އިންފޮމޭޝަން ކޮމިޝަނަރުގެ މަގާމުގައި ހުންނެވި އާހިދު ރަޝީދުގެ ދައުރު ހަމަވާތީ، އެ މަގާމަށް ކުރިމަތިލުމުގެ ފުރުސަތު ރައީސް އޮފީހުން އިއްޔެ ހުޅުވާލައިފި އެވެ. އާހިދު އެ މަގާމަށް އައްޔަން ކުރައްވާފައިވަނީ ސެޕްޓެމްބަރު 6، 2021 ގައެވެ.
ރައީސް އޮފީހުން ކުރި އިއުލާނެއްގައި ބުނީ، މި މަހުގެ 16 ވަނަ ދުވަހުގެ ނިޔަލަށް އިންފޮމޭޝަން ކޮމިޝަނަރުގެ މަގާމަށް ކުރިމަތިލާން ފޯމު ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ.
މި މަގާމަށް ކުރިމަތިލާން ހުޅުވާލިއިރު، މިނިވަން ދުވަހުގެ ޖަލްސާގައި ރައީސް މުހައްމަދު މުއިއްޒު ވަނީ ސާބިތު އެއްވެސް ހެއްކެއް ދެއްކެވުމެއް ނެތި، މިހާރުގެ އިންފޮމޭޝަން ކޮމިޝަނަރަކީ އިދިކޮޅުގެ އޯޑަރަށް މަސައްކަތް ކުރައްވާ، އިދިކޮޅު ސިޔާސީ ފަރާތެއް ކަމަށް ތުހުމަތުކުރައްވާފައެވެ.
ރައީސް މުއިއްޒު މިހެން ވިދާޅުވީ، ރައީސް އޮފީސް ހިމެނޭހެން ސަރުކާރުގެ އިދާރާތަކުން މައުލޫމާތު ހާމަނުކުރާ މައްސަލަތަކުގައި ސަރުކާރާ ދެކޮޅަށް ބައެއް ނިންމުންތައް ނިންމަވައި، ރައީސް އޮފީސް ޖޫރިމަނާކުރި ފަހުންނެވެ.
އިންފޮމޭޝަން ކޮމިޝަނަރުގެ ވާޖިބަށް ހުރަސްއަޅައިގެން ރައީސް އޮފީސް ޖޫރިމަނާކޮށްފި
މައުލޫމާތު ހޯދައި ލިބިގަތުމުގެ ގާނޫނުގެ ދަށުން އެދޭ މައުލޫމާތުތައް ދިނުމަށް އައިކޮމް އިން އެންގި މުއްދަތުގައި ޖަވާބުދާރީ ނުވުމުން، ރައީސް އޮފީސް 2،000ރ. ޖޫރިމަނާކޮށްފި. ކޮމިޝަނަރު އާހިދު ވިދާޅުވީ މިގޮތަށް ނިންމީ ތަކުރާރުކޮށް ފުރުސަތު ދިނުމުންވެސް އެ އޮފީހުން އަމަލުކޮށްފައި ނުވާތީ، އެއީ ކޮމިޝަނަރުގެ ވާޖިބަށް ހުރަސްއެޅުން ކަމަށް ދެކޭތީ ކަމަށް.
މި ތުހުމަތުތަކަށް ރައްދު ދެއްވަމުން އާހިދު ވަނީ މަގާމުގެ މަސްއޫލިއްޔަތު އަދާކުރައްވަނީ އެއްވެސް ފަރާތެއްގެ ނުފޫޒެއް ނެތި ކަމަށް ވިދާޅުވެފަ އެވެ.
އާހިދުގެ މައްޗަށް މިވަރުގެ ތުހުމަތު ކުރެއްވިއިރު އޭނާގެ މައްޗަށް އެއްވެސް ޝަކުވާއެއް ޕީއެންސީގެ ސުޕަ މެޖޯރިޓީ އޮތް މަޖިލީހަށް ހުށަހަޅައި ކުރިއަށް ގެންގޮސްފައެއް ނުވެ އެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގައިވާ ގޮތުން، އިންފޮމޭޝަން ކޮމިޝަނަރުގެ މަގާމަށް އައްޔަންކުރާ މީހެއްގެ ކިބައިގައި ހުރުން ލާޒިމު ސިފަތަކުގެ ތެރޭގައި؛ އުމުރުން 35 އަހަރުވެފައިވުމާއި، އިސްލާމްދީނުގައި ހައްދެއް ކަނޑައެޅިފައިވާ ކުށެއް ނުވަތަ ހިޔާނާތުގެ ނުވަތަ ރިޝްވަތުގެ ކުށެއް ކުރިކަން ޝަރީއަތަށް ސާބިތުވެފައިވާ މީހަކު ކަމުގައި ނުވުން ހިމެނެއެވެ. އަދި އިންތިހާބުކުރެވޭ ނުވަތަ އައްޔަންކުރެވޭ ސިޔާސީ މަގާމެއް ފުރަމުންދާ މީހަކު ކަމުގައި ނުވުމާއި، ސިޔާސީ ޕާޓީއެއްގެ މެންބަރަކު ނުވަތަ ސިޔާސީ ހަރަކާތްތަކުގައި އުޅޭ މީހަކު ކަމުގައި ނުވުމުގެ އިތުރުން، ފުރަތަމަ ޑިގްރީއެއް ހާސިލުކޮށްފައިވުމާއެކު މަދުވެގެން 7 އަހަރުގެ މަސައްކަތުގެ ތަޖުރިބާ ލިބިފައިވުމާއި، އެހެން ވަޒީފާއެއް އަދާކުރާ މީހަކު ކަމުގައި ނުވުންވެސް ހިމެނެ އެވެ.
ގާނޫނުގައިވާ ގޮތުން އިންފޮމޭޝަން ކޮމިޝަނަރުގެ މަގާމުގެ މުއްދަތަކީ 5 އަހަރުގެ އެއް ދައުރެވެ. ނަމަވެސް ގާނޫނުގައިވާ ގޮތުގެމަތިން ވަކިކުރެވޭ ހާލަތެއްގައި ފިޔަވައި، މަގާމުގައި ހުންނެވި ބޭފުޅެއްގެ މުއްދަތު އިތުރު 5 އަހަރަށްވުރެ ދިގުނޫން މުއްދަތަކަށް އިތުރުކުރުމަށް ރައްޔިތުންގެ މަޖިލީހަށް ފާސްކުރެވިދާނެ އެވެ.
އިންފޮމޭޝަން ކޮމިޝަނަރުގެ މަގާމަށް އެދި ހުށައަޅާ ފޯމު ބަލައިގަންނާނީ ރަސްމީ ބަންދު ދުވަސްތައް ފިޔަވައި، އެހެން ދުވަސް ދުވަހުގެ ހެނދުނު 08:30 އިން މެންދުރު 12:00 އަށް، ރައީސް އޮފީހުންނެވެ. މި މަގާމަށް ކުރިމަތިލުމަށް އެދޭ ފޯމު ރައީސް އޮފީހުގެ ވެބްސައިޓުން ޑައުންލޯޑް ކުރެވޭނެ އެވެ.
