ކ. މާފުށީ ބޭރުގައި އަޅާފައި އޮތް ސަފާރީއެއް، މިއަދު ހެނދުނު އައި ކޮޅިގަނޑެއްގައި ނަގިލި ކަހާލައިގެން ގޮސް، އެ ރަށުގެ ބޭރު ތޮށްޓަށް އުރި ބޭނުން ނުކުރެވޭ ވަރަށް ފުނޑުފުނޑުވެއްޖެ އެވެ.
ފުލުހުން ބުނީ މާފުށީ ބޭރު ތޮށްޓަށް ސަފާރީއެއް އުރުނު ކަމުގެ ރިޕޯޓު ލިބިފައިވާ ކަމަށާއި މި ހާދިސާގައި އެއްވެސް މީހަކަށް ޖިސްމާނީ އަނިޔާއެއް ލިބިފައި ނުވާ ކަމަށެވެ.
މާފުށިން ވާހަކަ ދެއްކި ބައެއް މީހުން ބުނި ގޮތުގައި، މި ހާދިސާ ހިނގަން މެދުވެރިވީ މިއަދު ހެނދުނު އެ ސަރަހައްދަށް އައި ކޮޅިގަނޑެއްގެ ސަބަބުންނެވެ. ރަށުގެ ބޭރުގައި އަޅާފައި އޮތް މި ސަފާރީ، ވައިގަދަވެ ނަގިލި ކަހާލައިގެން ގޮސް ލެއްގީ ސީދާ ރަށުގެ ބޭރު ތޮށި މައްޗަށެވެ.
"ސަފާރީ އޮތީ އެއްކޮށް ފުނޑުފުނޑުވެ، އަލުން ބޭނުން ނުކުރެވޭ ވަރަށް ހަލާކުވެފައި،" މާފުށިން ވާހަކަ ދެއްކި މީހަކު ބުންޏެވެ.
މި ސަފާރީއަކީ އާންމުކޮށް މާފުށީ ބޭރުގައި އަޅާފައި ބާއްވައިގެން ފަތުރުވެރިންނަށް ހިދުމަތްތައް ދިނުމަށް ބޭނުންކުރާ އުޅަނދެކެވެ.
މައުލޫމާތު އެނގޭ މީހަކު ބުނި ގޮތުގައި، މި ސަފާރީ އޮޕަރޭޓް ކުރަމުން ދިޔައީ އޭގެ އަސްލު ވެރިފަރާތުގެ އަތުން ކުއްޔަށް ނަގައިގެން އުޅޭ ބައެކެވެ.
މި ސަފާރީ އޮޕަރޭޓްކުރާ ފަރާތުން ފޯނު ނުނަގާތީ އަދި ބަހެއް ނުލިބެ އެވެ.
