ރާއްޖޭގެ ކަޅު ބާޒާރުގައި އެމެރިކާ ޑޮލަރުގެ އަގު އިންތިހާއަށް އުފުލެމުންދާތީ ޑޮލަރުގެ އަގަށް އަންނަ ބަދަލުތައް ވަގުތުން ބަލާލެވޭނެ ހާއްސަ "ޑޮލަރު ޓްރެކާ" އެއް "އަދަދު" ނޫހުން ތައާރަފުކޮށްފި އެވެ.
މި އާ ފީޗާއިން އާންމުންނާއި ވިޔަފާރިވެރިންނަށް ބާޒާރުގައި ޑޮލަރުގެ ރޭޓު ބަދަލުވާ ގޮތާއި، ތާރީހީ ބަދަލުތައް އެއް ތަނަކުން ފަސޭހަކަމާއެކު ބަލާލެވޭނެ އެވެ.
ކަޅު ބާޒާރުގައި މިހާރު ޑޮލަރެއްގެ އަގު ހުރީ 21.70ރ. އަށެވެ. މިއީ ރާއްޖޭގެ ތާރީހުގައި ވެސް ޑޮލަރުގެ އަގު އެންމެ މައްޗަށް ދިޔަ މިންވަރެވެ. ނަމަވެސް ޑޮލަރުގެ އަގު މައްޗަށް ނުދާނެ ކަމަށް ރައީސް މުހައްމަދު މުއިއްޒު ކުރިން ވިދާޅުވެފައިވެ އެވެ.
މަރުކަޒީ ބޭންކު އެމްއެމްއޭއިން އެމެރިކާ ޑޮލަރު ވިއްކުމަށް ކަނޑައަޅާފައިވާ ރަސްމީ ރޭޓު 15.42ރ. ގައި ހުއްޓަސް، ކަޅު ބާޒާރުގައި ޑޮލަރުގެ އަގު މިހާރު ހުރި ވަރަށް ބަލާއިރު މިއީ ޑޮލަރަކުން 6.28ރ. ގެ ބޮޑުވެފަ އެވެ. މިއީ ރަސްމީ ރޭޓަށް ބަލާއިރު، 40.73 ޕަސެންޓުގެ އިތުރުވުމެކެވެ.
ޓްރެކާއިން ދައްކާ ގޮތުން މިހާރު ޑޮލަރުގެ އަގު 21.70ރ. އަށް އުފުލުނު ކަމަށް ރެކޯޑު ކުރެވިފައި ވަނީ ޖުލައި 29، 2026 އިން ފެށިގެންނެވެ.
ރާއްޖެއަށް އެތެރެކުރާ މުދަލަށް ބޭނުންވާ ޑޮލަރު ބޭންކިން ނިޒާމުގެ ތެރެއިން ލިބުން ދަތިވުމާއި، ބޭރުގެ ދަރަނި ދެއްކުމަށް ބޮޑު އަދަދަކުން ޑޮލަރު ބޭނުންވުމުގެ ސަބަބުން ކަޅު ބާޒާރުގައި ޑޮލަރަށް އޮތް ޑިމާންޑު ވަނީ ވަރަށް ބޮޑަށް އިތުރުވެފަ އެވެ.
ޑޮލަރުގެ ތާށިކަން ބޮޑުވެ މުދަލާއި ހިދުމަތުގެ އަގުތައް ދަނީ ބޮޑުވަމުންނެވެ.
އަދަދުގެ ފުރަތަމަ ސޮފުހާއިން ޑޮލަރު ޓްރެކާ ބަލާލެވޭއިރު، ތަފުސީލާއެކު ވިޔަފާރި ސޮފުހާއިން ފެންނާނެ އެވެ.
