ލައިގެން ހުރި ޖަނގިޔާގެ ތެރެއިން މަސްތުވާތަކެތި ފެނިގެން، ސާބިތުވެއްޖެ ނަމަ އުމުރު ދުވަހުގެ ޖަލު އަދަބެއް ލިބޭ ދައުވާއަކާ ކުރިމަތިލާންޖެހުނު ވެރިކަން ހިންގާ ޕީޕަލްސް ނެޝަނަލް ކޮންގްރެސްގެ މެންބަރަކު ސަލާމަތްކޮށްދީފި އެވެ.
އެއްވެސް އަދަބެއް ނުލިބޭނެކަން ޔަގީންވާނެ ގޮތަށް ހއ. ހޯރަފުށީ، އިރުދޯދި، އައިޝަތު ފަހުދާ މިދިޔަ ބުދަ ދުވަހު ސަލާމަތްވީ އޭނާގެ މައްޗަށް ޕްރޮސެކިއުޓާ ޖެނެރަލް އައްބާސް ޝަރީފް އުފުލި މަސްތުވާތަކެތި ޓްރެފިކް ކުރުމުގެ ކުށުގެ ދައުވާ އަނބުރާ ގެންދިޔުމުންނެވެ.
ޕީއެންސީގެ މެންބަރުންގެ ދަފުތަރުގައި މިއަދު ވެސް ނަން އޮތް ފަހުދާގެ މައްޗަށް އުފުލާފައި އޮތް ދައުވާ އަނބުރާ ގެންދިޔަ ސަބަބެއް ކަމަށް އައްބާސްގެ ފަރާތުން ލ. ފޮނަދޫ މެޖިސްޓްރޭޓް ކޯޓުގައި ބުނީ، ފަހުދާގެ ޖަނގިޔާ ތެރެއިން ފެނުނު މަސްތުވާތަކެއްޗާ އެހެން މީހަކު ހަވާލުވުމެވެ.
"އައިޝަތު ފަހުދާގެ މައްޗަށް ހުށަހަޅާފައި މި ވާ ޑައިމޯފިން ޓްރެފިކް ކުރުމުގެ ކުށުގެ ދައުވާ އެ އޮފީހުން މުރާޖައު ކުރިއިރު، މި މައްސަލައިގައި ފެނުނު މަސްތުވާތަކެއްޗަށް މި މައްސަލައިގައި ދައުވާ ލިބޭ އިބްރާހިމް އިމާދު ޒިންމާނަގައި އޭނާގެ މައްޗަށް ދައުވާ ސާބިތުވާ ކަމަށް ހުކުމްކޮށްފައިވާތީ އާއި މައްސަލައިގައި ވަށައިގެންވާ ކަންކަމަށް ރިއާޔަތްކޮށް މި މައްސަލަ އިތުރަށް ކުރިއަށް ނުގެންދިއުމަށް އެ އޮފީހުން ނިންމާފައިވޭ،" އެ މައްސަލައިގައި ފޮނަދޫ ކޯޓުން ބުނެފައިވެ އެވެ.
ފަހުދާގެ ޖަނގިޔާ ތެރެއިން ފެނުނު މަސްތުވާތަކެއްޗާ ހަވާލުވީ ނޮވެމްބަރު 18، 2024، ގައި ފަހުދާ ހައްޔަރު ކުރިއިރު އޭނާއާއެކު ހުރި އިމާދެވެ. އެ ދެ މީހުން ހައްޔަރު ކުރީ މަސްތުވާތަކެތި ވިއްކަމުންދާ ކަމުގެ މައުލޫމާތު ލިބިގެންނެވެ. ފަހުދާ ހައްޔަރުކޮށް ޕޮލިސް ސްޓޭޝަނަށް ގެންދިޔުމަށްފަހު ބަލައި ފާސް ކުރީ ކޯޓު އަމުރެއް ހޯދައިގެންނެވެ.
މަސްތުވާތަކެތި ފެނުނީ ފަހުދާ ލައިގެން ހުރި ޖަނގިޔަލުގައި ހަރުކޮށްފައި އޮތް ސެނިޓަރީ ޕެޑުގެ މަތީގައި ޓޭޕު އޮޅާފައި އޮތް ޖޫސްޕެޓީ ކޮތަޅެއްގެ ތެރެއިންނެވެ. އެ ކޮތަޅުން 9.2 ގްރާމުގެ މަސްތުވާތަކެތި ފެނުނެވެ. ފެނުނީ ބާރުގަދަ އަދި ރާއްޖޭގައި ވަރަށް ގަދަޔަށް ބޭނުން ކުރާ ހެރޮއިން (ހަކުރު) އެވެ.
ގާނޫނުގައި ބުނެފައިވާ ގޮތުން އެމީހެއްގެ އަތުން ހަތަރު ގުރާމަށްވުރެ ގިނައިން ހެރޮއިން ފެނިއްޖެ ނަމަ އަދަބަކީ އުމުރަށް ޖަލަށްލުމާއެކު އެއް ލައްކަ ރުފިޔާ އާއި 10 މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރުމެވެ.
ފަހުދާގެ މައްޗަށް ދައުވާ އުފުލުށްފަހު އޭނާއާ ދެކޮޅަށް ޕްރޮސެކިއުޓާ ޖެނެރަލްގެ އޮފީހުން ވަރަށް ގިނަ ހެކި ހުށަހެޅި އެވެ. އޭގެ ތެރޭގައި މުއްދަތު މަޖިލީހަށް ހާޒިރު ކުރުމުން ކުށަށް އިއުތިރާފުވެ ފަހުދާ ދީފައިވާ ބަޔާން ވެސް ހިމެނެ އެވެ.
އެ ދައުވާ އަނބުރާ ގެންދަން ބޭނުންވާ ކަމަށް ޕީޖީ އޮފީހުން ބުނިއިރު، މަދަނީ މިންގަނޑުން އެ މައްސަލަ ކުރިއަށްގެންދެވޭނެ ކަމަށް ކޯޓުން އޮތީ ކަނޑައަޅަައިފަ އެވެ. އެގޮތަށް ކަނޑައެޅީ ޕްރޮސެކިއުޓާ ޖެނެރަލްގެ އޮފީހުން ހުށަހެޅި ހެކިތަކާއި ގަރީނާތަކަށް ބެލުމަށްފަހު ކަމަށް ކޯޓުން ބުނެ އެވެ.
މައްސަލަ އަނބުރާ ގެންދިޔައީ އިބްތިދާއީ އަޑުއެހުންތަކަށްފަހު މައްސަލައިގެ ޝަރީއަތް ފަށަން ގާތްވެފައި އޮއްވަ އެވެ. މައްސަލައިގެ އަޑުއެހުންތައް ފެށުމުގެ ކުރިން އެ މައްސަލައެއް އަނބުރާ ގެންދިޔުމުގެ ބާރު ޕްރޮސެކިއުޓާ ޖެނެރަލްއަށް ލިބެ އެވެ.
