ވައިބާ ގްރޫޕެއްގައި މުވައްޒަފުންގެ ހައްގުތަކަށް ވަކާލާތުކުރި ހޮސްޕިޓަލެއްގެ މުވައްޒަފަކަށް އެޅި ފިޔަވަޅު އެމްޕްލޯއިމަންޓް ޓްރައިބިއުނަލްއިން ބާތިލުކޮށްފި އެވެ.
މޯލްޑިވްސް ހެލްތު ޕްރޮފެޝަނަލް ޔޫނިއަން އިން ނެރުނު ނޫސް ބަޔާނެއްގައި ބުނީ އެ ޔޫނިއަންގެ މެންބަރު ސިއްހީ ހިދުމަތްތެރިއަކު މަސައްކަތްކުރަމުންދާ ހޮސްޕިޓަލުން އިސްލާހީ ފިޔަވަޅެއްގެ ނަމުގައި ގަވާއިދާ ހިލާފަށް ފިޔަވަޅު އެޅީ މުވައްޒަފުންގެ ހައްގުގައި ވަކާލާތުކުރަމުން ދިޔުމާ ގުޅިގެން ކަމަށެވެ.
އެމްޕްލޯއިމަންޓް ޓްރައިބިއުނަލް އިން އެ މުވައްޒަފަށް ހޮސްޕިޓަލުން އަޅާފައިވާ ފިޔަވަޅު ބާތިލުކުރަން ނިންމީ އެ ފިޔަވަޅަކީ ވަޒީފާއާ ބެހޭ ގާނޫނާއި ހިލާފަށް އަޅާފައިވާ ފިޔަވަޅެއް ކަމަށްވާތީ ކަމަށެވެ. އެ މައްސަލައިގައި ޔޫނިއަންގެ މެންބަރު ގާނޫނީ ވަކީލެއްގެ ގޮތުގައި ހިލޭސާބަހަށް އެހީތެރިކަން ފޯރުކޮށްދިނީ ޕަބްލިކް އިންޓްރެސްޓް ލޯ ސެންޓަރުންނެވެ.
އެ މުވައްޒަފަށް ފިޔަވަޅު އެޅީ އެ މުވައްޒަފާއި ހޮސްޕިޓަލުގައި މަސައްކަތްކުރާ އެހެން މުވައްޒަފުން ހިމެނޭ ގޮތަށް އެ މަސައްކަތްތެރިންގެ ކަންބޮޑުވުންތަކާއި ޝުއޫރުތައް ފާޅުކޮށް ވަޒީފާގެ މާހައުލުގައި ހުރި ބަދަލު ގެންނަން ބޭނުންވާ ނުރަނގަޅު ކަންކަމާ މެދު ހުރިހާ މަސައްކަތްތެރިން އެކުގައި ވައިބާ ގްރޫޕެއް ހަދައި، މަސައްކަތްތެރިންގެ ހައްގުތައް ހޯދުމަށް ޔޫނިއަނައިޒްވެ އެކުގައި މަސައްކަތް ކުރުމުންނެވެ.
މަސައްކަތްތެރިންގެ ހައްގުތައް ކަށަވަރުކުރަން ޔޫނިނައިޒްވެ ކުރާ މިފަދަ މަސައްކަތްތައް ހުއްޓުވުމަށް ސިއްހީ ހިދުމަތްތެރިންނަށް ހޮސްޕިޓަލުތަކުން ކުރަމުންދާ މިފަދަ އަމަލުތަކުގެ ސަބަބުން ޖަމާއީ ގޮތެއްގައި މަސައްކަތްތެރިން ބާރުވެރިވެ، މަސައްކަތްތެރިންގެ ހައްގުތައް އަދި ސިއްހީ ދާއިރާގެ ކަންކަން އިސްލާހުކުރުމަށް ލިބިދޭ ބާރު ހަނިވެގެންދާކަން ހެލްތު ޕްރޮފެޝަނަލް ޔޫނިއަނުން ބުންޏެވެ.
އެ ޔޫނިއަނުން ބުނީ ޔޫނިއަންގެ މެންބަރުން ކުރިއަށްގެންދާ އިންޑަސްޓްރިއަލް އެކްޝަންތަކުގައި އެ މެންބަރުންނާ މެދު އަޅާ މިފަދަ ކޮންމެ ގައިރުގާނޫނީ ފިޔަވަޅެއްގައި ޔޫނިއަންގެ މެންބަރުންގެ ހިމާޔަތުގައި ޔޫނިއަން އަބަދުވެސް ދެމި އޮންނާނެ ކަމަށެވެ.
