ކަނޑުމަގުން ރާއްޖެއަށް އެތެރެކުރަން އުޅުނު 1،000 އަށްވުރެ ގިނަ ވޭޕް ކާޓްރިޖްތަކެއް މާލޭ ކޮމާޝަލް ހާބަރުން އަތުލައިގަނެފައިވާ ކަމަށް މޯލްޑިވްސް ކަސްޓަމްސް ސާވިސް އިން ބުނެފި އެވެ.
ކަސްޓަމުން ބުނީ ކަނޑުމަގުން ރާއްޖެ ގެނައި މުދާ ޝިޕްމެންޓެއްގައި ގާނޫނާ ގަވާއިދާ ހިލާފް ތަކެތި ހުރެދާނެކަމަށް ކަސްޓަމްސްއަށް ބެލެވިގެން ހިންގި އޮޕަރޭޝަނުގައި އަތުލައިގަތީ 1،108 ވޭޕް ކާޓްރިޖާއި 27 ޑިވައިސް ކަމަށެވެ.
އެ ވޭޕް ކާޓްރިޖާއި ވޭޕް ޑިވައިސްތައް ފޮރުވާފައިހުރީ ޕޮޓޭޓޯ ޗިޕްސް ދަޅު އަދި ޗޮކްލެޓް ޕައުޑަރު ޕެކެޓްތަކުގައި ކަމަށް ކަސްޓަމުން ބުންޏެވެ. މި މައްސަލަ ކަސްޓަމުން ތަހުގީގު ކުރަމުންދާ ކަަމަށް ބުންޏެވެ.
އަތުލައިގަތް ވޭޕް ކާޓްރިޖްތަކުގެ އަގު 380،000ރ. އަށްވުރެ އިތުރުވާނެ ކަމަށް ބެލެވެ އެވެ. އޭގެއިތުރުން ވޭޕް ޑިވައިސްތަކުގެ އަގު 20،000ރ. އަށްވުރެ އިތުރުވާނެ ކަމަށް ބެލެވެ އެވެ.
ކަސްޓަމުން ވަނީ މިދިޔަ އަހަރުގެ ޑިސެމްބަރު މަހުވެސް ރާއްޖެ އެތެރެކުރަން މަސައްކަތްކުރި ވޭޕް ޝިޕްމަންޓެއް އަތުލައިގަނެފަ އެވެ. އެފަހަރު ޖުމްލަ 10،800 ވޭޕް ކާޓްރިޖް އަތުލައިގަނެފައިވާއިރު، އެ ތަކެތީގެ މަގުމަތީ އަގު 3.7 މިލިއަން ރުފިޔާއަށް އަރަ އެވެ.
ދުންފަތް ކޮންޓްރޯލް ކުރުމާ ބެހޭ ގާނޫނަށް ޕީއެންސީގެ ސުޕަ މެޖޯރިޓީ ބޭނުންކޮށްގެން މަޖިލީހުން ގެނައި އިސްލާހާއެކު ހިލޭ ވޭޕެއް މީހަކަށް ދިނަސް 10،000ރ. ގެ ޖޫރިމަނާއެއް އަދި ބޭނުންކުރާ ކޮންމެ މީހަކަށް 5،000ރ. ގެ ޖޫރިމަނާއެއް އަންނާނެ އެވެ.
މީގެއިތުރުން ވޭޕް ވިއްކައިފި މީހަކު ނަމަ 20،000ރ. އިން ޖޫރިމަނާ ކުރުމާއެކު، ވިއްކި ކޮންމެ ވޭޕަކަށް 10،000ރ. ގެ ޖޫރިމަނާއެއް ވެސް ގާނޫނުގެ ދަށުން އަންނާނެ އެވެ.
ނޮވެމްބަރު 15، 2024 އިން ފެށިގެން ވޭޕް ކުރުމަށް ބޭނުން ކުރާ އާލާތްތަކާއި އެ އެތަކެތި ބޭނުން ކުރުމަށް ތައްޔާރުކޮށްފައިވާ އުފެއްދުންތައް އެތެރެކޮށްފި ނަމަ، 50،000ރ. އިން ޖޫރިމަނާ ކުރެވޭއިރު، އެތެރެކުރި ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕް ކުރުމަށް ބޭނުން ކުރާ އާލާތަކަށް 10،000ރ. ގެ މަގުން ޖޫރިމަނާ ކުރެވެ އެވެ.
