ކ. ތިލަފުށިން ފުރައިގެން ދަތުރުކުރި ލޭންޑިން ކްރާފްޓެއް ކ. ގާފަރު ކައިރިން ބަންޑުންޖަހާލި ހާދިސާގައި ގެއްލުނު ދެ ބިދޭސީން އަދިވެސް ނުފެންނަ ކަމަށް އެމްއެންޑީއެފް އިން ބުނެފި އެވެ.
އެމްއެންޑީއެފް އިން ބުނީ ހާދިސާގައި ގެއްލުނު މީހުން ހޯދުމުގެ މަސައްކަތް ހުއްޓުމެއްނެތި ކަނޑުގެ މަގުންނާއި ވައިގެ މަގުން އެމްއެންޑީއެފްގެ ކޯސްޓްގާޑުން މަސައްކަތް ކުރަމުންދާ ކަމަށެވެ.
މިގޮތުން މިހާތަނަށް ކަނޑާއި ވައިގެ މަގުން 2747 އަކަ ނޯޓިކަލް މޭލްގެ ސަރަހައްދެއް ބަލާފައި ވާއިރު، އެމްއެންޑީއެފް ކޯސްޓްގާޑް ޑައިވަރުން ވަނީ އެލްސީވީ އަޑިޔަށްދިޔަ ސަރަހައްދު ވެސް ޑައިވްކޮށްގެން ބަލާފައިވާ ކަމަށް އެމްއެންޑީއެފް އިން ބުންޏެވެ.
މި ހާދިސާ ހިނގިއިރު ލޭންޑިން ކްރާފްޓުން ޖުމްލަ 10 މީހުން ދަތުރުކުރި އެވެ. އޭގެ ތެރޭގައި ހިމެނެނީ ހަތް ބިދޭސީންނާއި ބޯޓުގެ ކެޕްޓަނަކަށް ހުރި ދިވެހި މީހާ އެވެ. އެ އެންމެންނަށް ވެސް ގާފަރު ސިއްހީ މަރުކަޒުން ފަރުވާދިނެވެ.
ރާއްޖޭގެ ބޮޑު ސަރަހައްދަށް މި ދުވަސްވަރު މޫސުން ގޯސްވުމުގެ ސަބަބުން ކަނޑުދަތުރުކުރާ ހުރިހާ އެންމެންވެސް މޫސުމަށް ސަމާލުވުމަށް ކަމާބެހޭ ފަރާތްތަކުން ވަނީ އިލްތިމާސްކޮށްފަ އެވެ.
