ވޭސްޓް މެނޭޖުމަންޓު ކޯޕަރޭޝަން (ވެމްކޯ) ގެ ތިލަފުށީ ސައިޓުގައި ރޯވެ އަނދައިގެންދިޔަ ކުނިތައް ހދ. ކުނބުރުދޫއަށް ގެންދާތީ ކަންބޮޑުވުން ފާޅުކޮށް ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބޭރުކޮށްލައިފި އެވެ.
މި މައްސަލަ ހުށަހެޅުއްވީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ފަރާތުން ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) އެވެ. އެ މައްސަލައަށް ބަހުސް ކުރުމަށް ވޯޓު ދެއްވީ ހަތް މެންބަރުންނެވެ. މައްސަލަ ބޭރުކޮށްލީ 27 މެންބަރުންގެ ވޯޓުންނެވެ.
މާލެ ސަރަހައްދުގައި އުފެދޭ ހުރިހާ ކުންޏެއް ގެންދާ ތިލަފުށީގައި ރޯވީ ޖުލައި 19، ގަ އެވެ. އެ އަލިފާނުގެ ހާދިސާއާ ގުޅިގެން ވެމްކޯގެ ތިލަފުށީ ސައިޓަށް ގެއްލުންވެ ކުނި ބަލައިގަންނަ މިންވަރު ވެސް ވަނީ މަދުކޮށްފަ އެވެ. އެނދި ހުރިހާ ކުންޏެއް ގެންދަނީ ހދ. ކުނބުރުދޫގައި ހުންނަ ވޭސްޓް މެނޭޖުމަންޓު ފެސިލިޓީއަށް ކަމަށް ވެމްކޯއިން އޮތީ ހާމަކޮށްފަ އެވެ.
ފިއްޓޭ ހުށަހެޅުއްވި މައްސަލާގައި ބުނެފައިވާ ގޮތުގައި އެ ފެސިލިޓީގެ މަސައްކަތްތައް ނިމިފައި ނުވެ އެވެ. އެ ރަށަކީ ވޭސްޓް ޓްރާންސްފާ ސްޓޭޝަނެއް ކަމަށާއި އެހެން ނަމަވެސް ވެމްކޯއިން އެ ރަށް ބޭނުންކުރަން އުޅެނީ އެހެން ބޭނުމެއްގައި ކަމަށް ފިއްޓޭގެ މައްސަލާގައި ބުނެފައިވެ އެވެ.
އެ ކުނީގެ ސަބަބުން އެ ރަށުގެ ގުދުރަތީ ރީތިކަން ގެއްލި، ދަނޑުވެރިކަމާއި ގަސްގަހާގެއްސަށް އިއާދަނުކުރެވޭ ގެއްލުން ލިބުމުގެ ފުރުސަތު އޮތް ކަމަށް އެ މައްސަލާގައި ބަޔާންކޮށްފައިވެ އެވެ. ވެމްކޯގެ އެ ނިންމުމަކީ ރައްޔިތުންގެ ސިއްހަތަށް އޮތް ނުރައްކަލެއް ކަމަށް ފިއްޓޭގެ މައްސަލާގައި ބުނެފައިވެ އެވެ.
ކުޅުދުއްފުށީ ސިޓީގެ މޭޔަރު މުހައްމަދު އާތިފް ވެސް ވަނީ އެއީ "ކޮށްގެންވާނޭ ކަމެއް ނޫން" ކަމަށް ވިދާޅުވެފަ އެވެ.
