ޕެރިސް (ޖުލައި 29) - ފީފާ އިން ފީފާ ފޯވާޑް އެންޓަޕްރައިސް (އެފްއެފްއީ)ގެ ނަމުގައި ތިން ވަނަ ފަރާތެއްގެ ބައިވެރިވުމާ އެކު ފަށަން ނިންމާފައިވާ 10 ބިލިއަން ޑޮލަރުގެ އިންވެސްޓްމަންޓް ޕްލޭންގެ ދަށުން ފީފާ ވޯލްޑް ކަޕް ފަދަ މުބާރާތްތަކުގެ ހިއްސާ ވިއްކަން އެކުލަވާލާފައިވާ ޕްލޭނާ ދެކޮޅަށް ޔުއެފާ އިން ތެދުވެއްޖެ އެވެ.
އެފްއެފްއީގެ ކަންކަން ކުރިއަށް ހިނގައިގަތުމަށްޓަކައި، ދުނިޔޭގެ މައި ފުޓްބޯޅަ އިދާރާ ފީފާގެ މެމްބަރު 211 ގައުމުގެ ވޯޓާ އެކު ފާސްކުރަން ޖެހެ އެެވެ. އަދި، އެ ގޮތަށް ފާސްވެއްޖެނަމަ، ފީފާގެ ދަށުން ހިންގާ ހުރިހާ މުބާރާތެއް، ވޯލްޑް ކަޕް ހިމެނޭހެން، ކުރިއަށްގެންދިއުމުގައި މާލީ ނަފާ ހޯދުމުގެ ފުރުސަތު އެފްއެފްއީއާ އެކު އަންނަ އިންވެސްޓަރުންނަށް ލިބޭނެ އެވެ.
ފީފާގެ ވިސްނުން ހުރީ، އެފްއެފްއީގެ މައިގަނޑު ހިއްސާދާރެއްގެ ގޮތުގައި، އެމެރިކާގެ ރައީސް، ޑޮނާލްޑް ޓްރަމްޕާ ގުޅުން އޮތް ކުންފުންޏެއް ކަމަށްވާ ތުރައިވް އެޓާނަލް އަށް ދޭ ގޮތަށެވެ. މިއީ، އިންފަންޓީނޯ އަށް ވެސް ކޮންމެ މަހަކު، އެތައް މިލިއަން ޑޮލަރު ފައިދާއެއް ވާނެ ޑީލެއް ކަމަށް ރިޕޯޓްތައް ބުނެ އެވެ.
ފީފާ އިން ބުނެފައިވަނީ، އެ އިދާރާގެ ރައީސް، އިންފަންޓީނޯ އާއި އެ ފެޑެރޭޝަނުގެ ޒިންމާ އަކީ އެފްއެފްއީ ކޮންޓްރޯލްކޮށްގެން ޑިވެލޮޕްކުރުން ކަމަށް ބުނެފަ އެވެ. ތަފްސީލީ ގޮތެއްގައި މިކަން މާނަ ކުރެވޭ ގޮތެއް ހާމަކޮށްފައެއް ނުވެ އެވެ.
އެފްއެފްއީ އައުމާ އެކު، ގައުމުތަކަަށް އެކި ކަންކަމުގައި ލިބޭ ފަންޑު، 20 މިލިއަން ޑޮލަރާ ހަމައަށް އިތުރުކުރެވިގެންދާނެ ކަމަށެވެ. އިންފަންޓީނޯ ވިދާޅުވީ، މާލީ ގޮތުން ބަލާއިރު، އެފްއެފްއީ އައުމަކީ ގައުމުތަކުގެ ފުޓްބޯޅަ އަށް ހެޔޮ ބަދަލުތަކެއް ގެނެވޭނެ ކަމެއް ކަމަށެވެ.
ފީފާ އިން ޕްރައިވެޓް ކުންފުނިތަކަށް ވޯލްޑް ކަޕް ފަދަ މުހިންމު ފުޓްބޯޅައިގެ އަސާސް ތައް ހިމެނޭ ޕްރޮޖެކްޓްތަކުގެ ބާރު ދޭ ގޮތަށް "ވިއްކާލަން" ތައްޔާރުކުރާ އެފްއެފްއީގެ ވިސްނުމަކީ ގޯހެއް ކަމަށް ޔޫރަޕްގެ މައި އިދާރާ ޔުއެފާ އިން ވަނީ ބުނެފަ އެވެ. އަދި، މިއީ، ފީފާ އިން އެއްވެސް ހާލަތެއްގައި ކޮށްގެންވާނެ ކަމެއް ނޫން ކަމަށް ޔުއެފާ އިން ނެރުނު ބަޔާނުގައި ބުނެފައިވެ އެެވެ.
"ފުޓްބޯޅައިގެ ރޫހާއި ދިރުމަކީ ވިޔަފާރި އުސޫލުން ވިއްކާލަން އޮތް އެއްޗެއް ނޫން. ހާއްސަ ގޮތެއްގައި ދެފުށްފެންނަ ނިޒާމެއްގެ ތެރެއިން ކަންކަން ނުހިނގާ ގޮތަށް ރޭވިފައި އޮތް ވިސްނުމެއްގެ ތެރެއިން އެކަން ކުރެވިގެން ނުވާނެ. އަހަރެމެންނަކީ ފުޓްބޯޅައިގެ ވެރިންނެއް ވެސް ނޫން. އަމުދުން އެއީ ފީފާ އަށް ވިއްކާލެވޭނެ އެއްޗެއް ވެސް ނޫން،" ޔުއެފާގެ ބަޔާނުގައިވެ އެވެ.
ޔުއެފާ އިން ވަނީ މި ފަދަ ކަންކަން ފީފާ އިން ބޭނުންވާހާ ގޮތަކަށް ކުރިއަށްދާނަަމަ، ޔޫރަޕްގެ ގައުމުތަކުން ފީފާ "ބޮއިކޮޓް" ކުރުމަކީ ވެސް އެކަށީގެންވާ ކަމެއް ކަމަށެވެ.
ރިޕޯޓްތައް ބުނާގޮތުގައި، އެފްއެފްއީގެ ކަންކަން ފާސްވެއްެޖެނަމަ، ވޯލްޑް ކަޕްގައި ވާދަކުރާ ޓީމުތައް އިތުރުކުރުމާއި ކޮންމެ ހަތަރު އަހަރެއްގެ ބަދަލުގައި ކޮންމެ ދެ އަހަރަކުން ވޯލްޑް ކަޕް ބޭއްވުމުގެ ވިސްނުން ވެސް ފީފާ އިން ގެންގުޅެ އެވެ.
