ހުޅުމާލޭގެ ޖަންކްޝަންތައް ފުރިގެން ނަޖިސް ބޭރުވާތީ ސިއްހީ ކާރިސާއެއް ދިމާވެދާނެތީ ކަންބޮޑުވުން ފާޅުކޮށް މުހައްމަދު މުއިއްޒަށް ސިޓީއެއް ފޮނުވައިފި އެވެ.
ހުޅުމާލޭގައި ދިރިއުޅޭ އަލީ އިބްރާހިމް ކިޔާ މީހަކު މުއިއްޒަށް ފޮނުވި ސިޓީގައި ބުނީ ހުޅުމާލެ ފޭސް 1 ގައި ހުންނަ ބްލޫހެވަން ރެސިޑަންސްގެ ޖަންކްޝަންތަކާއި ރީތިގަސް ރެސިޑެންސްގެ ޖަންކްޝަންތައް ފުރިގެން ނަޖިސް ބޭރުވަމުންދާއިރު އެކަމުގެ ސަބަބުން ހީނުކުރާވަރުގެ ސިއްހީ ކާރިސާއެއް ހިނގާފާނެ ކަމަށް ބެލެވޭ ކަމަށެވެ.
"މިކަމުގެ ސަބަބުން ހީނުކުރާވަރުގެ ސިއްހީ ކާރިސާއެއް ހިނގާފާނެ ކަމަށް ބެލެވޭ. އަދި ވަކިން ހާއްސަކޮށް ރަށުގެ ފެންފަށަލައަށް މިގޮތަށް ރޯ ނަޖިސް ބޭރުވުމަކީ ކިހާ ނުރައްކާ ކަމެއްކަން ހަމަގައިމުވެސް ތިޔަ މަނިކުފާނަށް އަޅުގަނޑަށްވުރެ ރަނގަޅަށް އެނގިވަޑައިގަންނަވާނެ،" އޭނާ ބުންޏެވެ.
އޭނާ ބުނީ މިކަން ހައްލުކުރަން ތަކުރާރުކޮށް އެމްޑަބްލިއުއެސްސީގައި އެދުނު ނަމަވެސް މިހާތަނަށް ދާއިމީ ހައްލެއް ލިބިފައި ނުވާ ކަމަށެވެ. މިކަމަށް ދާއިމީ ހައްލެއް ލިބޭނީ އެ ސަރަހައްދުގެ ޖަންކްޝަންތައް ސަރަހައްދަށް އެކަށީގެންވާ ގޮތަށް އަލުން ރީ ޑިޒައިންކޮށްގެން ކަމަށް އޭނާ ފާހަގަކުރި އެވެ.
"ދާއިމީ ހައްލަކަށްވާނީ މުޅި ހިސާބު އެއްކޮށް ރީޑިޒައިންކޮށް، އައިސީތައް ބަދަލުކޮށް މިޒާތުގެ އެތައް ކަމެއް ކޮށްގެން. އިތުރަށް އަޅުގަނޑަށް މައުލޫމާތު ލިބިފައިވާ ގޮތުގައި މި ހިސާބުގެ ނަޖިސް ލައިނަކީ، މި ހިސާބަށް އެކަށީގެންވާވަރަށްވުރެ މާކުޑަ ކެޕޭސިޓީއެއް ހުރި އެއްޗެއް. ކުރިން މި ހިސާބަކީ މިވަރުގެ އުސް އިމާރާތްތަކާއި، މާ ގިނަ ބަޔަކު އުޅޭ ސަރަހައްދެއް ކަމުގައި ކަނޑައެޅިފައި ނުވާތީ، މި ހިސާބުގައި އޮތީ ކުރީގެ ޕްލޭނަކަށް ހެދިފައިވާ ކުޑަ ނަޖިސް ލައިނެއް ކަމަށް މައުލޫމާތު ލިބޭ،" އޭނާ ބުންޏެވެ.
އަލީ އިބްރާހިމް ބުނީ ނަޖިސް ބޭރުވާ ސަރަހައްދުތަކުގައި މުޅިން އަލަށް ހަތަރު އިމާރާތް ކުރަމުންދާއިރު އެތަނުގައި މީހުން ދިރިއުޅެން ފެށުމުން އެ ސަރަހައްދަށް ނުކަތާވަރުވުމުން ދެން ވާނެ ގޮތެއް އަންދާޒާ ވެސް ނުކުރެވޭ ކަމަށެވެ.
މި މައްސަލައަށް ދާއިމީ ހައްލެއް ގެނައުމުގެ ވިސްނުން މިވަގުތު އެމްޑަބްލިއުއެސްސީގައި ނެތްއިރު، ދާއިމީ ހައްލެއް ގެނައުމުގައި މުއިއްޒުގެ އެހީތެރިކަމަށް އަލީ އިބްރާހިމް އެދިވަޑައިގެންނެވި އެވެ.
ހުޅުމާލޭގެ އިތުރުން މާލޭގެ އެކި ސަރަހައްދުތަކުގެ ޖަންކްޝަންތަކުން ވެސް ނަޖިސް ބޭރުވެ އެވެ. ނަމަވެސް ކޮންމެ ފަހަރަކު އެމްޑަބްލިއުއެސްސީން އެޓެންޑުވެ، އެތަނެއް ސާފުކުރަނީ އެވެ.
