މާލެ ތޮއްޖެހުން ހައްލުކުރަން ސަރުކާރުން އިދާރާ އުފެއްދުމުގެ ބަދަލުގައި ކައުންސިލުން އެކަން ހައްލުކުރަން ކުރަމުންދާ މަސައްކަތަށް އެހީވާންވީ ކަމަށް މާލެ ސިޓީގެ މޭޔަރު އާދަމް އާޒިމް މިއަދު ވިދާޅުވެއްޖެ އެވެ.
އާޒިމް އަދަދު އަށް ވިދާޅުވީ މާލެ ސިޓީ ކައުންސިލުން މާލެ ތޮއްޖެހުން ހައްލުކުރަން ކުރަމުންދާ މަސައްކަތަށް އެހީތެރިވުމުގެ ރޯލެއް އަދާކުރުމުގެ ބަދަލުގައި އޮފީހެއް ގާއިމުކުރުމަކީ ބަޖެޓުން ފައިސާ އިސްރާފުކުރުން ކަމަށާއި އެކަން ސަރުކާރުން ކުރަމުންދަނީ ކައުންސިލުން މައްސަލަ ހައްލުކުރާނެތީ ކަމަށެވެ.
"މާލެ ސިޓީ ކައުންސިލުން މާލެ ޓްރެފިކް ހައްލުކުރަން މަސައްކަތް ކުރަމުން އެބަދަން. އެއަށް އެހީތެރިވެދިނުން ސަރުކާރުގެ ރޯލަކަށް ވާންޖެހޭނީ. އެކަން ކުރުމުގެ ބަދަލުގައި. ބަޖެޓް އިސްރާފުކުރުން އެހެން ގޮތަކަށް ބުނަންޏާ އެކަން އެކުރަނީ. އަޅުގަނޑުމެން އެކަން ކުރަން އުޅޭތީވެ، އަސްލު އަޅުގަނޑުމެން އެކަން ކުރާނެތީވެ، ޔަގީންވާނެތީ އެކަމުގެ ތެރެއަށް ވަދެގެން އެ އުޅެނީ. އާންމުކޮށް އެކަން ކުރައްވާ ގޮތް މި ސަރުކާރުން. އާންމު ކަމަކަށް ވެއްޖެ އެކަން ކުރުންވެސް،" މޭޔަރު ވިދާޅުވި އެވެ.
އާޒިމް ވިދާޅުވީ ސަރުކާރުން އިދާރާއެއް އުފެއްދި ނަމަވެސް، މާލެ ސިޓީ ކައުންސިލުން ކުރަމުންދާ މަސައްކަތް ހުއްޓާނުލާ ކުރިއަށްގެންދާނެ ކަމަށެވެ. އޭގެއިތުރުން އޭނާ ވިދާޅުވީ އެ އިދާރާއިން ސިޓީ ކައުންސިލަށް އެހީތެރިކަން ފޯރުކޮށްދޭނަމަ އެކަން ބަލައިގަންނާނެ ކަމަށެވެ.
"އަޅުގަނޑު ދެކޭ ގޮތުގައި އޮފީސްތައް އުފެއްދުމަކީ ބޭކާރު ކަމެއް އެކުރަނީ. އަޅުގަނޑުމެންގެ ފަރާތުން ހަމ މިކަން ހައްލުކުރުމަށް ކުރާ މަސައްކަތް ހުއްޓާ ނުލާ ކުރިއަށްގެންދާނަން. ދެން އެބޭފުޅުން އަޅުގަނޑުމެންނަށް އެހީތެރިކަން ފޯރުކޮށްދެންޏާ އެ އެހީތެރިކަން ބަލައިގަންނާނަން. އެކަމަކު ކޮންމެ ކަމަށްވާއިރަށް އޮފީހެއް ހެދުމަކީ ފައިސާ އިސްރާފުކުރުން،" އާޒިމް ވިދާޅުވި އެވެ.
މާލޭ ޓްރެފިކް ކޮންޖެޝަނާ ގުޅިގެން އދ. އާ ގުޅިގެންވެސް ދިރާސާތަކެއް ކުރަމުންދާކަން ފާހަގަކުރައްވާ އާޒިމް ވިދާޅުވީ ސިޓީ ކައުންސިލުން ކުރަމުންދާ މަސައްކަތަށް ސަރުކާރުން އެހީތެރިކަން ފޯރުކޮށްދޭނެ ކަމަށް އުންމީދުކުރައްވާ ކަމަށެވެ.
މޭޔަރު ވިދާޅުވީ މާލެ ތޮއްޖެހުން ހައްލުކުރުމަށް މާލެ ސިޓީ ކައުންސިލުން 30 އަހަރުގެ ޕްލޭނެއްގެ ދަށުން ލޭންޑް ޔޫޒް ޕްލޭނެއް ހަދަމުންދާ ކަމަށާއި އެކަމަކީ ޕްލޭންކޮށްގެން ވަށާޖެހޭ ގޮތެއްގައި ހުރިހާ ކަމަކަށް ރިއާޔަތްކޮށްގެން ކުރަން ޖެހޭ ކަމެއް ކަމަށެވެ.
ޓްރެފިކް މައްސަލަ ހައްލު ކުރަން މާލޭ ސިޓީ ކައުންސިލުން މަސައްކަތް ކުރަމުންދަނިކޮށް، އެކަމަށް ހާއްސަ އޮފީހެއް މުހައްމަދު މުއިއްޒު އުފެއްދެވީ މިދިޔަ އާދީއްތަ ދުވަހު އެވެ.
ޓްރެފިކް މައްސަލަ ހައްލު ކުރުމުގެ އެންމެ ބޮޑު މެންޑޭޓު އެއްގަމު ދަތުރުފަތުރުގެ ގާނޫނުގެ ދަށުން ހަވާލުކޮށްފައި ވަނީ ކައުންސިލާ އެވެ. މާލޭގައި އެންމެ ގިނަވެގެން ދުއްވޭނެ އުޅަނދުގެ އަދަދު ކަނޑައެޅުމަކީ ވެސް އޭގެ ތެރެއިން ކައުންސިލުގެ ޒިންމާއެކެވެ.
ޓްރެފިކް މައްސަލަ ހައްލު ކުރަން ކަމަށް ބުނެ ޓްރާންސްޕޯޓް މިނިސްޓްރީގެ ދަށުން "ގްރޭޓާ މާލެ ޓްރާންސްޕޯޓް އެންޑް މޮބިލިޓީ އޮފީސް" ނަމުގައި އިދާރާއެއް އުފެއްދިއިރު، ޓްރެފިކް މައްސަލަ އާއި ވެހިކަލް ތޮއްޖެހުމުގެ މައްސަލަ ހައްލު ކުރަން ކައުންސިލުން ވަނީ އެމްއެންޔޫއާ ހަވާލުކޮށްގެން ދިރާސާއެއް ވެސް ކުރިން ވަނީ ހަދައިފަ އެވެ.
މި އޮފީހުގެ މަސައްކަތްތައް:
- މާލެ ސަރަހައްދުގެ މަގުތަކުގެ ތޮއްޖެހުމުގެ މައްސަލަ ހައްލުކުރުމަށް ޓަކައި ކަމާބެހޭ ފަރާތްތަކާ ގުޅިގެން ޕުރޮގުރާމުތައް އެކުލަވައިލައި އެ ޕުރޮގުރާމުތައް ތަންފީޒުކުރުން
- އުޅަނދުތަކުގެ އަދަދު އިތުރުވުމުގެ ސަބަބުން ދިމާވެފައިވާ މަގުތައް ތޮއްޖެހުމުގެ މައްސަލައަށް ވަށާޖެހޭ ހައްލެއް ހޯދުމަށް ޓަކައި އެކުވައިލަންޖެހޭ ސިޔާސަތުތައް އެކުލަވައިލުމުގައި ކަމާބެހޭ ފަރާތްތަކަށް ލަފާދިނުން
- ދަތުރުފަތުރުގެ ނިޒާމު ޒަމާނީކޮށް، ޕާކުކުރެވޭނެ ވަސީލަތްތަކާއި އެހެނިހެން ޒަމާނީ ހައްލުތައް ހޯދައި، އެފަދަ ވަސީލަތްތައް ތަރައްގީކުރުމުގެ މަސައްކަތްތައް ތަންފީޒުކުރުމުގައި އިސްދައުރެއް އަދާކުރުން
މާލޭ ސިޓީ ކައުންސިލުން ކުރާ މުހިންމު މަސައްކަތްތައް ކުރަން ސަރުކާރުން އޮފީހެއް ހެދިއިރު، ދާދިފަހުން ބޭއްވި ކައުންސިލްތަކުގެ އިންތިހާބުގައި މާލޭ ސިޓީ ކައުންސިލުގެ މެޖޯރިޓީ އާއި މޭޔަރުގެ މަގާމް ކާމިޔާބު ކުރެއްވީ އިދިކޮޅު އެމްޑީޕީ އިންނެވެ.
އޭގެ ފަހުން ސަރުކާރުގެ ބައެއް އިދާރާތަކުން ދަނީ ކައުންސިލާއެކު މަސައްކަތް ކުރަން ވެސް ދެކޮޅު ހަދަމުންނެވެ. އޭގެ ތެރޭގައި ކޮންސްޓްރަކްޝަން މިނިސްޓްރީ ހިމެނެ އެވެ.
