ވެރިކަން ހިންގާ، ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ނައިބު ރައީސްގެ މަގާމަށް، ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އަސްމާ ރަޝީދު އާއި އޭނާގެ ދަރިކަލުން، ސަރުކާރުގެ ތަރުޖަމާނު މުހައްމަދު ހުސައިން ޝަރީފް (މުންދު) ކުރިމަތިލައްވައިފި އެވެ.
އަސްމާ ވާދަކުރައްވާކަން އިއުލާނު ކުރެއްވީ ޕީއެންސީގެ މަޖިލިސް މެންބަރުންގެ ވަޓްސްއެޕް ގްރޫޕުގަ އެވެ.
"މާތް اللهގެ ވާގިފުޅާއެކު، ކުރިއަށް އޮތް ކޮންގްރެސް ޕާޓީގެ މަތީ މަޖިލީހުން އިންތިހާބު ކުރާ ޕާޓީގެ ނައިބުރައީސުންގެ މަގާމަށް، އަޅުގަނޑު އަސްމާއްތަ (އަސްމާ ރަޝީދު) ކުރިމަތިލުމަށް ޤަސްތުކޮށް، ޕާޓީގެ މަތީ މަޖިލީހުގެ އެންމެހައި ލޮބުވެތި މެމްބަރުންގެ ތާޢީދަށް އެދެމުން، އެކަން އިއުލާން ކުރަމެވެ،" އަސްމާ ވިދާޅުވެފައިވެ އެވެ.
މިހާރު ވެސް ޕީއެންސީގެ ނައިބު ރައީސްގެ މަގާމުގައި ހުންނެވި މުންދު ވެސް އެ މަގާމަށް އަލުން ކުރިމަތިލައްވާކަން ވަނީ "އަދަދު" ނޫހަށް ކަށަވަރުކޮށްދެއްވައިފަ އެވެ.
މި އަހަރު ބާއްވާ ޕީއެންސީގެ ކޮންގްރެސްގައި ހަ ނައިބު ރައީސުން އިންތިޚާބުކުރާއިރު، މިހާތަނަށް ވާދަކުރައްވާނެކަން އިއުލާން ކުރެއްވި ބޭފުޅުންގެ އަދަދު ވަނީ 6 އަކަށް އަރައިފަ އެވެ.
| ކެންޑިޑޭޓް | މިހާރު ހުންނެވި މަގާމު | އިތުރު ތަފްސީލު |
| އިބްރާހިމް ޝުޖާއު | ބާރަށު ދާއިރާގެ މެންބަރު | އެންމެ ފުރަތަމަ ނަން އިއުލާން ކުރެއްވި ބޭފުޅާ. ރައީސް މުއިއްޒުގެ ތާއިދާއެކު ވާދަކުރައްވާ ކަމަށް ވިދާޅުވި. އަދި ސުޖާއުއަކީ މިހާރު ވެސް ޕާޓީގެ ނައިބު ރައީސެއް. |
| މުހައްމަދު ސައީދު | އިކޮނޮމިކް މިނިސްޓަރު | މިހާރު ވެސް ޕީއެންސީގެ ނައިބު ރައީސެއް. ރައީސް މުއިއްޒުގެ އިތުބާރާއެކު ވާދަކުރައްވަނީ |
| ފާތިމަތު ސައުދާ | ނިލަންދޫ ދާއިރާގެ މެންބަރު | ރައީސް މުއިއްޒުގެ އެއްބަނޑު ކޮއްކޮ. މީގެކުރިން ސިޔާސީ ޕާޓީއެއްގެ އިސް މަގާމެއް އަދާކުރައްވާފައިނުވޭ |
| އަބްދުالله ރާފިއު | ޔޫތު އެންޑް ސްޕޯޓްސް މިނިސްޓަރު | ހިތަދޫ އުތުރު ދާއިރާގެ ބައި-އިލެކްޝަނުގައި ޕީއެންސީ ކެމްޕޭން މެނޭޖަރުކަން ކުރެއްވި. އަދި މުއިއްޒުގެ ވަރަށް އަރިސް މިނިސްޓަރެއް |
| އަސްމާ ރަޝީދު | މާފަންނު މެދު ދާއިރާގެ މެންބަރު | ވަޓްސްއެޕް ގްރޫޕް މެދުވެރިކޮށް ކެންޑިޑެސީ އިއުލާން ކުރެއްވި. ކުރިން ރައީސް މުއިއްޒުއާ މައްސަލަ ޖެހި، މަޖިލީހުގެ އިޖުތިމާއީ ކޮމިޓީގެ މުގައްރިރުކަމުން ވަކިކުރި. އަދި މުންދު އާއި ސަލްމާ ރަޝީދު ސަފީރު ކަމުން ވަކިކުރެއްވި. ނަމަވެސް ފަހުން ސަލްމާ ވަކިކުރި ކަމުގެ ސިޓީ އަނބުރާ ގެންނެވި. އަދި އަސްމާގެ އަރިހުން މައާފަށް ވެސް މުއިއްޒު އެދިވަޑައިގެންނެވި ކަމަށް މައުލޫމާތު ލިބިފައިވޭ |
| މުހައްމަދު ހުސައިން ޝަރީފް | ސަރުކާރުގެ ތަރުޖަމާނު | އަސްމާ ރަޝީދުގެ ދަރިކަލުން، އަދި ޕީއެންސީގެ މިހާރު ވެސް ނައިބު ރައީސެއް |
ޕީއެންސީގެ ނައިބު ރައީސުންގެ މަގާމަށް ޝުޖާއު، ސައީދު، ރާފިއު އަދި ސައުދާ ވާދަކުރައްވަނީ
ޕީއެންސީގެ ނައިބު ރައީސުންގެ މަގާމަށް އިބްރާހިމް ޝުޖާއު، މުހައްމަދު ސައީދު، ފާތިމަތު ސައުދާ އަދި އަބްދުالله ރާފިއު ވާދަކުރައްވާނެކަން ވަނީ އިއުލާންކުރައްވާފަ. މީގެ ތެރެއިން ޝުޖާއު އާއި ސައީދު މިހާރުވެސް އެ މަގާމުގައި ތިއްބެވިއިރު، ހަތަރު ބޭފުޅުންވެސް ވާދަކުރައްވަނީ ރައީސް މުއިއްޒުގެ ތާއިދާއެކު.
ޕީއެންސީގައި މިހާރު ތިއްބެވި ނައިބު ރައީސުންގެ ތެރެއިން ފިޝަރީޒް މިނިސްޓަރު އަހުމަދު ޝިޔާމް، ކުރީގެ ޑިފެންސް މިނިސްޓަރު ޣައްސާން މައުމޫން، އަދި އެލްޖީއޭގެ ސީއީއޯ މުހައްމަދު ނިމާލް މިހާތަނަށް ކެންޑިޑެސީ އިއުލާން ކުރައްވާފައެއް ނުވެ އެވެ. ނައިބު ރައީސުންގެ ތެރޭގައި ރައީސުލްޖުމްހޫރިއްޔާގެ ނައިބު ހުސައިން މުހައްމަދު ލަތީފް ވެސް ހިމެނިވަޑައިގަންނަވައެވެ. ޕާޓީގެ ނައިބު ރައީސްގެ މަގާމަށް އަލުން ކުރިމަތި ލެއްވުމުގެ ޝައުގުވެރިކަމެއް އެމަނިކުފާނު އަދި ފާޅެއް ނުކުރައްވަ އެވެ.
ޕީއެންސީގެ ކޮންގްރެސް ބޭއްވުމަށް ތާވަލުކޮށްފައި ވަނީ އަންނަ ސެޕްޓެމްބަރު މަހުގެ މެދުތެރޭގައެވެ.
