ދުބާއީ، ޔޫއޭއީ (ޖުލައި 9) - ފްރާންސް ގައުމީ ޓީމުގައި ހިމެނޭ ކުޅުންތެރިންނާ ބެހޭގޮތުން، ބޮލީވުޑްގެ މަޝްހޫރު އެކްޓަރު، އަމީތާބް ބަޗަން، އެކްސްގައި ކުރި ޕޯސްޓެއްގެ މައްސަލައިގައި ގިނަ ސަޕޯޓަރުންތަކެއް ނުރުހުން ފާޅުކޮށްފި އެވެ.
އެމެރިކާ އާއި ކެނަޑާ އަދި މެކްސިކޯގައި މިހާރު ކުރިއަށްދާ ފީފާ ވޯލްޑް ކަޕް ފުޓްބޯޅަ މުބާރާތުގެ ގަދަ 16 ޓީމުގެ ބުރުގައި، ފްރާންސް އިން 1-0 އިން ޕެރަގުއޭ ބަލިކުރި މެޗަށް ފަހު، އަމީތާބް ވަނީ، އޭނާގެ ވެރިފައިޑް އެކްސް އެކައުންޓްގައި (ކުރީގެ ޓްވިޓާގައި) ޕޯސްޓެއް ކޮށްފަ އެވެ.
އެ ގޮތުން، އަމީތާބް ލިޔެފައިވަނީ، މި ފަަހަރުގެ ވޯލްޑް ކަޕްގައި ފްރާންސްގެ ޓީމުގައި ހިމެނޭ 10 ކުޅުންތެރިންނަކީ ކަޅު ކުޅުންތެރިން ކަމަށާއި އެއް ކުޅުންތެރިއަކީ ދޮން ކުޅުންތެރިއެއް ކަމަށެވެ. އަދި، މީގެއިން އެނގެނީ، ކަޅު ކުޅުންތެރިންގެ ބާރުގަދަކަން ކަމަށް އަމީތާބް ބުނެފައިވެ އެވެ.
މިއާ އެކު، ގިނަ އަދަދެއްގެ ސަޕޯޓަރުން ވަނީ އަމީތާބްގެ މި ޕޯސްޓުން ބާރު އަޅަނީ ނަސްލީ ތަފާތު ކުރުމާއި ހަމުގެ ކުލައިން މީހުން ގިންތި ކުރުމަށް ކަމަށެވެ، އަދި، މިއީ، އެއްވެސް މީހަކު ފާޅުކުރަން ޖެހޭ ފަދަ ޝުއޫރެއް ނޫން ކަމަށް ވެސް ގިނަ ސަޕޯޓަރުން އަންނަނީ ބުނަމުންނެވެ.
މި ކަމަށް އަމީތާބް، މާފަށް ނޭދޭނަމަ އޭނާ އަކީ ރޭސިޒަމް އަށް ހިތްވަރުދޭ މީހެއްގެ ގޮތުގައި ބެލެވޭނެ ކަމަށް ވެސް ގިނަ ސަޕޯޓަރުން އަންނަނީ ބުނަމުންނެވެ.
މި ޕޯސްޓްގައި އަމީތާބް މާނަކޮށްފައި އޮތީ ނަސްލީ ތަފާތު ކުރުމަށް ހިތްވަރު ދިނުމަށް ނޫން ކަމަށް ބުނެ، އޭނާގެ ސަޕޯޓަރުން އަންނަނީ މި ޕޯސްޓް ދިފާއުކުރަމުންނެވެ.
މި ފަހަރުގެ ވޯލްޑް ކަޕްގެ ކަވަރޭޖްގެ ތެރެއިން ޖަރުމަނުގެ ކުރީގެ މިޑްފީލްޑަރު، ބަސްޓިއަން ޝްވައިންސްޓައިގާ ވާހަކަ ދައްކަމުން، އެފްރިކާ ނަސްލުގެ ކުޅުންތެރިންނަށް ކުޑައިމީސްކޮށް ދެއްކި ވާހަކަތަކަކާ ގުޅިގެން އޭނާ ވަނީ މާފަށް އެދިފަ އެވެ.
ފްރާންސަކީ އެފްރިކާ އަށް ނިސްބަތްވާ އެކި ގައުމުތަކުގެ ދަރިކޮޅުގެ ގިނަ ކުޅުންތެރިންތަކެއް ކުޅެމުން އަންނަ ގައުމެކެވެ. އެ ގޮތުން، ފްރާންސް އިން 2018 ވަނަ އަހަރު ފީފާ ވޯލްޑް ކަޕް ކާމިޔާބުކުރި ސްކޮޑުގައި ވެސް އެފްރިކާގެ އެކި ގައުމުތަކަށް ނިސްބަތްވާ ކުޅުންތެރިން ހިމެނެ އެވެ.
މި ފަހަރުގެ ވޯލްޑް ކަޕްގެ އެއް ފޭވަރިޓުންގެ ގޮތުގައި ބެލެވޭ ފްރާންސް އިން މުބާރާތުގެ ކުއާޓާ ފައިނަލުގައި މިރޭ ކުޅޭނީ އެފްރިކާގެ ގަދަ ބާރު، މޮރޮކޯއާ އެވެ. އެންމެ ފަހުން، 2022 ވަނަ އަހަރުގެ ވޯލްޑް ކަޕްގެ ސެމީ ފައިނަލުން ފްރާންސް އަތުން ބަލިވި މެޗަށް ފަހު، އޭގެ ފަހުން، މޮރޮކޯ މިހާތަނަށް މެޗަކުން ބަލިވެފައިނުވެ އެވެ.
