ޒިއުރިކް (އޮކްޓޫބަރު 22) - އެމެރިކާގެ ރައީސް ޑޮނާލްޑް ޓްރަމްޕްގެ ނުފޫޒުން އެ ގައުމުގެ ފޯވާޑް، ފަލޮރިން ބަލޮގަންގެ ރަތް ކާޑަށް ލުއިދޭން މި ފަހަރުގެ ފީފާ ވޯލްޑް ކަޕްގެ ތެރެއިން ނިންމުމާ ގުޅިގެން، އެ ފަަދަ ކަންކަން ކުރިއަށް އޮތްތަނުގައި ހުއްޓުވުމަށް ފީފާ ޑިސިޕްލިނަރީ ކޯޑަށް އިސްލާހެއް ހުށަހަޅައިފި އެވެ.
ފީފާ ވޯލްޑް ކަޕް ފުޓްބޯޅަ މުބާރާތުގައި އެމެރިކާ އިން ގަދަ 32 ޓީމުގެ ބުރުގައި، ބޮސްނިއާއާ ދެކޮޅަށް ކުޅުނު މެޗުގައި، ފަލޮރިން ބަލޮގަން އަށް ދެއްކި ރަތް ކާޑުގެ ކަންކަން ރަނގަޅަށް ބަލަން ފީފާގައި އެދުނީ އޭނާ ކަމަށް އެމެރިކާގެ ރައީސް ޑޮނާލްޑް ޓްރަމްޕް ވަނީ ވިދާޅުވެފަ އެވެ.
ބޮސްނިއާ އަތުން އެމެރިކާ މޮޅުވި މެޗުގައި ބަަލޮގަން ފުރަތަމަ ހާފުގައި އެމެރިކާ އަށް ލީޑުނަަގައިދިންއިރު، ދެ ވަނަ ހާފުގައި ބޮސްނިއާގެ ޑިފެންޑަރު، ޓަރެކް މުހަރެމޮވިޗަށް ނުރައްކާތެރި ފައުލެއް ކުރި ކަމަށް ބުނެ، ރަތް ކާޑެއް ދެއްކި އެވެ. ބަލޮގަން، ބޯޅަ ހޯދަން އުޅުމުގެ ތެރޭގައި ފައިން އެރުނީ މުހަރެމޮވިޗްގެ ފައި މައްޗަށެވެ. ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިގެން ބަލޮގަން އަށް ދެއްކި މި ރަތް ކާޑާ އެކު، އޭނާ އަށް އެއް މެޗުގެ ސަސްޕެންޝަނަށް އަންނާނެ އެވެ. އެހެންވެ، ގަވާއިދު ބުނާގޮތުން، އެމެރިކާ އިން ވޯލްޑް ކަޕްގެ ގަދަ 16 ޓީމުގެ ބުރުގައި ބެލްޖިއަމާ ކުޅޭ މެޗުގައި ބަލޮގަން އަށް ގެއްލޭނެ ކަމަށް ބެލެވުނު ނަމަވެސް، ފީފާ އިން ދިން ލުޔާއެކު ބެލްޖިއަމް މެޗުގައި އޭނާ އަށް ކުޅެވޭ ގޮތްވި އެވެ.
ފީފާ ޑިސިޕްލިނަރީ ކޮމިޓީން ނިންމީ ބަލޮގަންގެ މި ރަތް ކާޑުގެ ސަސްޕެންޝަނަށް އަމަލުކުރުން ސަސްޕެންޑްކޮށްފަ އެވެ. މި ސަސްޕެންޝަނާ އެއްގޮތަށް ބަލޮަގަން، އަދަބު ތަންފީޒުކުރާނީ، އެ ފަދަ ފައުލެއް ތަކުރާރުކޮށްފިނަމަ އެވެ. މި ނިންމުމާ މެދު ބެލްޖިއަމް އާއި ޔޫރަޕްގެ މައި ފުޓްބޯޅަ އިދާރާ، ޔުއެފާ އިން ނުރުހުން ބޮޑުކޮށް ފީފާ އަށް ފާޑުކިޔާފައިވާއިރު، މިދިޔަ ބުރާސްފަތި ދުވަހު އޮތް ފީފާ ކައުންސިލް ބައްދަލުވުމުގައި ވަނީ، ބަލޮގަންގެ ރަތް ކާޑަށް ލުއިދެވޭ ގޮތަށް ފީފާ ޑިސިޕްލިނަރީ ކޯޑުގައި އޮތް މާއްދާ އަށް އިސްލާހެއް ހުށަހަޅައިފަަ އެވެ.
މި އިސްލާހު ހުށަހެޅީ ބެލްޖިއަމްގެ ފުޓްބޯޅަ ފެޑެރޭޝަން ރައީސް އަދި ފީފާ ކައުންސިލް މެމްބަރު، ޕަސްކާލް ވެން ޑޭމް އެވެ. ވެން ޑޭމް ވިދާޅުވީ، ރަތް ކާޑަަކަށް ލުއިދޭނަމަ، އެ ދެވޭ ސަބަބެއް ތަފްސީލީ ގޮތެއްގައި މެޗު ރިޕޯޓާއި އެހެނިހެން ކަންކަމަށް ރިއާޔަތްކޮށް މި ކަމުގައި ޝާމިލުވާ ހުރިހާ ފަރާތަކަށް އެނގެންޖެހޭނެ ކަމަށެވެ. އަދި، ބަލޮގަންްގެ ރަތް ކާޑާ މެދު އަމަލުކުރި ގޮތަކީ ގަވާއިދަށް އިސްލާހު ގެންނަން ލާޒިމުކުރި ސަބަބެއް ކަމަށް ވެން ޑޭމް ވިދާޅުވެފައިވެ އެވެ.
ހުށަހަޅާފައިވާ އިސްލާހާ މެދު ގޮތެއް ނިންމާނީ، ޑިސެމްބަރު މަހު، ގަތަރުގެ ވެރި ރަށް ދޯހާގައި ބާއްވާ ފީފާ ކައުންސިލް ބައްދަލުވުމުގަ އެވެ.
