ހުސްވެފައިވާ ވަޒީފާއާބެހޭ ޓްރައިބިއުނަލްގެ ނައިބްރައީސަކަށް މއ. އެރަލްސީ، އަހްމަދު މަމްދޫހު މިއަދު އައްޔަނުކޮށްފި އެވެ.
ރައީސް އޮފީހުގައި ބޭއްވި ރަސްމިއްޔާތެއްގައި މަމްދޫހަށް މަގާމު ހަވާލުކުރިކަމުގެ ލިޔުން ހަވާލުކޮށްދެއްވީ މުހައްމަދު މުއިއްޒު އެވެ.
މަމްދޫހަށް ވަޒީފާއާބެހޭ ޓްރައިބިއުނަލްގެ ނައިބުކަމުގެ ހުވައި ލައިދެއްވީ ސުޕްރީމް ކޯޓުގެ ފަނޑިޔާރު އާއިޝާ ޝުޖޫން އެވެ.
ސްރީލަންކާގެ ޔުނިވާސިޓީ އޮފް ކެލަނިޔާއިން ބެޗްލާސް ޑިގްރީ އިން ބިޒްނަސް އެޑްމިނިސްޓްރޭޝަން ހާސިލްކުރައްވާފައިވާ މަމްދޫހު ވަނީ މީގެކުރިން އިކޮނޮމިކް މިނިސްޓްރީގެ ނައިބުކަމާއި އާރްޑީސީގެ މެނޭޖިން ޑިރެކްޓަރުކަން އަދާކުރައްވާފަ އެވެ.
މަމްދޫހު އެންމެ ފަހުން ހުންނެވީ މާލެ ސިޓީ ކައުންސިލް އިން ކުރިއަށްގެންދާ ބައެއް މަޝްރޫއުތަކުގެ ކޮންސަލްޓަންޓެއް ގޮތުގަ އެވެ. އޭނާ މާލެ ސިޓީ ކައުންސިލްގެ ކޮންސަލްޓަންޓެއް ގޮތުގައި މަސައްކަތްކުރަން ފެށީ މުއިއްޒުގެ މޭޔަރުކަމުގަ އެވެ.
ވަޒީފާއާ ބެހޭ ޓްރައިބިއުނަލްގެ ރައީސަކީ އަމްޖަދު މުސްތަފާ އެވެ. އެތަނުގެ މެންބަރުންގެ ގޮތުގައި ތިއްބެވީ މަރްޔަމް ރިޝްފާ، ހިކުމާ އަހްމަދު ނިޒާރު ސައުސަން އަލީ، އިޝާރާ އަބްދުލްއަޒީޒް، ފާތިމަތު ސައުސަން އަދި ހަސަން އިބްރާހިމް އެވެ.
