ޒިއުރިކް (ޖުލައި 28) - އެމެރިކާ، މެކްސިކޯ އަދި ކެނަޑާގައި މި ފަހުން ނިމިގެންދިޔަ ފީފާ ވޯލްޑް ކަޕްގައި އޭނާގެ ފަރާތުން ގޯހެއް ހަދާފައިނުވާނެ ކަމަށާއި ފީފާ އަށް ފާޑުކިޔާ މީހުންނަށް ހަމަނިދި ލިބޭނެ ކަމަށް އުންމީދުކުރާ ކަމަށް ފީފާގެ ރައީސް ޖިއާނީ އިންފަންޓީނޯ ވިދާޅުވެއްޖެ އެވެ.
އިންފަންޓީނޯ މި ގޮތަށް ވިދާޅުވީ، އޭނާގެ ރަސްމީ އިންސްޓަގްރާމް އެކައުންޓް މެދުވެރިކޮށް ސޯޝަލް މީޑިއާގައި އާންމުކުރި ދިގު ޕޯސްޓަކާއި ސްވިޒަލެންޑްގެ މީޑިއާ އަކަށް ދިން އިންޓަވިއުއެއްގަ އެވެ.
ވޯލްޑް ކަޕްގެ ތެރޭގައި، އެމެރިކާގެ ރައީސް، ޑޮނާލްޑް ޓްރަމްޕްގެ ސިޔާސީ ޕްރެޝަރާ ހެދި ފީފާ އިން ގޯސް ނިންމުންތަކެއް ނިންމިކަން ފާހަގަކޮށް، ނޯވޭގެ ފުޓްބޯޅަ ފެޑެރޭޝަނުން ފީފާ އެތިކްސް ކޮމިޓީ އަށް މައްސަލަ ހުށަހަޅާފައިވެ އެވެ. ޔުއެފާގެ ރައީސް، އަލެކްސަންޑަ ކެފެރިން ވެސް ފީފާގެ ނިންމުންތަކާ މެދު ފާޑުކިޔާފައިވާއިރު، އިންސާނީ ހައްގުތައް ކަށަވަރުކުރުމަށް މަަސައްކަތްކުރާ ޖަމިއްޔާއެއް ކަމަށްވާ ފެއާސްކޮޔާ އިން ވަނީ އިންފަންޓީނޯ އަށް ފިޔަވަޅު އަޅަން، އިންޓަނޭޝަނަލް އޮލިމްޕިކް ކޮމިޓީ އަށް ހުށަހަޅައިފަ އެވެ.
އިންފަންޓީނޯ އަށް ފިޔަވަޅު އެޅޭނެ ހަމައެއް ނެތް ކަމަށް އައިއޯސީން ބުނެފި
ފީފާ ވޯލްޑް ކަޕްގެ ތެރޭގައި ސިޔާސީ ނުފޫޒު ބޭނުންކޮށްގެން އޮލިމްޕިކް ޗާޓަރާ ހިލާފުވި ކަމަށް ބުނެ، ފީފާގެ ރައީސް ޖިއާނީ އިންފަންޓީނޯއާ މެދު ފިޔަވަޅު އަޅަން ހުށަހެޅި މައްސަލަ ބެލޭނެ ގާނޫނީ ބާރެއް ނެތް ކަމަށް އައިއޯސީން ބުނެފި
މި ހުރިހާ ކަމަކަށް ރިއާޔަތްކޮށް އިންފަންޓީނޯ ވިދާޅުވީ، ކޮންމެ ކަމަކާ ގުޅިގެން ވެސް ކޮންމެވެސް އެއް ބައެއްގެ ހިތްހަމަަނުޖެހުންތަކެއް އުޅޭނެކަން އެއީ ޔަގީންކަމެއް ކަމަށެވެ. އެކަމަކު، މި ކަންކަމާ ގުޅޭގޮތުން، ވާހަކަ ދައްކާއިރު، ދުނިޔޭގެ ފުޓްބޯޅައިގައި މީގެ ކުރިން ހިނގާފައިވާ ނޫނީ އައިސްފައިވާ ނިންމުންތަކަށް ބަލަން ޖެހޭނެ ކަމަށް އިންފަންޓީނޯ ވަނީ ވިދާޅުވެފަ އެވެ.
"ދެރަ ކަމަކީ، މި ގޮތަށް ކަންކަން ކޮށްފައި ހުރި ގައުމުތަކުން ވެސް (ފީފާ އަށާއި އޭނާ އަށް) ފާޑުކިޔާތީ،" 2016 ވަނަ އަހަރުން ފެށިގެން ފީފާގެ ރައީސްކަން ކުރައްވަމުން އަންނަ އިންފަންޓީނޯ ވިދާޅުވި އެވެ.
"އަހަންނަށް ފާޑުކިޔާ ގަލަންތަކާއި ކަރުދާސްތަކާއި ސްކްރީންތަކަށް. އުންމީދަކީ ހަމަޖެހުމަކާއި ހަމަނިންޖެއް ލިބުން. އަހަރެމެން ފީފާގައި އަމަލު މި ކުރަނީ އުސޫލުގެ ތެރެއިން، އަހަރެމެން ބޭއްވީ މިހާތަނަށް އެންމެ ކާމިޔާބު ވޯލްޑް ކަޕް. ފީފާގެ ރައީސެއްގެ ގޮތުގައި ހުރެ އަހަންނަށް ކުރެވުނީ ފަހުރުވެރިވާ މަސައްކަތެއް،"
އިންފަންޓީނޯ އަށް ވޯލްޑް ކަޕްގެ ތެރޭގައި ފާޑުކިޔުން އަމާޒުވި ކަންތައްތަކުގެ ތެރޭގައި، އެމެރިކާ އަށް ފައިދާވާ ގޮތަށް ބައެއް ކަންކަން ކުރުމާއި ބައެއް ގައުމުތަކަށާއި ސަޕޯޓަރުން އަދި ރެފްރީންނަށް ތަފާތު ގޮތްތަކެއް އެމެރިކާގެ އިދާރާތަކުން ހެދިއިރު، ފީފާ އިން ހަނުހުރުން ހިމެނެ އެވެ. އޭގެ ތެރޭގައި، ބައެއް ސަޕޯޓަރުންނާއި ރެފްރީން އަދި ކުޅުންތެރިންނަށް ވިސާ ހަމަނުޖެހުނުއިރު، އިރާން ގައުމީ ޓީމުގެ ކުޅުންތެރިންނާއި އޮފިޝަލުންނާ މެދު އެމެރިކާ އިން ކަންކަން ކުރި ގޮތާ މެދު ފީފާ އިން ރަނގަޅު ހައްލެއް ހޯދައިދީފައިނުވުން ވެސް ހިމެނެ އެވެ.
އެންމެ ހަމަނުޖެހުން ބޮޑުވި ކަމަކީ، މި ފަހަރުގެ ފީފާ ވޯލްޑް ކަޕްގެ ގަދަ 32 ޓީމު ބުރުގެ މެޗުގައި ބޮސްނިއާއާ ދެކޮޅަށް ކުޅެނިކޮށް، އެމެރިކާގެ ފޯވާޑް، ފަލޮރިން ބަލޮގަން އަށް ދެއްކި ރަތް ކާޑަށް ފަހު، އޭނާ އަށް ގަދަ 16 ބުރުގެ މެޗު ގެއްލޭނެ ކަމަށް ބެލެވުނެވެ. އެކަމަކު، ގަދަ 16 ބުރުގައި ބެލްޖިއަމާ ދެކޮޅަށް އެމެރިކާ އިން ކުޅުނު އެ މެޗަށް 48 ގަޑިއިރަށް ވުރެން ކުޑަތަންވެފައި އޮއްވައި، ފީފާ އިން ނިންމީ ބަލޮގަންގެ ރަތް ކާޑަށް ލުޔެއްދީ، ބެލްޖިއަމާ ދެކޮޅަށް ގަދަ 16 ބުރުގެ މެޗު ކުޅެވޭނެ ކަމަށެވެ.
