އޭއެފްސީން އަންނަ ސީޒަނަށް މެމްބަރު ގައުމުތަކަށް ކްލަބް ފުޓްބޯޅަ މުބާރާތްތަކުން ލިބޭ ޖާގަތައް ކަނޑައެޅިއިރު، ރާއްޖޭން ލިބޭ ހަމައެކަނި ޖާގަ ދިވެހި ޕްރިމިއާ ލީގުގެ ޗެމްޕިއަން، މާޒިޔާ ސްޕޯޓްސް އެންޑް ރެެކްރިއޭޝަނަށް ލިބިއްޖެ އެވެ.
މި ފަހަރު ވެސް މާޒިޔާ އިން ދިވެހި ޕްރިމިއާ ލީގުގެ ޗެމްޕިއަންކަން ހޯދީ މެޗަކުން ބަލިނުވެ އެވެ. މިއީ، މާޒިޔާ އިން ޖެހިޖެހިގެން ލީގު ޗެމްޕިއަންކަން ހޯދި ފަސް ވަނަ ފަހަރެވެ.
އޭއެފްސީން މިއަދު އާންމުކުރި ގައުމުތަކަށް އޭއެފްސީގެ ކްލަބް މުބާރާތްތަކުން ޖާގަ ލިބޭ މިންވަރަށް ބަލާއިރު، ދެކުނު އޭޝިއާ ސަރަަހައްދުން އިންޑިއާ އަށް އޭއެފްސީ ޗެމްޕިއަންސް ލީގު ޓޫ އިން ދެ ޖާގަ ލިބޭއިރު، އެއް ޖާގަ އަކީ ގްރޫޕް ސްޓޭޖުގެ ޖާގަ އެކެވެ. ދެން، އޮތް ޖާގަ އަކީ ކޮލިފައިން ބުރުގެ ޖާގަ އެކެވެ.
ރާއްޖެ، ބަންގްލަދޭޝް، ބޫޓާން، ނޭޕާލް، ސްރީ ލަންކާ އަދި ޕާކިސްތާނަށް ފުރުސަތު ލިބެނީ ކޮންމެ ގައުމަކަށް އެއް ޖާގަ އެވެ. މި ހުރިހާ ޖާގަ އަކީ ވެސް އޭއެފްސީގެ ތިން ވަނަ ފަންތީ ކްލަބް ފުޓްބޯޅަ މުބާރާތް، އޭއެފްސީ ޗެލެންޖު ލީގުގެ ކޮލިފައިން ބުރުންނެވެ.
މީގެ ކުރިންް، އޭއެފްސީ ކަޕްގައި ރާއްޖޭން ކުޅުނުއިރު، ލީގު ޗެމްޕިއަނަށް ގްރޫޕް ސްޓޭޖުގެ ސީދާ ޖާގައެއް، އަދި އެފްއޭ ކަޕް ޗެމްޕިއަން އަށް ކޮލިފައިން ޖާގައެއް ދިނެވެ. އެކަމަކު، އޭއެފްސީން ކްލަބް ފުޓްބޯޅަ މުބާރާތްތަކުގެ ފޯމެޓް ބަދަލުކުރި ފަހުން، ގައުމުތަކުގެ ލީގުތަކުގެ ފެންވަރާއި ކޯއެފިޝަންޓް ޕޮއިންޓް ސިސްޓަމަށް ބަލައި، ފުރުސަތު ދޭން ފެށި ފަހުން ރާއްޖެ އަށް ލިބެނީ އެންމެ ޖާގައެކެވެ.
އޭއެފްސީ ޗެެލެންޖު ލީގު ފުރަތަމަ ބޭއްވި އަހަރު މާޒިޔާ އިން ވަނީ ގްރޫޕް ސްޓޭޖުގައި ކުޅެފަ އެވެ. އެއީ، ކުވެއިތުގައި ސެންޓްރަލައިޒްކޮށް ބޭއްވި ގްރޫޕް ބީގެ މެޗުތަކުގަ އެވެ. އެ ފަހަރު މާޒިޔާ ވަނީ ފުރަތަމަ މެޗުގައި، ތުރުކުމެނިސްތާން ޗެމްޕިއަން، އަދި އެ މުބާރާތުގެ ވެސް ފުރަތަމަ ތަށި އުފުލާލި ޓީމު، އަކްރަޑަގް އަތުން 2-1 އިން ބަލިވެފަ އެވެ. ދެ ވަަނަ މެޗުގައި، ކުވެއިތުގެ އަލް އަރަބިއާ ބައްދަލުކޮށް މާޒިޔާ ބަލިވީ 2-0 އިންނެވެ. ގްރޫޕް ސްޓޭޖުގެ ތިން ވަނަ މެޗުގައި، ކިރްގިސްތާންގެ އަބްދީޝް އަތުން މާޒިޔާ ބަލިވީ 3-0 އިންނެވެ.
މިދިޔަ އަހަރު މާޒިޔާ އިން ކުޅެން ޖެހުނީ ޕްލޭއޮފް ބުރުގަ އެވެ. މާލޭގައި އޮގަސްޓް މަހު ކުޅުނު ޕްލޭއޮފް މެޗުން، އަލް އަރާބި އަތުން މާޒިޔާ ބަލިވީ 4-0 އިންނެވެ.
ބޫޓާނުގެ ލީގު ޗެމްޕިއަނުންގެ ގޮތުގައި އަންނަ އަހަރުގެ ޗެލެންޖު ލީގުން ފުރުސަތު ހޯދީ ޕަރޯ އެވެ. ލަންކާ އިން ލީގު ޗެމްޕިއަން ރިނޯން އިން ޗެލެންޖް ލީގަށް ދާއިރު، ޕާކިސްތާން، ބަންގްލަދޭޝް އަދި ނޭޕާލުން ދާނެ ޓީމެއް ޔަގީންނުވެ އެވެ.
