ފާއިތުވި ހަތް އަހަރު މާޒިޔާ ސްޕޯޓްސް އެންޑް ރެކްރިއޭޝަނާ އެކު ގިނަ ކާމިޔާބީތަކެއް ހޯދި ގައުމީ ފުޓްބޯޅަ ޓީމުގެ ތަރި، ހަމްޒާ މުހައްމަދު (ހަމްޕު) އެ ކްލަބް ދޫކޮށްލަން ނިންމައިފި އެވެ.
ނިއު ރޭޑިއަންޓް ސްޕޯޓްސް ކްލަބްގެ ޔޫތު ޓީމުން 2014 ވަނަ އަހަރު ވިދާލި ހަމްޕު، އެންމެ ފުރަތަމަ ޕްރެކްޓިހަށް ނުކުތީ މާޒިޔާ އަށެވެ. އެކަމަކު އެ ޓީމާ އެކު އެއްބަސްވުމެއް ނުހެދިގެން އުޅެނިކޮށް އޭނާ ސޮއިކުރީ ނިއު އަށެވެ. ނިއުއާ އެކު ދިގު މުއްދަތުގެ އެއްބަސްވުމެއްގައި ސޮއިކޮށް 2018 ވަނަ އަހަރުގެ ނިޔަލަށް، ފަސް އަހަރު ހަމްޕު ވަނީ ނިއު އަށް ކުޅެފަ އެވެ.
މޯލްޑިވްސް ސްޕޯޓްސް އެވޯޑްސް އިން ހޮވި އެންމެ މޮޅު ފުޓްބޯޅަ ކުޅުންތެރިޔާގެ މަގާމު ހޯދާފައިވާ ހަމްޕު، މާޒިޔާ އަށް ސޮއިކުރީ، 2019 ވަނަ އަހަރު އެވެ. އެ ޓީމާ އެކު، ހަތަރު ފަހަރު ލީގު ޗެމްޕިއަންކަން ހޯދައި، އެފްއޭ ކަޕާއި ޕްރެޒިޑެންޓްސް ކަޕްގެ ޗެމްޕިއަންކަން ވެސް ހޯދި ހަމްޕު އަކީ، 2018 ވަނަ އަހަރު ސާފް ޗެމްޕިއަންޝިޕާއި މިދިޔަ އަހަރު ސައުތު އޭޝިއަން ސުޕަ ކަޕްގެ ޗެމްޕިއަންކަން ހޯދި ގައުމީ ފުޓްބޯޅަ ޓީމުގެ މުހިންމު ކުޅުންތެރިއެކެވެ.
ހަމްޕު، 31، ބުނީ މާޒިޔާ ދޫކޮށްލުމަކީ ފަސޭހަ ނިންމުމެއް ނޫން ކަމަށާއި އެ ކްލަބަކީ އޭނާގެ "ސެކަންޑް ހޯމް" ކަމަށެެވެ. އަދި، މިހާރު އޭނާ ހުރި ހިސާބަށް ވާސިލްވުމަށްޓަކައި، މާޒިޔާ އަކީ މުހިންމު ގިނަ ކަންތައްތަކެއް ފަހިކޮށްދިން ކްލަބެއް ކަމަށް ހަމްޕު ވަނީ ބުނެފަ އެވެ.
"އެންމެ ފުރަަތަމަ ދުވަހުން ފެށިގެން މި ކްލަބުން އަހަންނާ މެދު ބެހެއްޓި ގާތްކަން ކޮންމެ ޕްރެކްޓިހެއް އަދި ކޮންމެ މެޗެއްގައި ވެސް ފެނިގެންދިޔަ. އަހަންނަށް މި ކްލަބްގައި އެހީތެރިވެދިން ކްލަބްގެ މެނޭޖްމަންޓާއި ކޯޗުންނާއި އެންމެނަށް ވެސް ވަރަށް ޝުކުރު އަދާކުރަން. ވަރަށް ގަޔާވެގެން މި ކްލަބްގެ ކޮންމެ މީހެއް ވެސް އަބަދުވެސް ކޮށްދެމުން އަންނަ ހިދުމަތަށް އަބަދުވެސް ޝުކުރުވެރިވާނަން،" ހަމްޕު ބުންޏެވެ.
ފުޓްބޯޅައިގެ މަޝްހޫރު ރަށެއް ކަމަށްވާ، ބ. އޭދަފުށްޓަށް ނިސްބަތްވާ ހަމްޕު ބުނީ، މާޒިޔާގައި ހޭދަކުރި ވަގުތުތައް އަބަދަށް ވެސް ހަނދާނުގައި ހުންނާނެ ކަމަށެވެ.
"މާޒިޔާ އަށް އަބަދުވެސް އަހަރެން ހިތުގައި ހާއްސަ ޖާގައެއް އޮންނާނެ،" ހަމްޕު ބުންޏެވެ.
"މާޒިޔާ ދޫކޮށްލުމަކީ ފަސޭހަ ނިންމުމެއް ނޫން. އެކަމަކު، މި ކްލަބް ދޫކޮށްލަން ޖެހޭ މި ވަގުތުން ފެށިގެން އަބަދަށް ވެސް މި ކްލަބުން ދަސްވި ކަންކަމާ ބެހެއްޓި އެކުވެރިކަމާ އެ ހަނދާންތައް ތާ އަބަދަށް އަހަންނާ އެކު ވާނެ،"
އަންނަ ސީޒަނުގައި ގުޅޭނެ ޓީމެއް ކަނޑައެޅުމަށްޓަކައި، ހަމްޕު އަންނަނީ ކްލަބްތަކާ މަޝްވަރާ ކުރަމުންނެވެ.
