ޒަގްރެބް، ކްރޮއޭޝިއާ (ޖުލައި 9) - ފާއިތުވި ނުވަ އަހަރު ކްރޮއޭޝިއާ ގައުމީ ފުޓްބޯޅަ ޓީމުގެ ކޯޗަކަށް ހުރި ޒްލަޓްކޯ ޑާލިޗް، މި ފަހަރުގެ ވޯލްޑް ކަޕްގެ ނަތީޖާތަކަށް ފަހު، އެ ޓީމުގެ ކޯޗުކަން ދޫކޮށްލައިފި އެވެ.
އެމެރިކާ، ކެނަޑާ އަދި މެކްސިކޯގައި މި ފަހަރު ކުރިއަށްދާ ފީފާ ވޯލްޑް ކަޕް ފުޓްބޯޅަ މުބާރާތުން ކްރޮއޭޝިއާ ކެޓީ ގަދަ 32 ޓީމުގެ ބުރުގައި ހިތްދަތި ގޮތަކަށް ފަހު ވަގުތު ޕޯޗުގަލް އަތުން 2-1 އިން ބަލިވެގެންނެވެ. އެއީ، ކްރޮއޭޝިއާ އަށް ޑާލިޗް ކޯޗުކޮށްދިން 111 ވަނަ މެޗެވެ. އަދި، މިހާރު އެ މެޗު ވެގެން ގޮސްފައި މި ވަނީ، 59 އަހަރުގެ ޑާލިޗް، ކްރޮއޭޝިއާގެ ބެންޗުން ފެނިގެންދިޔަ ފަހު މެޗަށް ވެސް މެ އެވެ.
ކްރޮއޭޝިއާގެ ކޯޗުކަމާ 2017 ވަނަ އަހަރުގެ އޮކްޓޫބަރު މަހު ހަވާލުވި، ޑާލިޗަކީ އެ ގައުމުގެ ފުޓްބޯޅަ ތާރީހުގައި އެންމެ ކާމިޔާބު ކޯޗެވެ. އެ ގޮތުން، ޑާލިޗްގެ ކޯޗުކަމުގައި ކްރޮއޭޝިއާ އިން ވަނީ އެންމެ ފަހުން ދެ ވޯލްޑް ކަޕްގައި ވެސް ތަފާތު ކާމިޔާބީތަކެއް ހާސިލްކޮށްފަ އެވެ. އެ ގޮތުން، 2018 ވަނަ އަހަރު ރަޝިއާގައި ކުރިއަށްދިޔަ ފީފާ ވޯލްޑް ކަޕްގައި ކްރޮއޭޝިއާ ފައިނަލުގައި ކުޅެ، ފްރާންސް އަތުން 4-2 އިން ބަލިވި އެވެ. އޭގެ ހަތަރު އަހަރު ފަހުން، ގަަތަރުގައި 2022 ވަނަ އަހަރު ބޭއްވި ވޯލްޑް ކަޕްގައި، މޮރޮކޯ ބަލިކޮށް ކްރޮއޭޝިއާ އިން ވަނީ ތިން ވަނަ ހޯދައިފަ އެވެ.
ޖެހިޖެހިގެން ދެ ވޯލްޑް ކަޕްގައި ސެމީ އަށް ކްރޮއޭޝިއާ ގެންގޮސްދިން ޑާލިޗް ވަނީ 2023 ވަނަ އަހަރުގެ ޔުއެފާ ނޭޝަންސް ލީގުގެ ފައިނަލުގައި ވެސް ކްރޮއޭޝިއާ ގޮވައިގެން ވާދަކޮށްފަ އެވެ. އެކަމަކު ޕެނަލްޓީ ޖަހައިގެން ސްޕެއިން އަތުން ބަލިވީ އެވެ. ޑާލިޗަށް ޔޫރޯގެ ދެ މުބާރާތުގައި ވާދަކޮށްގެން ވެސް ކްރޮއޭޝިއާ ގޮވައިގެން ގަދަ 16 އަށް ވުރެން ދުރަށް ނުދެވުނެވެ.
ޑާލިޗް ބުނީ، ކްރޮއޭޝިއާގެ ކޯޗަކަށް ހުރެ އޭނާ އަށް ގިނަ ތަޖުރިބާތަކެއް ކުރަން ޖެހުނު ކަމަށާއި ކުރެވުނީ ފަހުރުވެރި މަސައްކަތެއް ކަމަށެވެ. އަދި، ކްރޮއޭޝިއާ މިހާރު އޮތް ހިސާބުން ދެން ކުރިއަށް ދިއުމަށް ބޭނުންވަނީ އާ ވިސްނުންތަކަކަށް ފުރުސަތު ދިނުމަށް ކަމަށް ޑާލިޗް ވަނީ ބުނެފަ އެވެ.
"މިއީ، މި ޗެޕްޓަރު ނިންމާލާފައި، ދެން އޮތް ހަރުފަތަށް ދިއުމަށްޓަކައި، އާ ވިސްނުންތަކަކަށް ފުރުސަތު ދޭންވީ ވަގުތު، އަބަދުވެސް ކްރޮއޭޝިއާ ފުޓްބޯޅަ އަށް ކާމިޔާބަށް އެދެން،" ޑާލިޗް ބުންޏެވެ.
ޑާލިޗަކީ މި ފަހަރުގެ ވޯލްޑް ކަޕްގެ ތެރޭގައި، ކޯޗުކަން ދޫކޮށްލި 13 ވަނަ ފަރާތެވެ. އެ ގޮތުން، އެންމެ ފުރަތަމަ މުބާރާތުގެ ތެރެއިން، ޓިއުނީޝިއާ އިން ފުރަތަަމަ މެޗަށް ފަހު، އެ ޓީމުގެ ކޯޗު ސަބްރީ ލަމޫޗީ ވަކިކުރިއިރު، އޭނާގެ ބަދަލުގައި ދެން އައި ކޯޗު ހާވް ރެނާޑް ވެސް ވަނީ އެ ޓީމު ދޫކޮށްލައިފަ އެެވެ.
އޭގެ އިތުރުން، ސްކޮޓްލެންޑްގެ ކޯޗު ސްޓީވް ކްލާކް، ދެކުނު ކޮރެއާގެ ކޯޗު ހޮން މިއުން ބޯ، ޗެކް ރިޕަބްލިކްގެ ކޯޗު މިރޯސްލާވް ކޫބެކް، ނެދަލެންޑްސްގެ ކޯޗު ރޮނާލްޑް ކޫމަން، ޖަރުމަނުގެ ކޯޗު ހޫލިއަން ނާގަލްސްމަން، ގާނާގެ ކޯޗު ކާލޯސް ކުއެރޯޒް، އެކުއެޑޯގެ ކޯޗު ސަބެސްޓިއަން ބަކަސޭސޭ، މެކްސިކޯގެ ކޯޗު ހަވިއޭ އަގީރޭ، އުރުގުއޭގެ ކޯޗު މާސެލޯ ބިއެލްސާ އަދި ޕޯޗުގަލްގެ ކޯޗު ރޮބާޓޯ މާޓީނޭޒް ވެސް ވަނީ މަގާމުން ވަކިވެފަ އެެވެ.
