ކަސްޓަމްސްއަށް ފައިސާ ދައްކަންޖެހޭ މީހުންގެ ނަންތައް ހާމަކުރުން އުސޫލުން ލާޒިމުކޮށްފައި އޮތް ނަމަވެސް، އެފަދަ ފަރާތްތަކުގެ މައުލޫމާތު އާންމުނުކޮށް ހިފަހައްޓާފައި އޮންނަތާ ހަތް މަސްދުވަސް ވެއްޖެ އެވެ.
މިދިޔަ އަހަރު އެކުލަވާލި އުސޫލުގެ ދަށުން މިހާތަނަށް ކަސްޓަމްސް އަށް ފައިސާ ދައްކަންޖެހޭ މީހުންގެ ލިސްޓެއް އެންމެ ފަހުން އާންމުކުރީ މިދިޔަ އަހަރުގެ އޮކްޓޫބަރު މަހު އެވެ. އުސޫލުގައިވާ ގޮތުން ކޮންމެ ދެ މަހަކުން އެއްފަހަރު އެ ލިސްޓު އާންމުކުރަންޖެހޭއިރު، އެ މައުލޫމާތު އާންމުނުކުރާތާ މިއީ ހަތްވަނަ މަހެވެ.
ލިސްޓު އާންމުނުކުރާ ސަބަބާ ގުޅޭގޮތުން "އަދަދު" އިން ސުވާލުކުރުމުން ކަސްޓަމްސްއިން މިހާތަނަށް އެއްވެސް ޖަވާބެއް ދީފައެއް ނުވެ އެވެ.
ކަސްޓަމްސްއިން މިހާތަނަށް ހާމަކުރި ހަމައެކަނި ލިސްޓުގައިވާ ގޮތުން، 503 މީހަކު އެ އިދާރާއަށް ދައްކަންޖެހޭ ޖޫރިމަނާ ނުދައްކާ އެބައޮތެވެ. އޭގެ ތެރެއިން އެންމެ ގިނައިން ފައިސާ ދައްކަންޖެހިފައި ވަނީ ސަލްޓަންސް އޮފް ދަ ސީސް އަށެވެ. އެ ކުންފުނިން އިމްޕޯޓް ޑިއުޓީ އާއި ޖޫރިމަނާގެ ގޮތުގައި 110 މިލިއަން ރުފިޔާ ދައްކަންޖެހެ އެވެ.
އޭގެ އިތުރުން 10 މިލިއަނަށްވުރެ ގިނަ ރުފިޔާ ނުދައްކާ 16 ފަރާތެއް ހިމެނޭއިރު، އެއް މިލިއަނާއި 10 މިލިއަން ރުފިޔާއާ ދެމެދުގެ އަދަދުތަކުން ފައިސާ ނުދައްކާ 57 ފަރާތެއްގެ ނަން ލިސްޓުގައި އެބައޮތެވެ. އެ ލިސްޓުގައި ގިނަ އަދަދެއްގެ ބިދޭސީންނާއި ކުންފުނިތައް ވެސް ހިމެނެ އެވެ.
ކަސްޓަމްސްއިން އަމަލުކުރަމުންދާ އުސޫލުގައިވާ ގޮތުން، އެ އިދާރާއަށް ދައްކަންޖެހޭ ފައިސާގެ އަދަދު 10،000ރ. އަށްވުރެ އިތުރުވެ، އެ ފައިސާ ދައްކަން ކަނޑައަޅާފައިވާ މުއްދަތު ހަމަވުމުން ލިޔުމުން އެކަން އެންގުމަށްފަހު އެ ފަރާތެއްގެ ނަން ކަސްޓަމްސްގެ ވެބްސައިޓުގައި ހާމަކުރާނެ އެވެ.
އުސޫލުގައިވާ ގޮތުން ފައިސާ ނުދައްކާ ފަރާތްތަކުގެ މައުލޫމާތު ހާމަކުރާނީ ކަސްޓަމްސްގެ ރަސްމީ ވެބްސައިޓުގެ އިތުރުން، ސަރުކާރުގެ ގެޒެޓާއި ކަސްޓަމްސްގެ ރަސްމީ ސޯޝަލް މީޑިއާ ޕްލެޓްފޯމުތަކުގައެވެ.
އެއްބަސްވުމެއްގެ ދަށުން ނުވަތަ އެކީ ފައިސާ ދައްކައި ހަލާސްރުމުން، ކަސްޓަމްސްގެ ވެބްސައިޓުގައިވާ ލިސްޓުން އެ ފަރާތެއްގެ ނަން އުނިކުރެވޭނެ ކަމަށް އުސޫލުގައިވެ އެވެ. ނަމަވެސް، ގެޒެޓުގައި ޝާއިއުކުރާ ލިސްޓުން އެ ނަމެއް އުނިއެއް ނުކުރެވޭނެ އެވެ.
