އަލަތު ކައިވެނީގެ ވަލީމާ ބާއްވަން މާލެ ސިޓީ ކައުންސިލުން ހިލޭ ބިން ހަމަޖައްސައިދިނުމުގެ މަސައްކަތް ކުރަން ފަށައިފި އެވެ.
އަލަތު ކައިވެނީގެ ވަލީމާ ބާއްވާނެ ބިން ހިލޭ ހަމަޖައްސައިދިނުމުގެ އުސޫލެއް ހެދުމަށް މިއަދު އޮތް މާލެ ސިޓީ ކައުންސިލުގެ ޖަލްސާގައި ވަނީ ނިންމައިފަ އެވެ. އެފަދަ އުސޫލެއް ހެދުމަށް ހުށަހެޅުއްވީ މާފަންނު ދެކުނު ދާއިރާގެ ކައުންސިލަރު، އިބްރާހިމް ލަބާން ޝަރީފް އެވެ.
އެކަމަށް ހާއްސަ އުސޫލެއް ހެދުމަށް ހަވާލުކުރީ މާލެ ސިޓީ ކައުންސިލުގެ ބަޖެޓު އެންޑް ރިސޯސް މޮބިލައިޒޭޝަން ކޮމިޓީ އާއި ސޯޝަލް ސާވިސަސް ޖެންޑާ އެންޑް ކޮމިއުނިޓީ އެފެއާސް ކޮމިޓީއާ އެވެ.
އެ ދެ ކޮމިޓީގެ ބެލުމުގެ ދަށުން އެ އުސޫލު ހެދުމަށްފަހު، މި އަންނަ ހަފުތާގެ ކައުންސިލް ޖަލްސާއަށް ހުށަހެޅުމަށް އާޒިމް އެދިވަޑައިގެންނެވި އެވެ.
އަލަތު ކައިވެނީގެ ވަލީމާ ބޭއްވުމަށް ކައުންސިލުން ހިލޭ ބިން ހަމަޖައްސައިދިނުމަކީ މޭޔަރު، އާދަމް އާޒިމްގެ ވައުދެކެވެ.
މާލެ ސިޓީ ކައުންސިލްގެ ދަށުގައި ހުންނަ ބިންތަކުގެ ތެރެއިން، ލޮނުޒިޔާރަތް ޕާކަކީ މިހާރު ވެސް ގިނަ އަދަދަކަށް ކައިވެނި ޕާޓީ ބާއްވާ ބިމެކެވެ. އޭގެ އިތުރުން ވެސް މާލެ ސިޓީ ކައުންސިލްގެ ބެލުމުގެ ދަށުގައި ކައިވެނި ޕާޓީއެއް ބޭއްވޭނެ ފަދަ ބިންތައް ހުރެ އެވެ.
