އިއްޔެ ހަވީރު ކުޅުނު މެޗުން، ބްލޫ ސްޕޯޓްސް ކްލަބް 3-1 އިން ބަލިކޮށް، ބުރު ސްޕޯޓްސް ކްލަބުން އެފްއޭ ކަޕް ފުޓްބޯޅަ މުބާރާތުގެ ތިން ވަނަ ހޯދި މެޗަށް ފަހު، ބުރުގެ ކޯޗު މުހައްމަދު ނިޒާމް (ނިޒާމްބެ)، ރާއްޖޭގެ ފުޓްބޯޅައިގެ މުސްތަގުބަލަށް ވިސްނައި ރަނގަޅު މެސެޖެއް ދީފި އެވެ.
މެޗަށް ފަހު ދިން އިންޓަވިއުގައި ނިޒާމްބެ ވަނީ އަންނަ ސީޒަނުގައި އެއްވެސް ޓީމަކުން ފެނުމުގެ ފުރުސަތު ކުޑަ ކަމަށް ބުނެފަ އެވެ. އަދި، ވިސްނުން ހުރީ، ފުޓްބޯޅައާ ދުރަށް އެހެން ދިމާލަކަށް ދިއުން ކަމަށް ވެސް ނިޒާމްބެގެ ވާހަކައިގައި ފާހަގަކޮށްފައިވެ އެވެ. ރާއްޖޭގެ ފުޓްބޯޅައިގައި، ކުޅުމުގެ އިތުރުން ކޯޗިން ކެރިއަރަށް ބަލާނަމަ، 30 އަށް ވުރެން ގިނަ އަހަރު ހޭދަކޮށްފައިވާ ނިޒާމްބެ ފުޓްބޯޅައިން ދުރަށް ޖެހިލުމުގެ އެ ވިސްނުން އައި ސަބަބު، "އަދަދު ސްޕޯޓްސް" އަށް، މިއަދު ވަނީ ހިއްސާކޮށްފަ އެވެ.
ނިޒާމްބެ ބުނީ ރާއްޖޭގެ ފުޓްބޯޅަ އަށް ޓަކައި އަމިއްލަ އަށް ހުންނަ ޝައުގުވެރިކަމުގެ ސަބަބުން ގިނަ ވަގުތުތަކެއް މި ކަމަށް ދީގެން އެތައް އަހަރުތަކެއް ވަންދެން މަސައްކަތްތަކެއް ކުރެވިއްޖެ ކަމަށެެެވެ. އެހެން ނަަމަވެސް ދިވެހި ކޯޗުންނަށް މި ކަމުން ކުރިއަރައިގެން ދިއުމަށް ބޭނުންވާ ފުރުސަތު އެކަށީގެންވާ މިންވަރަށް ނެތްއިރު، ފުޓްބޯޅައިގައި މިހާރު ފެންނަމުން އަންނަ މަންޒަރުތަކަށް ބަލާއިރު ކަންކަން ހުރީ މުޅި ފުޓްބޯޅަ އަށް އެންމެ ފައިދާ ކުރާ ގޮތަށް ނޫން ކަމަށް ނިޒާމްބެ ވަނީ ފާހަގަކޮށްފަ އެވެ.
"ދައުލަތުގެ ފައިސާ އިން ދެ ޓީމެއް ވަރުގަދަވެގެންދާތަން މި ފެންނަނީ. ދެން ތިބި ޓީމުތަކަށް މީގެއިން ވާނީ ގެއްލުން. ރާއްޖޭގެ ފުޓްބޯޅައިގެ ދުރު މުސްތަގުބަލަށް ބަލާއިރު މީގެއިން ފައިދާއެއް ނެތް. އެހެންވީމަ، ހިތައް މި އަރަނީ ހަގީގަތުގައި މި ކުރެވެނީ ރާއްޖޭގެ ފުޓްބޯޅަ އަށް ރަނގަޅު މަސައްކަތެއް ބާއޭ. ހަގީގަތަކީ މި ގޮތަށް މި ކުރެވޭ ކަމަކީ ފުޓްބޯޅަ އަށް ރަނގަޅަށް (ސަސްޓެއިން ކުރެވޭނެ ގޮތަށް) ކުރެވޭ މަސައްކަތެއް ނޫނޭ،" ނިޒާމްބެ ބުންޏެވެ.
"ހަގީގަތުގައި ވަރަށް އުނދަގޫ ދެން ހުރި ޓީމުތަކަށް، އެހެންވީމަ ފުޓްބޯޅައާ ދުރު އެހެން ދިމާލަކުން ވެސް ފެނިދާނެ،"
ދައުލަތުގެ ފައިސާ އިން ހަރަދުކުރާ ދެ ޓީމެއް ކަމަށް ނިޒާމްބެ އިޝާރާތް އެ ކުރީ، ނިއު ރޭޑިއަންޓް ސްޕޯޓްސް ކްލަބާއި ވިކްޓަރީ ސްޕޯޓްސް ކްލަބް އެވެ. ނިއު އާއި ވިކްޓަރީގެ ބޯޑުގައި މި ސަރުކާރާ ގުޅޭ ގިނަ ފަރާތްތަކެއް ހިމެނެ އެވެ. އަންނަ ސީޒަނަށް ޓީމު ވަރުގަދަ ކުރުމުގެ ވާހަކަތައް މިހާރު ޓީމުތަކުން ފަށާފައިވާއިރު، އެންމެ ވަރުގަދަ އަށް އިވެނީ ނިއު އާއި ވިކްޓަރީގެ އަޑެވެ.
ނިޒާމްބެ ބުނީ ލީގުގެ ކަންކަން ހިނގަމުން އަންނަ ގޮތަށް ބަލާއިރު، ދިވެހި ކޯޗުންނަށް މީގެ ހުރި ފުރުސަތުތައް ހަނިވަމުން އައުމަކީ ވެސް ކަންބޮޑުވުމެއް ކަމަށެވެ.
ރާއްޖޭގެ ފުޓްބޯޅަ "ވެންޓިލޭޓަރުން ނަގަން" ކުރެވޭ ކަންކަމާ މެދު ވިސްނަންޖެހޭ: ނިޒާމްބެ
ދެ އަހަރެއްހާ ދުވަހު ރާއްޖޭގައި ފުރަތަމަ ޑިވިޝަނުގެ ފުޓްބޯޅަ ނުކުޅެ އޮވެފައި، އަލުން ފަށައިގެން މަސައްކަތް ކުރާއިރު، ރާއްޖޭގެ ފުޓްބޯޅަ "ވެންޓިލޭޓަރުން ނަގަން" ކުރެވޭ ކަންކަމާ މެދު ވިސްނަން ޖެހޭ ކަމަށް ބުރު ސްޕޯޓްސް ކްލަބްގެ ކޯޗު މުހައްމަދު ނިޒާމް (ނިޒާމްބެ) ވަނީ ބުނެފައި
މި ސީޒަނުގައި ނިޒާމްބެ ވަނީ މީގެ ކުރިން ވެސް މި ވާހަކަތައް ހިއްސާކޮށްފަ އެވެ.
އެ ގޮތުން، މި ފަހަރުގެ ޕްރެޒިޑެންޓްސް ކަޕްގެ ސެމީ ފައިނަލުގައި ބުރު ކުޅުނު މެޗަށް ފަހު، މީޑިއާ އަށް ދިން އިންޓަވިއުއެއްގައި، ނިޒާމްބެ ބުނެފައިވަނީ، ފުރަތަމަ ޑިވިޝަނުގައި ވާދަކުރާ ގިނަ ޓީމުތަކަށް ހުރި ޗެލެންޖަސް ބޮޑު ކަމަށެވެ.
"ޗެލެންޖަސް އެބަހުރި، ވަރަށް ބައިވަރު ޗެލެންޖަސް އެބަހުރި، ބުރަށް އެކަންޏެއް ނޫން ކަންނޭނގެ، ދެތިން ކްލަބެއް ނަގާފައި ހުރިހާ ކްލަބަކަށް ވެސް އެބަހުރި މި ޗެލެންޖު، ދެން، އަހަރެމެން އަދި ކިތަންމެ ބާރުލާފައި ވެންޓިލޭޓަރުން ނެގިޔޭ ބުންޏަސް، ވެންޓިލޭޓަރުން ނަގަން އެންމެ ރަނގަޅު ޕްރޮސަސްތޯ އަހަރެމެންނަށް ފޮލޯ ކުރެވުނީ އެ ވެސް ވިސްނަން ޖެހޭ ކަމެއް،" ނިޒާމްބެ ބުންޏެވެ.
"އަަހަންނަށް ފެންނަ ގޮތުގައި އަދިއެއް ބުނަން އަވަސް، އެންމެ ރަނގަޅޭ، އެންމެ ބަރާބަރޭ، ދެން، ހީވަނީ، ގިނަ ކްލަބްތަކަށް އަންނަ ސީޒަނާ ހަަމައަށް އަންނައިރު ވަރަށް ބޮޑެތި މަސައްކަތްތަކެއް ނުކޮށްފިކަމަށްވަންޏާމު ވަރަށް ބޮޑެތި ޗެލެންޖަސްތަކާ ކުރިމަތިލާން ޖެހޭނެއޭ،"
އެފްއޭ ކަޕްގެ ފައިނަލަށް ޓީސީ ގޮވައިގެން ދިޔަ ކޯޗު މުހައްމަދު އާތިފް (އާތީ) ވަނީ ސެމީ ފައިނަލުގައި ބުރު އަތުން މޮޅުވި މެޗަށް ފަހު، ބުރު ގޮވައިގެން އުނދަގޫ ހާލަތެއްގައި އޮވެ، ނިޒާމްބެ ކުރި މަސައްކަތް ފާހަގަކޮށްފަ އެވެ.
ރާއްޖޭގެ ފުރަތަމަ ޑިވިޝަނުގައި ލ. ކަލައިދޫ ފުޓްބޯޅަ ޓީމު، ވިޔަންސާ، ޓީސީ ސްޕޯޓްސް ކްލަބް، މާޒިޔާ ސްޕޯޓްސް އެންޑް ރެކްރިއޭޝަނަށް ކޯޗުކޮށްދިން ނިޒާމްބެ ވަނީ، ބަންގްލަދޭޝް ޕްރިމިއާ ލީގުގެ ސައިފް ސްޕޯޓިން ކްލަބަށް ކޯޗުކޮށްދީފަ އެެވެ. އޭގެ އިތުރުން، ގައުމީ އަންހެން ފުޓްބޯޅަ ޓީމާއި ޔޫތު ގައުމީ ޓީމުތަކަށް ބަލާއިރު، 16 އަހަރުން ދަށާއި 19 އަހަރުން ދަށުގެ ޓީމަށް ކޯޗުކޮށްދީފަ އެވެ.
