގައި 2،900 އަކަފޫޓުގެ އިމާރާތެއް އަޅަން 9،000 އަކަފޫޓުގެ ބިމެއް އައްޑޫ ސިޓީ ކައުންސިލުން ދީފައި އޮއްވައި އެ ބިމުގެ ޖާގަ 11،000 އަކަފޫޓަށް ބަދަލުކޮށްދިނުމަށް އެދުމުން އެ ކަމަށް އެ ކައުންސިލުން ވަނީ ދެކޮޅު ހަދާފަ އެވެ.
ހަމައެހެންމެ، ގޫގުލްއިން އައްޑޫ ސިޓީ ހިތަދޫގައި، އިންޓަނޭޝަނަލް ސަބްމެރިން ކޭބަލް ލޭންޑިން ސްޓޭޝަނަކާއި ނެޓްވޯކް ފެސިލިޓީއެއް ގާއިމުކުރަން ހިންގާ މަޝްރޫއުގެ ބޭނުމަށް ނަގާ ބިން ވެސް ކުލި ނުލިބޭ ގޮތަށް ދޫނުކުރާނެ ކަމަށް އެ ކައުންސިލުން އޮތީ ބުނެފަ އެވެ.
